Гьудул вукіине бокьани, мунгоги гьудуллъун вукіине ккола

Гьудуллъи бижула рокьул кьучІ-аслуялда. Иеговал хІакъалъулъ дуда гІемер лъанагІан, дуе гьев цІикІкІун вокьизе вуго. Дур Аллагьасдехун рокьи цІикІкІанагІан, дур анищги кІодолъизе буго гьесие гІибадат гьабизе. Гьелъ дур гъира бачІинабизе буго, ГІиса МасихІил мутагІиллъун лъугьине (Матфейица 28:19). Иеговал НугІзазул бохараб хъизамгун цолъараб мехалъ, дуда кІвезе буго даимго лазат босизе Аллагьасулгун гьудуллъиялдаса. Щибха дуца гьабизе кколеб?

Дуца бихьизабизе ккола, дуе Аллагь вокьулеблъи, гьесул законазе мутІигІго хьвадулаго. «Аллагьасде бугеб рокьилъун букІуна, нилъеца гьесул малълъиял тІурай, гьесул малълъиял абуни захІматал гьечІо» (1 Иоанница 5:3).

ГІумруялда билълъанхъизабе, дуда лъанщинаб. ГІисаца бицана нилъее лъикІаб мисаллъун букІине бегьулеб цо хабар. ГІакъилав чияс жиндирго рукъ бана кьурда тІад. ГІабдалас абуни, жиндирго рукъ бана салиялда тІад. КІудияб роччен бачІиндал, кьурда тІад бараб рукъ биххичІого эхетун хутІана. Салиялда тІад бараб рукъ абуни, бихх-биххун ана ва тІатІала ккана. ГІисаца абуна, жиндир малълъиязухъ гІенеккулел ва гьезда рекъон хьвадулел, релълъунилан гІакъилав, жиндирго рукъ кьурда тІад барав чиясда. Жиндир малълъиязухъ гІенеккулел, амма гьезда рекъон хьвадуларел абуни, релълъунилан гІакълу гьечІев, дов, жиндирго рукъ салиялда тІад барав чиясда. Гьезда кІияздаго гьоркьоса кинасда релълъаравлъун вукІине бокьилеб дуе? (Матфейица 7:24 — 27).

Аллагьасул амру тІубазе гІумру кье. Гьелъул магІна ккола; дуца Иеговае дугІа гьабула ва гьесда абула, дуе бокьун бугилан абадиялъго гьесул амру тІубазабулев вукІине. Дуца Аллагьасул амру тІубазабулеб букІиналъ бихьизабула, мун ГІиса МасихІил мутагІил вукІин (Матфейица 11:29).

Лъелъ ччун вахъи. «Лъелъ ччун вахъа ва дурго мунагьал чуре, гьесул цІарги ахІун» (Чапарзабазул ишал 22:16).

РакІ-ракІалъго гьабе Аллагьасе гьабулеб гІибадат. «Щиб нужеца гьабулеб бугониги, гьеб ракІ-ракІалъ тІубай, гІадамазе гІадин гуреб, Иеговае гІадин» (Колоссазде 3:23).