Jesús quimeltui chumngechi llellipual

Fentren dungu femquefui pu fariseo ñi afmatulafiel pu che. Femquefuingün cümeque dungu ñi saquingeal müten. Llellipuquefuingün rüpü püle ca ngillatuhue ruca mu, fei ñi penieaeteu pu che. Huiño feipiquefuingün fentren rupa fütraque llellipun tañi allcüngeal. Feimu pu che afmatulehueingün feipilu Jesús tüfa: “Llellipulmün, inayentulayafimün pu fariseo. ‘Alün dunguli, doi cümelu troquiaeneu Chau Dios’ piquei engün, huelu feingelai. Chau Jehová müten allcütupe tami llellipun. Cafei, huiño feipifeipilayafimi quiñe dungu müten. Chau Jehová ayüniei ñi quimal chem ñi mülen tami piuque mu”.

Jesús ca feipi: “Femngechi llellipuaimün: ‘Taiñ Huenu Chau, rume yamniengepe tami üi. Cüpape tami ngünenietual mapu. Chumngechi ñi femngequen tami ayüqueel huenu meu, ca femngechi femngepe mapu mu’”. Cafei Jesús feipifi engün ñi llellipual caquelu dungu mu. Quiñeque tüfa: ñi elungeal tañi duamnieelchi iyael ca ñi perdonangeal tañi culpan.

Fei hula, Jesús feipi: “Fentecünulayaimi tami llellipual. Llellipuleaimi cümeque dungu tami Huenu Chau Jehová. Pu chau ayünieingün ñi eluafiel cümeque dungu tañi pu pichiqueche. Tami fotüm feipile: ‘Eluen cofque’, ¿cura elupeafimi mai? Cam ‘eluen challhua’ pile, ¿filu elupeafimi mai?”.

Fei Jesús quimeltui ñi chem pifel tüfa. Feipi: “Eimi eluquefimi cümeque dungu tami pu fotüm ca ñahue, ¡doyelchi mai tami Huenu Chau Jehová eluaimu tañi nehuen! Mülei tami llellipuafiel müten”. Eimi cai, ¿femqueimi Jesús tañi feipiel? ¿Chem llellipuquefimi Chau Jehová?