Аллагь — гьев вуго бищунго лъикіав гьудул

Аллагьасул гьудуллъун лъугьин — гьеб буго бищунго лъикІаб, дуе гьаризе бегьулеб. Аллагьас дуда малълъила талихІавлъун ва рекІелъ рахІат цІунаравлъун вукІине. Гьес мун эркен гьавила гьересиял божилъияздаса ва зарар бугел ишаздаса. Гьев гІенеккила дур гьари-дугІабазухъ. Гьес дуе кумек гьабила батизе рекІел парахатлъи ва ракІчІей (Забур 70:5; 72:28). Аллагьас дуе кумек кьезе буго захІматал, къваридал къояз (Забур 17:19). Гьединго дуе Аллагьас сайигъат гьабун кьолеб буго абадияб гІумру (Румазде 6:23).

Аллагьасде гІагарлъанагІан, мун гІагарлъила гьесул гьудулзабигунги. Гьел лъугьина дурги гьудулзабилъун. Дуе вацал-яцал гІадинцин рукІина гьел. Гьел рохарал рукІина дуе Аллагьасул хІакъалъулъ лъай кьезе, гьез кумек гьабила дуе ва квер чІвала.

Нилъ Аллагьасда ращадал гьечІо. Аллагьгун гьудуллъи дуца балагьулеб мехалъ, дуда бичІчІизе ккола цо кІвар бугеб хІакъикъат. Аллагьгун гьудуллъи — гьеб релълъунаро цоцазда бащадазул гьудуллъиялда. Гьев вуго нилъедаса гІемер соназ кІудияв, гІакълу цІикІкІарав ва цІакъго къуватав. Гьев вуго, нилъеда тІад жиндир тІубан ихтияр бугев, нилъер БетІергьан. Гьединлъидал, нилъее гьесул гьудулзабилъун рукІине бокьани, нилъ гьесухъ гІенеккизе ккола ва гьес абурабщинаб гьабизе ккола. Нилъее гьелдаса кидаго лъикІлъи щвезе буго (Ишаял 48:18).