Chau Jehová pepicaqueneu

Fentren dungu afmatuleneu, doyelchi mai tati pu che. Ti cüdau ñi femmequen pu huecheque peñi ca üllchaque lamngen afeluhun-ngelu troquingeafui. Müte quimniengequelafui tañi cüdau engün, huelu ayühunquechi cüdauquefuingün. Tañi femün engün quimeltueneu ñi serfiafiel Chau Dios ñom piuque mu.

Fentren tripantu mu, Chau Jehová pepicanieneu ñi doi cüme cüdahuelafiel. Huelu cuifi budistangefun, feimu feula nütrameluhuaiñ chumngechi quintuquefun ti rüf dungu feichi mu.

QUINTUQUEFUN TA CHAU DIOS TAÑI PICHI HUENTRUNGEN MU

Choyüngen ca tremün Chicago, Illinois, Estados Unidos mu. Nien 1 lamngen ca 2 peñi, iñche tati hunen. Tañi chau ca tañi ñuque Japón mu cüpaingu, doi cüme feleaiñ Estados Unidos mu pingu. Ayüfui engu taiñ nieal doi cüme educacion ca cüme mongen nieal.

Tañi chau ca tañi ñuque cüme inaquefuingu ti budismo religion. Cheu ñi tremün tañi ñuque mülerquefui quiñe templo budista. Tañi chedqui ca 2 huecu monje budistangefuingün. Feimu ti budismo rume falin-ngefui feichi pichi huentrungelu iñche. Tripan mu müten colegio mu amufemquefun ruca mu ñi üyümafiel incienso, ñi chalintuculelafiel co ca arroz tati budista adentun. Fillque domingo antü amuquefuiñ templo mu taiñ poyeafiel ca quiñe adentun doi alülu ca muñetulelu oro mu.

Nielu iñche 7 tripantu, ruca mu adquintuquefun ti budista adentun. Fei raquiduamquefun: “¿Chumletuai tañi mongen lali hula?”. Ti budismo quimeltueneu tañi püllüngetual lali hula. Ngüneduamün ñi afal tañi mongen mapu mu. Püllüngeafun rume, huelu hueñancüleneu ñi niehuenoal ayühun mongen mapu meu. ¡Müna huesa! Tuduamelquelaeneu ñi femngechi rupayal.

Nierpulu iñche 15 tripantu, coneltulerpun tañi budista trahun mu. Huelu ngünam dungu troquirpufiñ. “¿Tüfa müten am tañi mongen?” pilefui ñi raquiduam (Mat. 5:3). Rüf piuque mu maneluuquefun ñi mülen quiñe Dios com nehuen-ngelu ca mongelelu. Cüpa quimfiñ feichi Dios. Biblia quellupelayaeneu ñi quimafiel pifun. Cheu chi ta peafun quiñe Biblia, huelu amulu quiñe budista fiesta mu, ngillafiñ quiñe, afmatufali.

Nielu iñche 17 tripantu, miyahurquefun rüpü püle, quiñe peñi testigo chalipaeneu, Wilson Bashou pingei. Fei ramtueneu: “¿Quimniemi chem maneluhun eli Chau Dios?”. Rupan nütramcalu tüfa, Wilson papeltuleneu Apocalipsis 17:1, tüfa pengeli quiñe cüri domo anülelu fentren co mu. Fei ramtueneu: “¿Chem adentulei tüfachi fentren co?”. Turpu quimlafun. Fei pengeleleneu ti versiculo 15, pengeli ti co adentulei tati pu che. Afmatuleneu pu testigo ñi cüme quimniefiel ti Biblia. Ñi doi cüme quimafiel engün ñi chem pin quiñe versiculo, quintuqueingün huiñoldungun Biblia mu. Epe aflu tayu nütramcan, Wilson elueneu ti lifru La verdad que lleva a vida eterna. Rume cüme quellueneu feichi pichi lifru.

Mari antü rupalu, amun pu testigo ñi trahun mu. Turpu ngoimalayan chumngechi ñi cüme lloungen. Fantepu fentecünuquelan ñi amun. Pichi rupalu ñi hue amun trahun mu, Wilson eluhui ñi quimeltulelaeteu Biblia. Rume ayülefun ñi chillcatual ta Biblia, feimu quiñeque antü 8 hora chillcatuyu. Tañi chau ca tañi ñuque llicalefuingu, feimu cüpa catrütueneu engu. Huelu amulelu ñi chillcatun, doi maneluhun ñi rüfngen ta tüfa. Feimu fautizahun 1983 tripantu mu.

ELCÜNUFIÑ TI UNIVERSIDAD ÑI PRECURSORNGEAL

Fautizaulu iñche, deu chillcatulefun ñi doctorngeal quiñe falin universidad mu. Tañi chau ca tañi ñuque rume cüdahuingu iñche ñi conal universidad mu. Duamfalngelafui ñi elcünual ti universidad, huelu ayülefun ñi cüdahuelafiel Jehová com piuque mu ca ñi precursorngeal.

