Кин дуда ціикікіун лъазе кіолеб Аллагьасул хіакъалъулъ

Иеговал хІакъалъулъ цІикІкІун лъазе кІвела дуда, РухІаниял ТІахьал цІалулаго. Цебе заманалда Аллагьас, жиндирго пикраби гьез хъвазелъун, цо-цо гІадамал тІаса рищана. Гьел хъвай-хъваязда абула РухІаниял ТІахьалиланa. Жакъа, гьел ТІахьал цІалулаго, нилъеца лъай-хъвай гьабула ТІадегІанав Аллагьгун. РухІаниял ТІахьазда жаниб Иеговал Калам яги хитІаб бугелъул, гьезда цоги Аллагьасул Каламиланги абула. Нилъ ракІчІун божизе бегьула РухІаниял ТІахьазда абуралда, щай гурелъул Иеговаца киданиги гьереси бицунарелъул. «БукІине рес гьечІеб жо буго — Аллагьас гьереси бицин» (Ягьудиязде 6:18). Аллагьасул Калам буго — унго-унгояб хІакъикъат (Иоанница 17:17).

РухІаниял ТІахьал — гьеб, Аллагьас нилъее кьураб, бищунго хириял сайигъатазул цояб буго. Гьеб данде кквезе бегьула вокьулев инсуца жиндирго лъималазде хъвараб кагътида. Гьелъ бицунеб буго, нилъер ракь гьайбатаб гІумру гьабизе бегьулеб бакІалде, ай Алжаналде буссинабизе бугилан абун Аллагьас кьураб рагІул. ТІахьазда хъван буго: щиб Аллагьас гьабураб араб заманалда, щиб гьес гьабулеб бугеб гьанже ва щиб цоги гьабизе гьесул къасд бугеб букІинеселда жиндир мутІигІал лъималазе. Гьединго гьелъ нилъее кумек гьабула, нилъер масъалаби тІуразаризеги, талихІ батизеги (2 Тимофейихъе 3:16, 17).

Иеговал НугІзал — гьел ккола Аллагьасул гьудулзаби; гьез дуе кумек гьабила бичІчІизе, щиб РухІаниял ТІахьаз малълъулеб бугебали. Дуца гІадатго гьезда абе, дуе РухІаниял ТІахьал цІалун, гьезул магІна лъазе бокьун бугилан. Лъай кьеялъухъ гьез мухь босуларо (Матфейица 10:8). Цоги мун вачІине бегьула гьезул динияб лъай кьолел данделъиязде. Гьел данделъиял тІоритІула икрам гьабулел, ПарччахІлъиялъул Рукъзалилан абулел бакІазда. Гьел данделъиязде хьвадани, дуе хехго Аллагьасул хІакъалъулъ гІемер лъай щвела.

Аллагьасул хІакъалъулъ дуда жеги лъазе буго, гьес бижизабуралъул хал-шал гьабулаго. Масала, РухІаниял ТІахьазда хъван буго: «Зоб-ракь бижизабуна Аллагьас» (1 Мусал 1:1). Иеговаца «зоб» бижизабулаго, бижизабуна бакъги. Щиб гьелъ Аллагьасул хІакъалъулъ нилъеда бицине бегьулеб? Гьелъ нилъеда бицунеб буго Иеговал кІудияб къуват бугилан. ГІицІго гьесда бажарана гьединаб кІудияб, гвангъун канлъи кьолеб бакъ бижизабизе. Гьединго гьелъ нилъеда бихьизабулеб буго, Иегова цІакъго гІакълу цІикІкІарав вугевлъи, щай гурелъул канлъиги хинлъиги кьолеб, амма жибго бухІулареб бакъ бижизабизе ккани, къваригІуна кІудияб гІакъиллъи.

Иеговаца бижизабуралъ бихьизабулеб буго нилъ гьесие рокьулеблъи. Ракьалда рижарал гІемер батІи-батІиял нигІматазул пикру гьабе. Иеговада кІолаан нилъее цохІо нигІмат кьезе яги тІубан щибниги кьечІого тезе. Амма Иеговаца нилъее кьун руго гІемер нигІматал — батІи-батІияб куцалъул, роценалъул, кьералъул ва тІагІамалъул. Гьелъ бихьизабулеб буго, Иегова — нилъ рокьулев, сахаватав, нилъер тІалаб-агъаз гьабулев ва ракІ хІеренав вукІин (Забур 103:24).