Cüme hueniyenieafimi tami afcadi

1. ¿Chemu feipiafuiñ pu cümeque hueni quiñe regalo reque felei?

TATI pu cümeque hueni quiñe regalo reque cüpalu Jehová mu (Sant. 1:17). Piuqueyequefingün Jehová ca piuqueyequeiñmu iñchiñ. Ayüucülequeingün iñchiñ ayüucülen mu. Yafültucuqueiñmu hueñancülen mu ca cüme ngülamtuqueiñmu duamnieliyiñ ngülam. Rumel quelluqueiñmu ca manelfalingün. Femngechi hueni ayühulmaqueiñmu taiñ piuque (Prov. 27:9).

2. Tati pu curehuen, ¿chemu mülei tañi rumel eluucüleal tañi doi hueniyehual? (Mateo 19:6).

² Tati curehuen mülei tañi rume cüme hueniyeucüleal engu. Feimu mülei tañi fill antü yafüluhual tañi doi quiñeucüleal. Femnole, quisulelu troquihuafui, huesa duamafuingu ca lladcüafuingu cütu. Huelu eluucülele engu ñi cüme hueniyeucüleal, doi quiñeucüleaingu tañi curehuen-ngen (papeltunge Mateo 19:6). Feitachi troquiñ mu ngüneduamaiñ chumafui tati pu curehuen ñi doi hueniyeucüleal. Huelu hunelu mu, ngüneduamaiñ chumafui quiñe peñi cam lamngen ñi cüme dullial tañi afcadi, femngechi tañi rumel hueniyeucüleal engu.

CHUMNGECHI DULLIAFUIMI QUIÑE AFCADI TAMI RUMEL HUENIYEAFIEL

3, 4. ¿Chem quelluafeiñmu taiñ nieal quiñe cüme afcadi? (Proverbios 18:22).

³ Quiñeque falinque dungu taiñ dulliqueel cümelcayafeiñmu cam huesalcayafeiñmu com taiñ mongen mu. Feimu petu taiñ dullinon, mülei taiñ cüme raquiduamal ñi chum tripayafel.

⁴ Quiñe tati doi falinque dungu taiñ dullial, fei inei engu taiñ niehual, feichi che cai taiñ rumel hueniyeafiel com taiñ mongen mu. Jehová cai elcünulu ñi niehual pu che, rume cümei taiñ quintual ñi ngülam taiñ cüme dullial. Jehová ayüniei taiñ cüme dullial taiñ afcadi ca cüme quimniei chem taiñ doi cümelcayafeteu (papeltunge Proverbios 18:22; Is. 48:17, 18). Tati ngülam mülelu Biblia mu quelluafui quiñe cristiano tañi cüme dullial tañi afcadi.

5. Dulliliyiñ taiñ afcadi, ¿chemu falin-ngei tañi deu fautizaucüleal?

⁵ Fautizaulu iñchiñ, hueniyerpufiyiñ Jehová (Sal. 25:14). Feimu lle raquiduamülmi tami nieal tami afcadi, dulliaimi quiñe che tañi deu hueniyefiel Jehová (1 Cor. 7:39). Femngechi pengelaimi tami inaquefiel Jehová tañi ngülam ca peafimi tami afcadi quiñe regalo reque cüpalu Jehová mu (Prov. 19:14). Ca femngechi famentuafuimi tami huesalcalerpuafel dullilmi quiñe che hueniyenofilu Jehová (2 Cor. 6:14). Jehová tañi troquiñche mu pelaimi chi inei engu tami niehual, huelu raquiduamlayaimi tami dullial quiñe che poyequenofilu Jehová. Femngechi femülmi, cüme triparpulayafui. Ca cümelayafui tami raquiduamal: “Niehuayu müten, rupachi antü hueniyerpuafui Jehová”.

6, 7. Ayüniefilmi quiñe che, ¿chem ramtuhuafuimi?

⁶ Quiñe che fautizaucülele rume, raquiduamfemlayaimi ñi cüme afcadingeal. Feimu ayüniefilmi quiñe che, ramtuhuafuimi: “¿Chumngechi chengei tañi pu che mu? ¿Duamtuchequei ca respetachequei? ¿Chumngei tañi pu hueni? ¿Chem femquei quiñeucülenolu tañi raquiduam caquelu meu? ¿Quintuquei ñi femngeal quisu tañi ayünieel müten, cam ngüneduamquei caquelu ñi ayünieel chaftunofile Biblia? ¿Tunte duamtuquefi plata?”.

