Inayentuafiyiñ Chau Dios ñi yafültucuchequen

1. ¿Chumngelu yafültucucheaiñ?

FACHANTÜ “fill huesaque dungu” rupaqueiñ, feimu com iñchiñ duamnieiñ taiñ yafültucungeal (1 Ped. 1:6). Rume mañumcüleiñ taiñ yafültucueteu mu caquelu che, feimu ca femngechi yafültucuafiyiñ pu huesa rupamequelu (Mat. 7:12). Chau Ngünechen “yafültucuqueiñmeu chem huesa dungu mu rume rupaliyiñ”, femngechi quimeltuqueiñmu taiñ ca femngechi yafültucucheal (2 Cor. 1:3, 4; 1 Tes. 4:18). Taiñ piuqueyefiel mu taiñ pu peñi, pu lamngen, ayühunquechi yafültucuquefiyiñ engün. Feitachi troquiñ mu, ngüneduamaiñ chem pilei Biblia ti yafültucuchequen mu, chumngechi yafültucuafuiñ caquelu ca chumafuiñ duamliyiñ taiñ yafültucungeal.

¿CHEM PILEI BIBLIA TAIÑ YAFÜLTUCUCHEAL?

2. ¿Chem pilei Biblia ti yafültucuchequen mu?

² Biblia mu, ti palabra “yafültucual” griego quehun mu ca feipiafui cüme duameltuafiel quiñe che cam ngülamtuafiel (Rom. 12:8; peafimi ti nota de estudio “el que anima”). Griego quehun mu, tüfa ca rulpadungungeafui quiñe che mütrümngei ñi püllecontuafiel feiti duamnielu ñi quellungeal. Feita raquiduamelafeiñmu quiñe che lefcülen amulu ñi quelluafiel tañi hueni cutrancaucülelu, fei fillque dungu femai tañi doi cüme duamelafiel.

3. ¿Chumngelu inayentufali Bernabé? (Ca inaduamnge ti adentun).

³ Biblia nütramcai quiñe cristiano José pingelu, fei rume yafültucuquefui ca quelluquefui ta caquelu, feimu Bernabé ca pingequefui, tüfachi üi feipilei “tati yafültucuchequelu” (Hech. 4:36). Tañi yafültucuchequen mu, rume cümei ñi femngechi üitungen, feimu Biblia mu José pingehuequelai, Bernabé müten pingequei. Bernabé fentren rupa quellufi tañi pu peñi ca lamngen duamnielu quellu, quiñe tüfa ta Saulo. Pichi rupalu ñi cristianongerpun, Saulo amui Jerusalén mu ñi trahuluhual tati pu cristiano engün. Huelu Saulo quimngequefui tañi inantucuquefel tati pu cristiano, feimu llicangequefui. ¿Chumi cai Bernabé? Fei maneluhui Saulo mu ca yefi cheu ñi mülen pu apostol tañi quimaeteu (Hech. 9:26-28).

¿CHUMNGECHI YAFÜLTUCUAFIYIÑ CAQUELU CHE?

4. ¿Chumngechi doi cümeafui taiñ yafültucuafiel caquelu? (Romanos 1:11, 12).

⁴ Pepi femliyiñ, pemeafiyiñ. Jehová adniefi tañi pu poyequeteu ñi yafültucuafiel ta caquelu. Quiñe rupa, tati profeta Elías rume hueñancülefui, fei Jehová huercüleyu quiñe cüme püllü tañi yafültucuaeteu (1 Rey. 19:4-7). Ti apostol Pablo ca amui tañi pemeafiel tañi pu peñi ca lamngen tañi yafültucuafiel (papeltunge Romanos 1:11, 12). Pemefiliyiñ taiñ pu peñi ca lamngen, matucaulayaiñ, doi mai elcünuaiñ tiempo taiñ trür müleal, femngechi yafültucuafiyiñ (1 Cor. 16:7). Huelu pepi pemenofiliyiñ engün, mütrümafuiñ, huirintuculelafuiñ mensaje cam quiñe nota taiñ yafültucuafiel. Felei llemai, Chau Jehová adnieafeiñmu taiñ yafültucuafiel caquelu. ¿Eluhuaimi cai tami adnieaeteu Jehová?

