Лъугьа Аллагьасул гьудуллъун абадиялъго!

Гьудул ватизе хІал биччазе ккола; амма хІал кьезе ккола гьединго гьудуллъи цІунизеги. Дуца Аллагьгун гьудуллъи батизе гьабулеб хІал кьеялъе квербакъи щвела, ва гьеб цІунизе гьабулеб жигаралда гьарзаго баракатги лъела. Жинда иман лъуразда ГІисаца абуна: «ХІакъикъаталъ эркен гьаризе руго нуж» (Иоанница 8:32). Гьелъул магІна щиб кколеб?

Мун вохизе бегьула эркенлъиялдаса гьанже. Мун эркенлъизе бегьула гьересиял малълъияздаса ва ШайтІаналъ тІибитІизабулеб бугеб бугьтаналдаса. Мун тархъанлъизе бегьула, Иегова лъаларел чанго миллион чиясул гІумру цІураб хьул къотІиялдаса (Румазде 8:22). Аллагьасул гьудулзаби эркенал руго «хвалда цебе бугеб хІинкъиялдасацин» (Ягьудиязде 2:14, 15).

Эркенлъиялдаса мун вохизе бегьула Аллагьасул цІияб дуниялалдаги. КигІанха гьайбатаб бугеб, букІинеселъ дуе кьезе бегьулеб эркенлъи! Алжаналъул ракьалда букІина эркенлъи рагъаздаса, унтабаздаса ва такъсирчилъиялдаса. Эркенлъи ракъиялдаса ва мискинлъиялдаса. Эркенлъи херлъиялдаса ва хвалдаса. Эркенлъи хІинкъиялдаса, зулму-гІазабалдаса ва ритІухълъи гьечІолъиялдаса. РухІаниял ТІахьаз Аллагьасул хІакъалъулъ бицунеб буго: «Дуца квер рагьула ва кинабго гІумру гьабулебщинаб гІорцІизабула дур квербакъиялдалъун» (Забур 144:16).

Аллагьасул гьудулзабаз абадиялъго гІумру гьабизе буго. Абадияб гІумру — къиматаб сайигъат буго, Аллагьас живгун гьудуллъи балагьулел киназего кьезе бугеб. (Румазде 6:23). ЦохІо пикру гьабе, щиб дуе кьезе бугеб лъугІи гьечІеб гІумруялъ.

БатІи-батІиял ишал гьаризе заман букІина дур. Дуе бокьун батизе бегьула музыкалияб алаталда хъвазе ругьунлъизе. Яги дуе бокьун батила суратал рахъизе, цІулал устарасул ишалъе ругьунлъизе. Цоги дуе бокьун батизе бегьула хІайваназул ва хурдузул хІакъалъулъ цІикІкІун лъазе. Мун сапаразде цІалев вукІине бегьула ва дуе бокьун батила гІемерал улкаялги халкъалги рихьизе. Гьеб кинабго тІубазе рес кьезе буго абадияб гІумруялъ!

Дур букІине буго заман, гІемер гьудулзаби ратизе. Абадияб гІумруялъ дуе рес кьезе буго, гІемерал Аллагьасул гьудулзабилъун лъугьарал лъазе. Дуда лъазе буго гьезул махщелазул ва гІамал-хасияталъул батІи-батІиял рахъал, ва гьелги гьединго рукІина дур гьудулзабилъун. Дуе гьел рокьила, гьезие мунги вокьила (1 Коринфазде 13:8). Ахир гьечІеб гІумруялъ дуе рес кьезе буго, ракьалда ругелщинал киналго гІадамазул гьудуллъун лъугьине! Амма сундасаго лъикІаб букІине буго, гІасруялдаса-гІасруялде жеги къвакІулеб ва къвакІулеб, Иеговагун бугеб дур гьудуллъи. Лъугьаха Аллагьасул гьудуллъун абадиялъго!