Chau Jehová cuñiutucufi ta Jesús

Tripahue antü püle mülerquefui quiñe troquiñche feyentuquelu ñi adnieafeteu pu huangülen. Fei quiñeque huentru feichi mapu mu tuulu eluhuingün ñi inayafiel quiñe huilüfcülechi huangülen reque. Femngechi puhuingün ta Jerusalén. Ti troquiñ huentru quimniefui üye mu ñi choyüngeal quiñe pichi huentru lonco ülmen-ngerpualu pu judio mu. Feimu ramtufingün pu Jerusalén che: “Ayünieiñ taiñ püramyeafiel ti pichi huentru lonco ülmen-ngerpualu pu judio mu, ¿cheu anta mülei?”.

Quimtuculu tüfa ti lonco ülmen Herodes, huesa duami ca ramtufi pu loncolechi sacerdote cheu choyüngei ti pichiche. Fei huiñoldungungei: “Chau Dios ñi pu huerquen feipicünuingün ñi choyüngeal Belén huaria mu”. Feimu Herodes feipifi pu huentru inafilu ti huangülen: “Amumün, quintumün ti pichi huentru Belén mu. Pefilmün, feipimupayan. Fei iñche ca püramyemeafiñ”. Huelu, coilatui.

Ti pu huentru ca huiño inafingün feichi “huangülen” reque felelu, femngechi puhuingün ta Belén. Ti “huangülen” huitracünuhui huente quiñe ruca mu, fei pu huentru conpuingün ca pefingün ti pichi huentru Jesús tañi ñuque María engu. Feimu lucutunagingün ñi püramyeafiel ca elufingün falinque fillem: oro, olibano ca mirra. Huelu, ¿Chau Jehová pemai huercüi ñi pemeafiel ta Jesús? Femlai.

Feichi pun mu, quiñe peuma mu Chau Jehová feipifi ta José: “Herodes eluhui ñi langümafiel ta Jesús. Lefmaumün Egipto mapu mu, eimi ca tati pichi huentru ñi ñuque engu. Mülenagpuaimün üye mu, iñche feipieliyu hula tami huiñotual”. Feimu müchai müten amutuingün Egipto mapu mu.

Chau Jehová feipifi pu huentru ñi huiño pemetunoafiel ta Herodes. Ngüneduamlu Herodes ñi huiñotunon engün, lladcüi, rume illcui. Pelafi ta Jesús, feimu langümfalfi com pu pichique huentru petu nienolu 2 tripantu, Belén huaria mu mülelu. Huelu Jesús mülepui Egipto mu, feimu langümngelai.

Lalu Herodes, Chau Jehová feipifi ta José: “Feula cuñihun-ngelai. Huiñotumün”. José, María ca Jesús huiñotuingün Israel mu, fei mülenagpuingün Nazaret mu.