5. ¿Chumngelu quiñeque mu cüdaungeafui yafültucumeafiel taiñ pu peñi ca lamngen?

⁵ Feitachi pichilehuechi antü mu, doi cüdaungerpuquei ti dungu, feimu doi cüdaungerpuafui taiñ pemeafiel taiñ pu peñi ca lamngen duamnielu quellu. Inayentufali ñi femün Onesíforo cuifi mu. Onesíforo Éfeso mu mülequefui, huelu presuntucungelu Pablo Roma mu, amui tañi quintuafiel cuñihun-ngelu rume. Onesíforo ca carceltucungeafui ca langümngeafui, huelu amui müten (2 Tim. 1:16-18). Ca femngechi femquei taiñ pu peñi ca lamngen Rusia mu mülelu. Quiñe peñi cam lamngen juiciantucungen mu, pu peñi ca lamngen amuqueingün tañi yafültucuafiel carceltucungeafuingün rume. Eimi cai, ¿chumngechi pepicahuafuimi tami ca femngechi femal? Chillcatuafuimi chumngechi Jehová tañi pu che yafültucuuquei cuifi mu ca famülque mu, ca chumngechi ayüucülequeingün inantucungen mu rume.

6. ¿Chumngechi inayentuafuiñ Jehová ñi yafültucuchequen? (Ca inaduamnge ti adentun).

⁶ Cüme allcütuafiyiñ. Quiñe rupa tati profeta Elías langümngealu troquihui, fei llellipufi ta Jehová ca feipifi tañi chum duamcülen. Chau Jehová deu quimniefui com tañi rupamequen Elías, huelu piuqueyenquechi allcütufi. Elías huiño feipimequefui Jehová tañi chum duamcülen, huelu Jehová cüme allcütueyu (1 Rey. 19:9, 10, 14). Ca raquiduamaiñ ñi rupan ti profeta Habacuc. Quisu rume huesa duamcülefui pefiel mu fentren huesaque dungu ñi mülen, fei ramtucafi ta Jehová. Huelu Jehová illculai, doi mai cüme allcütueyu (Hab. 1:2, 3). Fachantü, Jehová ca femngechi cüme allcütuquei taiñ llellipun, deu quimnielu rume com taiñ duamnieel. ¿Chumngechi inayentuafuiñ? Ñochiquechi ca yamquechi allcütuafiyiñ taiñ pu peñi ca lamngen. Petu nütramcamequele engün, catrütulayafiyiñ. Ca tañi raquiduamnon mu entule ñi feipin, illcutulayafiyiñ. Ca fentren rupa entule rume ñi dungu, allcütuafiyiñ müten (Ecl. 7:9; Sant. 1:19).

7. ¿Chumngechi quimafuiñ chem ñi duamnieel taiñ hueni?

⁷ Quimtucunieaiñ chem ñi duamnieel tati che. Jehová peñmaquefi pu che tañi piuque, huelu iñchiñ femquelaiñ. Feimu taiñ quimal chem ñi duamnieel tati che, mülei taiñ cüme allcütuafiel. “Iñche femngechi rupali, tüfachi dungu duamnieafun” piafuimi chi. Huelu acordayaimi com che trürlai, feimu tami hueni duamnieafui ca dungu tami raquiduamnienofel. Feimu entuaiñ tiempo taiñ cüme allcütuafiel ca piuqueyenquechi ramtuafiyiñ taiñ quimal chem tañi duamnieel (Prov. 20:5).

8. Jesús, ¿chumngechi yafültucufi Marta ca María? Ca, ¿chem quimeltuqueiñmu? (Ca inaduamnge ti adentun).

⁸ Raquiduamaiñ chumngechi Jesús yafültucufi Marta ca María deu lalu Lázaro. Feitachi 2 domo mür hueñancülefui ñi lan mu tañi lamngen, huelu Jesús caquerumecünui chumngechi ñi yafültucufiel. ¿Chemu feipiafuiñ? Deu allcütufilu Marta, Jesús nütramcai ti huiñomongetun mu ca quellufi tañi doi maneluhual tüfa mu, huelu Biblia feipilai Jesús ñi femngechi nütramcafiel María. Doi mai Jesús inaye ngümai María engu ca ramtufi cheu ñi elcünungen Lázaro (Juan 11:20-35). ¿Chem quimeltuqueiñmu? Huesa rupan mu che, trürlai chumngechi ñi yafültucungeal engün, feimu mülei taiñ quimtucunieal chem ñi duamnieel caque quiñeque engün.

