Jesús ñi falin hueupin

Jesús dulli tañi 12 apostol, fei amui cheu ñi trahulen fentren che. Fill püle cüpai che, Galilea, Judea, Tiro, Sidón, Siria ca nometu Jordán leufü. Jesús cüpalelngei che fillque cutran nielu ca quiñeque conhuecüfülelu, fei tremoltufi com engün. Fei hula, anücünuhui ca entui quiñe falin hueupin. Femngechi quimeltufi pu che chumngechi ñi hueniyerpuafiel Chau Dios. Fei ñi quimtucual engün tañi duamnieel ta Chau Jehová. Pu che mülei ñi quimal chumngechi pengelafui tañi piuqueyefiel. Quiñe che piuqueyenofile tañi chafche, piuqueyelayafui ta Chau Dios. Mülei tañi füreneafiel ca cümelcayafiel itrocom che, cafei tañi pu caiñetuqueteu.

Jesús feipi: “Piuqueyelayafimi tami pu hueni müten, cafei piuqueyeafimi tami pu caiñetuqueteu ca perdonayafimi com piuque mu. Huesa duamcülele quiñe che eimi tami femün mu, amufemaimi tamu cümelcautual. Chumngechi ayüqueimi tami femngeal, ca femngechi femafimi ta che”.

Jesús cafei ngülamtui: “Hueñeñmangeafuiñ taiñ falinque fillem, huelu turpu hueñeñmangelayafui taiñ huenihuen Jehová iñchiñ. Feimu doi falingei taiñ hueniyefiel Chau Jehová. Raquiduamcülelayaimi chem tami iyal, pütocoal ca chem tami tucutuhual. Cüme ngüneduamfinge pu üñüm, Chau Dios eluniequefi iyael. Fill raquiduamcülelmi rume, doi alütulayafui tami mongen. Loncontucuaimi: Chau Jehová quimniei chem tami duamnieel”.

Pu loncolechi religioso femngechi quimeltuquelafi ta che. Trürümfal-lai chumngechi ñi quimeltuel Jesús. ¿Chumngelu fente cüme quimeltuchequefui? Chau Jehová quimeltufi ta Jesús chem tañi feipial.