Juan pepicafi ti rüpü

Zacarías engu Elisabet niefingu ta Juan. Chau Jehová huercüfi ta Juan ñi amuldungulafiel pu che ñi fülcülepan ti Mesías. Juan amulai ngillatuhue ruca mu cam huaria mu no rume ñi amuldungual, doi mai amui desierto mu. Fentren Jerusalén che ca Judea che ca amuquefui ñi allcütumeafiel. Juan feipiquefi ti pu che ñi femhuenoal huesaque dungu, fei ñi ayühulafiel ta Chau Dios. Feimu fentren che nor raquiduamtui, ca Juan fautizayefi engün Jordán leufü mu.

Juan ülmen mongen yenielafui. Tañi tacun cal camellongefui, iquefui langosta ca miel. Tati pu che ayüniefui ñi doi quimafiel ta Juan. Pu fariseo ca saduceo, mallma piuquengelu engün rume, ca pemefingün. Juan feipieyu engün: “Mülei tamün nor raquiduamtual ca norümtual tamün mongen. Doi cümelu troquihuimün tamün chauyefiel ta Abrahán, huelu tüfa feipilai tamün chauyeaeteu Chau Dios”.

Fentren che ramtuquefi ta Juan: “Taiñ ayühulafiel ta Chau Dios, ¿chem mülei taiñ femal?”. Juan Feipi: “Nielmün 2 tacun, eluafimün 1 tati nienolu”. ¿Chem pilei tañi feipin? Femngechi Juan quimeltufi engün tañi ayühulafiel ta Chau Dios mülefui ñi piuqueyecheal.

Cafei feipifi tati pu cofraquelu impuesto: “Ngünencachelayaimün, doi amulcünulayaimün ti impuesto”. Ca feipifi pu soltau: “Coilatulayaimün, lloulayaimün plata tamün femal huesaque dungu”.

Pu sacerdote ca pu Leví che feipimefingün ta Juan: “Com che ramtuuquei inei am ta eimi”. Juan feipi: “Iñche tati nehuentu dungumequelu desierto mu. Adniemequefiñ ta che ñi quimafiel ta Chau Jehová, huechurpumequen ñi feipin Isaías”.

Pu che rume ayüfingün ñi quimeltuel Juan, feimu ramtuuquefuingün: “¿Tüfa pemai tati Mesías?”. Huelu Juan feipi: “Fülcülepai quiñe huentru doicülelu iñche mu. Iñche nentupüroñmalayafun rume tañi ocota. Iñche co meu fautizahuiyiñ, huelu feiti huentru cüpayalu fautizayaimünmeu Chau Dios tañi nehuen meu”.