9. ¿Chumngechi yafültucuafuiñ ta che Biblia mu? (Romanos 15:4, 5).

⁹ Papeltulelafiyiñ ti Biblia. Femliyiñ, yafültucuafiyiñ ca quelluafiyiñ tati che ñi doi maneluhual Jehová ñi feipicünuel mu (papeltunge Romanos 15:4, 5). Femngechi doi maneluhuaingün Jehová tañi piuqueyeteu ca cuidayaeteu, tüfa doi nehuentucuayu engün (Is. 40:31). ¿Chumngechi peafuiñ quiñe troquiñ Biblia ñi yafültucuafiel pu che? Quiñeque peñi ca lamngen huirintucuqueingün quiñeque texto ñi loncontucual. Ca quintuafuimi quiñeque texto tati lifru Biblia ñi ngülam adniequeiñmeu pingelu, ti troquiñ “Yafüluhun”. Llellipuafiyiñ Jehová taiñ quelluaeteu Biblia mu taiñ yafültucuafiel ta che. Chau Dios ñi nehuen quelluafeiñmu ñi acordayafiel quiñeque texto (Juan 14:26).

10. Ñi yafültucuafiel ta che, ¿chumngelu piuqueyenquechi dunguafiyiñ?

¹⁰ Piuqueyenquechi dunguafiyiñ. Quiñeque mu, taiñ yafültucuafiel quiñe che duamfali taiñ ngülamtuafiel, fei ñi cacünutual ñi raquiduam. Huelu cüme dulliaiñ taiñ chem pial, femngechi ñi huesa duamelnoafiel (Prov. 12:18). Inayentuafuiñ ñi femün Jehová yafültucufilu ta Elías. Elías cüme tripalai ñi cüdau troquihui ca raquiduamquefui quisu müten ñi mülehuefel tañi serfiquefiel Jehová. ¿Chumi Jehová? Piuqueyenquechi norümtufi, huelu huelulcalei tami raquiduam pilafi (1 Rey. 19:15-18). Ca femngechi iñchiñ quelluafuiñ taiñ pu peñi, pu lamngen, piuqueyenquechi dunguafiyiñ ca cüme dulliaiñ taiñ chem pial. Cafei trahun meu piuqueyenquechi entuaiñ taiñ hueupin ca taiñ huiñoldungun, femngechi yafültucuafiyiñ taiñ pu peñi pu lamngen.

11. ¿Ca chem duamnieafui pu cutrancaucülelu? (1 Juan 3:18).

¹¹ Quelluafiyiñ pu che duamfalchi dungu mu. Pu cutrancaucülelu duamniefui ñi yafültucungeal, huelu ca duamnieafui caquelu dungu (papeltunge 1 Juan 3:18). Tüfa mu inayentufali ñi femün Bernabé. Fendei quiñe mapu tañi niefel, fei yelelfi ti plata tati pu apostol, femngechi ñi quelluafiel pu peñi, pu lamngen fillalelu (Hech. 4:36, 37). Fantepu mu, ca femngechi femquei fentren pu peñi ca lamngen. Peaiñ ñi rupan quiñe lamngen Polonia mu tuulu, Gabriela pingei. Rume hueñancülefui mangiñmalu tañi ruca. Fei feipi: “Tañi pu chau engu mülefun, rume pellquelefuiñ. ¿Chumaiñ cai taiñ cüme elcünutual taiñ ruca? pilefun. Fentren lamngen inafülcülechi trahunche mu cüpaingün, müchai müten fütra cüdahuingün ñi cüme elcünutual taiñ ruca. Ñi rupan tüfa, doi maneluhurpun Jehová ñi adniefiel tañi pu che tañi yafültucucheal”.

12. Taiñ nehuentulen mu, ¿chumngechi yafültucuafuiñ taiñ pu peñi ca lamngen?

¹² Rupan mu rume huesaque dungu, nehuentuleaiñ. Pablo rume yafültucueyu ngüneduamfilu pu cristiano Tesalónica mu ñi nehuentulen engün rupan mu rume huesaque dungu (1 Tes. 3:5-8). Pablo quimniefui püntütripanole Jehová mu rupan mu huesaque dungu, yafültucuafui tañi pu peñi ca pu lamngen (Col. 2:1, 2). Ca femngechi iñchiñ taiñ nehuentulen mu, yafültucuafuiñ taiñ pu peñi, pu lamngen. Maneluhuaingün chumngechi taiñ quellueteu Chau Jehová, ca femngechi quelluayu engün.

