Cümeque püllü feipingün choyüngei Jesús

Roma ñi lonco ülmen, Augusto pingelu, huercüfi com pu Judá che ñi amual cheu ñi choyüngen engün, fei ñi raquingeal ca huirintucungeal tañi üi. José tañi familia Belén huaria mu tuhui, feimu María engu amui ta Belén. Pichi faltai ñi choyüal María.

Puulu engu ta Belén, nielafuingu cheu ñi umapual. Fei conpuingu cheu ñi elngequen pu culliñ, üye mu choyüngei Jesús. María impolfi ti pichiche pañushcülechi pañu mu, fei cuducünufi cheu ñi iquen pu culliñ.

Feichi pun mu, lelfün mu mülefui quiñeque huentru cuidamequelu pu ufisa inafül Belén mu. Fei, perumefingün quiñe cüme püllü, cafei Chau Jehová ñi fütra pelon huilüfcülen hualloñmaeyu engün. Pu huentru llicaingün, huelu ti cüme püllü feipi: “Ngelai tamün llicayal, quimeleluhuaiñ rume cümeque dungu. Fachantü Belén mu choyüngei tati Mesías”. Feimeu müten, peufaluhui fentren cümeque püllü huenu mu, feipingün: “Huenu meu püramyengepe ta Chau Dios, mapu mu cüme felen niepe pu che”. Fei hula, pu cümeque püllü pengehuelaingün. ¿Chumingün cai pu cuidaufisaquelu?

Fei engün hueluquentu feipihuingün: “Matu amuaiñ ta Belén”. Feimeu müten amuingün, fei pefingün ta José, María ca ti hue püñeñ cheu ñi elngequen pu culliñ.

Pu ufisa camañ nütramcai chem ñi feipieteu engün ti cüme püllü, fei com pu allcütulu afmatulehueingün. María raquiduami ca piuquentucufi ñi feipin ti cüme püllü. Pu ufisa camañ huiñotuingün lelfün mu, rume mañumfingün ta Chau Jehová com tañi peel ca allcütuel engün.