Jesús elufi iyael fentren che

Pu apostol amuldungumeingün fill püle, fei huiñotuingün püllelepalu Pascua 32 tripantu mu. Ürcülefuingün, feimu Jesús farcu mu yefi Betsaida huaria mu ñi ürcütual engün. Huelu, püllepulu inafül lafquen mu, Jesús pei fentren che ñi inaeteu engün. Jesús ayüniefui ñi quisuleal ñi apostol engün, huelu femfulu rume, cüme lloufi feiti pu che. Tremolfi pu cutrancülelu ca quimelelfi fentren dungu. Com antü nütramcalelfi Chau Dios ñi ngünenietual ta mapu. Epe conlu ti antü, pu apostol feipifi ta Jesús: “¿Ngüñülepelai tati pu che? Feipifinge tañi ngillameal iyael engün”.

Huelu Jesús feipi: “Ngelai ñi amutual engün. Eimün elufimün iyael”. Pu apostol feipingün: “¿Iñchiñ ngillameafuiñ cofque ñi eluafiel engün?”. Huelu ti apostol Felipe feipi: “Iñchiñ ngillamefuliyiñ rume cofque, fentren plata mu no rume femlayafuiñ taiñ eluafiel iyael fentren tüfachi pu che”.

Fei Jesús ramtui: “¿Tunten iyael nieiñ?”. Andrés huiñoldungueyu: “Nieiñ 5 cofque ca 2 challhua. Huelu, pichin iyael eluafiel tüfachi fentren che”. Feimu, Jesús feipi: “Cüpalelmuchi ti cofque ca ti challhua”. Fei feipifi ti pu che ñi anücünuhual huichuque troquiñ meu 50 ca 100 che mu. Fei Jesús nüfi ti cofque ca ti challhua, lelipürai huenu mu ca mañumfi Chau Jehová. Fei hudamcafi ti cofque ca challhua, elufi tañi pu apostol ca eluyefingün tati pu che. Mülerquei 5 mil huentru, cafei mülefui domo ca pichiqueche. Com ingün tunte tañi ayüel. Icünulu hula, pu apostol trapümingün ti sofrachi cofque ñi ngünamcanoal. ¡Apolfingün 12 cülco! Afmatufali ñi femün Jesús, ¿chem pimi?

Com fente afmatulehuelu engün ayüfui tañi reycünuafiel Jesús. Huelu Jesús quimniefui petu ñi acunon chi antü ñi reycünuaeteu Chau Jehová. Feimu, Jesús “peucayal” pifi tati pu che, fei feipifi tañi pu apostol ñi amual farcu mu nometu lafquen Galilea mu. Huelu Jesús pürai huincul mu ñi quisuleal, fei ñi llellipuafiel ta Chau Jehová. ¿Chemu? Eluucülequefui ñi llellipual tañi Chau Jehová, fentren duam nielu rume.