13. ¿Ca chem mülei taiñ femal ñi yafültucucheal?

¹³ Ñochi duamngeaiñ. Yafültucufiliyiñ quiñe peñi cam lamngen, müchai müten cüme duamlayafui chi. Biblia feipieiñmeu “yafültucuniehuaimün”, tüfa pengeleiñmeu quiñe rupa müten ngelai taiñ yafültucuafiel ta che (1 Tes. 5:11). Feimu nieaiñ paciencia ca fentecünulayaiñ taiñ yafültucucheal (1 Tes. 5:14). Iñchiñ cai duamnieliyiñ taiñ yafültucungeal, ¿chumafuiñ? Peaiñ.

¿CHUMAIÑ CAI DUAMLIYIÑ TAIÑ YAFÜLTUCUNGEAL?

14, 15. Cutrantupiuquelen mu cam hueñancülen mu, ¿chem mülei taiñ femal?

¹⁴ Ngillatuqueafiyiñ ta Jehová. Cutrantupiuquelen mu ca hueñancülen mu, llellipuafiyiñ ta Chau Jehová taiñ tüngduamelaeteu (Sal. 94:19). Nülalelafiyiñ taiñ piuque ca feipiafiyiñ taiñ chum duamcülen (Sal. 62:8). Taiñ Huenu Chau deu quimniei taiñ chum duamcülen, huelu taiñ nütramcafiel mu pengelelquefiyiñ taiñ maneluucülen quisu mu. Ca Jehová rumel quelluquefi feichi pu che maneluhun mu tañi llellipueteu (Mar. 11:24). Biblia feipi: “Ngillatuqueafimün ta Chau Ngünechen”, “fei Chau Ngünechen hulai tañi cüme tüngün. Femngechi cuñiutucuaimünmeu tamün piuque ca tamün raquiduam. [...] Pu che pepi adümquelafi tüfachi tüngün” (Filip. 4:6, 7).

¹⁵ Quelluen piaiñ. Feipiafiyiñ taiñ chum duamcülen quiñe cüme hueni cam quiñe loncolelu taiñ manelfiel. Pu peñi ca pu lamngen yafültucuafeiñmu ca quelluafeiñmu, huelu nütramcanofiliyiñ taiñ chum duamcülen, quimlayafuingün (Prov. 14:10). Feimu pichi allcütuafen piafuiñ, fei eluhuaiñ taiñ nütramcalelafiel taiñ chum duamcülen, ca ramtuafuiñ: “¿Chem troquiñ Biblia cam publicacion yafültucueimu eimi?”.

16. Duamnieliyiñ ñi yafültucungeal, ¿chem rupayafui? Huelu, ¿chem acordayaiñ?

¹⁶ Ñochi duam mu perdonayaiñ. Pu peñi, pu lamngen cüpa yafültucuafeiñmeu, huelu huelulcayafuingün. Tañi feipin cam tañi femün meu doi huesa duamelafeiñmu, femngechi rupale pengelelafiyiñ paciencia (1 Cor. 13:4, 7). Acordayaiñ ñi feipin Santiago 3:2: “Feiti turpu huelulcaquenolu tañi dungun meu, culpan chengelai”. Acordayaiñ taiñ pu peñi ca lamngen ayüniei taiñ quelluaeteu. Iñchiñ reque, fei engün ayüqueingün ñi femal cümeque dungu, huelu huelulcauqueingün (Mat. 26:41).

17. ¿Chem eluucüleaiñ taiñ femal?

¹⁷ Taiñ mülen afaelchi antü mu, com iñchiñ duamnieiñ taiñ yafültucungeal. Ca quimnieiñ ñi doyelcülerpual huesaque dungu ca Chau Dios ñi pu caiñe amuleai taiñ caiñetuaeteu. Feimu doi duamnieaiñ taiñ yafültucungeal. Feimu llemai, eluhuaiñ taiñ hueluconque yafüluhual.