⁷ Ca ramtuhuafuimi: “¿Quimfalngei tañi rume piuqueyefiel Jehová? ¿Eluuquei tañi inayentuafiel Jehová ñi chumngen? ¿Quellupeaeneu mai tañi doi cüdahuelafiel Jehová? ¿Quiñeucülepei mai tayu raquiduam tayu doi serfiafiel Jehová? ¿Iñche tañi doi cüme hueningerpuafui?” (Col. 3:9, 10). Eimi domongelmi, ca ramtuhuafuimi: “Feitachi huentru, ¿ca cüme loncoleafui iñche mu?” (1 Cor. 11:3). Huentrungelmi, ca ramtuhuafuimi: “Tüfachi lamngen, ¿quelluntucupeaeneu mai tañi loncolen mu huelulcauli rume?”. Müchai quimlayafuimi com tüfachi dungu, feimu petu tamu novioucülen eluhuaimu tamu doi cüme quimuhual.

8, 9. Pu novioucülelu, ¿chumngechi quimafui ñi cümeafel tañi niehual? (Ca inaduamnge ti adentun).

⁸ Tamu novioucülen, eluhuafuimi tami rüf cüme quimafiel ñi chumngechi chengen tami ayün, femngechi tamu cüme dullial. Ramtuafuimi caquelu ñi chumngen tami ayün ca chumngechi ñi troquingequen. ¿Quimniengei tañi ñom chengen, ñi duamtuchequen ca eluucülei tañi allcütuafiel caquelu? Sara, quiñe lamngen mülelu Guyana Francesa mu, niehui Daniel engu. Feipi: “Petu tayu nieunon, ramtufiñ quiñeque tañi doi quimnieteu tañi chumngen Daniel. Nütramcafiñ tati precursor mülelu Daniel engu, quiñe loncolelu ca quiñeque tañi lamngen trahunche mu ca quiñeque tayu pu hueni” pi taiñ lamngen. Ca piuqueyenquechi ramtuafuimi: “¿Nielelen dungu tami rupaquefel cuifi cam feula iñche tañi quimafel?”. Rume falin-ngei tami feipingeal tüfachi dungu petu tamu nieunon, ¿chemu? Quiñeque dungu ñi rupaquefel che cuifi, rume huesalcarpuafeyu tañi curehuen-ngen mu.

⁹ Doi quimfilu tati che, epu rume raquiduamcüleafuimi ñi cümeafel tamu niehual. Cam tami pu cümeque hueni ngüneduamingün chi quiñeque dungu ñi raquiduamcülehuen tami ayün mu. Femngechi rupale, fütra dungu no pilayaimi. Doi mai cüme raquiduamaimi, femngechi tami dullial tami niehual cam nieunoal feichi che engu.a Feula ngüneduamaiñ chumngechi doi hueniyehuafui deu nieuchi che.

TRÜR RULPAANTÜLEAIMU

10. Pu nieulu, ¿chumngelu mülei tañi trür rulpaantüleal?

¹⁰ Tati pu nieulu fentren duam niele rume, mülei ñi entual tiempo tañi trür rulpaantüleal, femngechi doi hueniyehuai ca doi quiñeucüleai. Nütramcayaingu chem ñi rupan feichi antü, chem tañi raquiduamcülen, chem tañi nieel piuque mu, pengeluhuai ñi piuqueyehun engu ca cüme rupayaingu.

11. ¿Chem huesalcayafui ñi quiñeucülen pu curehuen?

¹¹ Tati pu nieulu doi cüme hueniyeule, quintulayaingu tañi huichuleal, doi mai tañi trür miyahual engu. Quiñeque mu pichiñma huichuleafuingu, huelu alüñmafule ñi huichulen engu, tüfa cuñihun-ngeafui. Quiñeque amuqueingün ca pais mu tañi cüdaumeal, feimu alüñma camapuleingün tañi pu che mu. Ca mapu mu doi huehuafuingün plata, huelu tañi curehuen mu rupayafuingün huesaque dungu.

12, 13. 1) ¿Chumquei quiñeque curehuen tañi trür rulpaantüleal? (Ca inaduamnge ti adentun). 2) ¿Tunte falintuquefimi tami afcadi? (Inaduamnge ti huichulechi dungu “¿Tunte falintuquefimi tami afcadi?”).

¹² ¿Chumquei quiñeque curehuen ñi trür rulpaantüleal? Taiñ lamngen Lea, Guam mapu mu mülelu feipi: “Tañi füta iñchiu trür femqueyu fillque dungu. Quintuquelayu tayu huichuque cüme rupaleal caquelu che engün”. Roxana, Estados Unidos mu mülelu feipi: “Nielu cai iñchiu fentren duam, adcünuqueyu tayu tiempo tayu femal falinque dungu. Ca femngechi femqueyu tayu trür rulpaantüleal, falin-ngelu cai” (ca ngüneduamafuimi Amós 3:3). Quiñe peñi Francia mu mülelu Damien pingei, feipi: “Trürlai chem dungu tayu ayühulqueteu, huelu rume falin-ngei duamtuafiel chem ñi ayüqueel tañi afcadi. Rupachi antü mu, quiñeque feichi dungu ca ayürpuqueiñ ñi femal” (Mat. 7:12). Lamngen Katie ca mülelu Estados Unidos mu, feipi: “Quiñeque mu, guardacünuqueyu tayu telefono tayu cüme allcütuhual”.

