Араб заманаялъул дарсал

Иеговаца биччазе гьечІо квешал гІадамазе Алжан пасат гьабизе. Гьениб гІумру гьабизе буго гІицІго Аллагьасул гьудулзабаз. Щиб лъугьине бугеб квешал гІадамазе? Гьеб суалалъе жаваб лъазе, балагьизин НухІил хІакъикъияб тарихалъухъ. НухІица гІумру гьабулеб букІана чанго азарго соналъ цебе. Гьев вукІана лъикІав чи, ва гьес кидаго тІолабго жан кьун хІаракат бахъулаан Иеговал амру тІубазе. Аллагьас НухІида лъазабуна, жинца киналго квешал гІадамал, тІаде ТІупанги тІун хвезаризе ругилан. Гьес НухІие амру гьабуна гама базе; тІупан тІаде бачІараб мехалъ, НухІги гьесул хъизанги хвечІого рукІине (1 Мусал 6:9—18).

НухІица ва гьесул хъизамалъ гама бана. НухІица гІадамазда лъазабулеб букІана, ТІупан тІезе бугилан, амма гьесухъ гьел гІенеккулел рукІинчІо ва хадубккунги квешлъи гьабулеб букІана. Гама бан лъугІарабго, НухІица гьенибе бакІарана батІи-батІияб рухІчІаголъи, гьелдаса хадуб гьевги гьесул хъизанги гамиде жанире лъугьана. Гьеб мехалъ Иеговаца кутакаб буран багъаризабуна. КІикъого сордо-къоялъ, гьоркьоса къотІичІого цІад бана. Лъадаца кинабго ракь гъанкъизабуна (1 Мусал 7:7—12).

Квешал гІадамал хвана, НухІги гьесул хъизанги абуни хвасарлъана. ТІупан тІолеб мехалъ гьелги цІунун, Иеговаца гьезие кьуна квешлъиялдаса бацІцІалъараб ракь (1 Мусал 7:22, 23). Инжилалъ абулеб буго, жеги бачІине бугин заман, битІарал ишал гьаризе инкар гьабулел гІадамал Иеговаца тІагІинарулеб. ЛъикІал гІадамал хвезе гьечІо. Гьез абадиялъ гІумру гьабизе буго Алжаналъул ракьалда (2 Петрица 2:5, 6, 9).

Жакъа гІемер гІадамаз квешлъи гьабулеб буго. Дуниял балагьазул цІун буго. ЦІидасан ва цІидасан Иеговаца ритІулел руго жиндирго НугІзал цебеккунго гІадамазда лъазабизе, амма гІемерисел гІадамазе бокьун гьечІо гІенеккизе Иеговал рагІабазухъ. Гьезие бокьун гьечІо жидерго гІумруялъул нухал хисизе. Гьез къабул гьабулеб гьечІо квешлъи-лъикІлъиялъул хІакъалъулъ Аллагьас абулебги. Щиб букІине бугеб гьединал гІадамазе? Хисиладай гьел киданиги? ГІемерисел хисизе гьечІо киданиги.ТІаде гІунтІулеб буго заман, квешал гІадамал тІагІинаризе ругеб, гьез цІидасан киданиги гІумро гьабизе гьечІо (Забур 91:8).

Ракь биххизабизе гьечІо — гьеб Алжаналде буссине буго. Аллагьасул гьудулзабилъун лъугьанщиназ, абадиялъго гІумру гьабизе буго Алжаналъул ракьалда (Забур 36:29).