Huechengelu Jesús

José engu María nierpui fotüm ca ñahue, com engün mülequefui Nazaret mu. José mamüll meu cüdauquefui ñi mongeluhuam engün, carpinterongefui. Cafei, quimeltuquefi tañi familia Chau Jehová mu ca Moisés tañi ley mu. Com huimtulequefuingün ñi poyemeafiel Chau Dios ngillatuhue ruca mu ca fill tripantu amuquefuingün Jerusalén ñi fiestañmayal ti Pascua.

Jesús nielu 12 tripantu, tañi familia engün amuingün ta Jerusalén, huimtulequefuingün ñi amual. Fentren che acui Jerusalén ñi fiestañmayal ti Pascua, feimu apolefui ti huaria. Aflu ti fiesta, José ca María eluhuingu ñi huiñotual tañi ruca mu. Huelu ngüneduamlaingu ñi mülenon Jesús, raquiduamingu ñi ca amulen tañi pu pariente engün. Fei, quintufilu engu, ngerquelai.

Feimu huiñotuingu ta Jerusalén ca quintuyahulfingu 3 antü. Fei, petufingu Chau Dios tañi ruca mu. Jesús mülerquefui pu quimeltuchefe engün, cüme allcütulerquefui ca cüme entuquefui ñi ramtun. Pu quimeltuchefe afmatulehueingün, fei eluhuingün ñi ramtuafiel ta Jesús. Huiñoldungulu, ngüneduamingün ñi fente cüme adümfiel Chau Jehová tañi ley, fei rume afmatulehueingün.

José engu María cutrantupiuquelen quintuyahulfingu ta Jesús. Feimu María feipifi: “Püñeñ, fill püle quintuyahulpeiñ. ¿Cheu anta miyaupeimi?”. Jesús feipi: “Tañi Chau ñi ruca meu fei tañi müleafel iñche, ¿quimlafuimu am?”.

Jesús huiñotui ta Nazaret tañi chau ca tañi ñuque engün. Üyeu mu, José quimeltufi ta Jesús ñi cüdahual mamüll meu. Huechengelu Jesús, ¿chem chengefui? ¿Chem pimi? Jesús tremürpui ca quimchengerpui. Feimu Chau Dios ca tati pu che saquinierpueyu engün.