¹³ Huelu doi falin-ngei tamu trür cüdahuelafiel Jehová. Taiñ lamngen Míriam, Francia mu mülelu feipi: “Huitran mu müten, papeltuqueyu Biblia. Rupan papeltulu, trür nütramcaqueyu chem quimeltun entuyu ca chumngechi inayafiel tayu mongen mu. Rume falintuquefiñ tayu femngechi femquen. Ca rume ayühulqueneu tayu trür llellipual, femngechi allcütuquen tañi füta tañi rume piuqueyefiel Jehová”. Lamngen Katie taiñ deu nütramcapeel, feipi: “Rume ayühulqueiñmu tayu trür amuldunguquen. Mür allcütuuqueyu chumngechi taiñ nütramcafiel pu che Jehová mu, doi quiñeucüleyu ca doi quimuhuiyu” (Prov. 27:17).

MÜLELE HUESAQUE DUNGU, QUIÑEUCÜLEAIMU

14, 15. Pu curehuen, ¿chumngelu mülei ñi yafüluhual tañi quiñeucüleal? ¿Chumngechi trürümafuiñ tati che cüme elcünutufilu ñi ruca?

¹⁴ Tañi culpafe chengen mu, quiñeque mu tati pu curehuen ca rupayaingün huesaque dungu mu. Feimu Biblia feipi: “Inei rume curengele cam fütangele, rupayai huesaque dungu tañi mongen meu” (1 Cor. 7:28). Femngechi dungu rupale ñi curehuen mu, ti huentru ca ti domo mülei ñi yafüluhual tañi trür chaftuafiel ca ñi quiñeucüleal.

¹⁵ Raquiduamaiñ quiñe ejemplo mu. Quiñe cüme fütra ruca huesañmaule, tati ngen ruca cüme elcünutuafi cüdaungefule rume. Femai tañi falintuniefiel mu ñi ruca. Ca femngechi com pu curehuen rupayafuingün huesaque dungu ca quiñeulayafui tañi raquiduam. Huelu falin-ngelu am ti curehuen, yafüluhuaingün tañi quiñeucületual. Cüdaungeafui ca alüñmayafui, huelu ayühulafingün Jehová tañi femün mu (Mal. 2:16). Eluule ñi cümelcautual, pengelaingu tañi epuñpüle piuqueyehun ca yamuhun. Huelu doi mai pengelaingu tañi piuqueyefiel ca yamniefiel Jehová, elcünulu ñi niehual pu che.

16. ¿Chumafui pu curehuen mülele huesaque dungu? (1 Corintios 13:4-8a; ca inaduamnge ti adentun ca ti huichulechi dungu “¿Chem quelluafeimu tamu doi hueniyehual?”).

¹⁶ Mülele huesaque dungu tami curehuen mu, raquiduamfemlayaimi tamu püntühual (1 Cor. 7:10, 11). Doi mai ramtuunge: “¿Ca chem femafun tayu doi hueniyehual?”. Estudiafinge chem pilen Biblia tami pengelal piuqueyen, ca raquiduamnge chumngechi tami doi cüme inayal ñi feipin 1 Corintios 13:4-8a (papeltunge). Raquiduamlayaimi tami elcünuafiel tami afcadi, doi mai raquiduamnge chumafuimi ñi doi tremal tamu piuqueyehun. Raquiduamlayaimi chem ñi femafel tami afcadi, doi mai raquiduamnge chem tami femafel eimi tamu ayüucületual. Llellipuafimi Jehová tami quelluaeteu. Quintunge cümeque ngülam taiñ publicacion ca video mu. Ca nütramcayafuimi pu loncolelu ca caquelu quimque cristiano. Biblia feipi ñi niehun epu che, “cüla rumechi füu” reque felei, Jehová am coneltulelu. Feimu maneluhulmu Jehová mu, Jehová quelluaimu tamu quiñeucüleal (Ecl. 4:12).

17. Pu ayülu ñi nieal afcadi ca pu deu nieulu, ¿chumafui ñi ayüucüleal?

¹⁷ Jehová ayüquei com tañi pu che ñi ayüucüleal, ca ayüquei ñi ayüucüleal tati pu ayülu ñi nieal afcadi ca tati pu deu nieulu. Eimi raquiduamcülelmi tami nieal afcadi, cüme dulliaimi inei engu tami niehual, femngechi tamu rumel hueniyehual. Cam eimi deu nielmi afcadi, eluunge tami doi hueniyeafiel. Mülele huesaque dungu tamu curehuen mu, yafüluhuaimu tamu quiñeucüleal, Jehová quelluaimu llemai. Femngechi femülmu, rume ayüucüleaimi tami poyen afcadi eimu (Ecl. 9:9).