Tañi chau feipieneu: “Elcünufilmi ti universidad, quechanentuayu ruca mu”. Rume piuqueyefiñ tañi chau ca tañi ñuque, cüpa huesa duamel-lafiñ engu. Feimu quimlafun ñi chumal ca hueñancülefun. Petu universidadconcülelu iñche, pun mu tripaquefun ñi llellipuafiel ta Chau Jehová, feipiquefun: “Quelluen ñi cüme dullial tañi chumal”. Fei elcünufiñ ti universidad, ca tañi chau quechanentueneu ruca mu. Feipifiñ ta Wilson chem ñi rupan, fei huiñamtupange tañi ruca mu pieneu. Trapümfiñ com tañi nieel, fei bus mu amun. Afmatulehuen fente ñi tüngcülefel, quimniefun ñi cüme dullin.

Feula femafun chem tañi ayünieel, quiñe neicümngeelchi üñüm reque. Tüfa hula cüdahuelafiñ ta Chau Jehová com piuque mu pifun. Fei 1984 tripantu mu precursorngerpun.

Precursorngelu iñche, Chau Jehová quimeltueneu fentren dungu. Quiñe tüfa ñi fentecünunoal tañi cüdau. Quiñe antü ayülefun ñi tripayal tañi amuldungual, huelu nielafun tañi compañaeteu. Feimu huesa duamün, doi cümeafui ñi tripanoal pin. Huelu tripan müten. Epu hora rupalu, ca quiñe ruca mu müten amuldunguan pifun. Huelu quisulerquefun, cansalerquefun ca mahunalulerquefui. “¿Fentecünupean mai?” ramtuhun. Petu mülelu fei mu, perumefiñ quiñe hueche huentru Filipinas mu tuulu. Allcütulayaeneu pin tañi raquiduam mu. Huelu allcütueneu. Eluhui ñi chillcatual ta Biblia, fei hula fautizahui.

PEPICANGEN BETEL RUCA BROOKLYN MEU

Epu tripantu mülefun Wilson ñi ruca mu. Huelu 1985 tripantu mu mangelngen ñi cüdahual Betel Brooklyn mu. Chumngechi feipipen ellaconlu ñi nütramcan, huercüngen ñi cüdahual cheu ñi deumangequen lifru. Quiñe antü huelulcahun, fei ti maquina huesalcafi fentren lifru. Feipingen ñi nütramelafiel chem ñi rupan tati loncolelu cüdau mu. Com feipifiñ ñi rupan, huelu quiñe dungu feipilafiñ, fei ti loncolelu piuqueyenquechi acordaleneu, feipieneu: “Perdonaen pilmi, cümeafui”. Femngechi quimtucun quiñe falin dungu: mülei ñi ellcacünunoal tañi huelulcan ca perdon feipial.

Adquintufiel mu pu füchaqueche cüdaucülelu Betel mu, quimürpun ñi doi quellucheal. Feichi mu ti peñi Milton Henschel coneltulefui ti Troquiñ Adniechequelu mu. Quiñe antü quiñentrür anülefuiñ taiñ iyal, feichi antü fentren che cüpai, feimu pu peñi alüñmaingün taiñ cüpalelaeteu iyael. Iñche ca caquelu huechequeche anülelu feichi mesa mu cafcü dungumequefuiñ fente ñi alüñman engün. Peñi Henschel chem pilai rume, huelu huitrapürai, fei quelluconi ñi cüpalngeal iyael. Ñom piuquengei taiñ peñi, piuquentucuniefiñ ñi femün. Raquiduameleneu Jesús ñi ca femngechi serfiniefiel tañi pu apostol (Juan 13:3-5).

“¡MÜLEI TAMI QUIM DUNGUAL JAPONES!”

Amun ta Japón 1987 tripantu mu. Afmatuleneu fente tañi piuqueyefiel engün ti amuldungun ca ñi ñom piuquengen engün. Cüpa quelluntucufiñ engün amuldungun mu, huelu quimlafun japones. Feimu Betel mu, quiñe lamngen Michiko Oda pingelu, adquintueneu ca feipieneu: “Mülei tami quim dungual japones”. Femngechi femün. Tañi ngülam cacünutuñmaeneu ñi mongen.

Quiñeque cüyen rupalu, coneltulerpun quiñe trahunche japones dunguquelu Nueva York mu. Quimfiel japones quellueneu ñi doi cüdahuelafiel ta Chau Jehová. Feichi 1989 tripantu mu, amun Los Ángeles, California, ñi coneltual tañi hunen fütra trahun japones quehun dungu meu. Üyeu pefiñ quiñe precursora tripalu ti fütra trahun mu, Miwako Onami pingei. Ayülefun ñi doi cüme quimafiel.

Niehuiyu 1992 tripantu mu, fei mür cüdahuiyu ti Betel ruca Brooklyn mu. Rume falintuquefiyu tüfachi cüdau. Tañi domo rume cüme piuquengei ca poyechefengei. Eluuquei ñi quellucheal. Tañi femün quimeltueneu ñi doi duamtunieafiel che. Chau Jehová elueneu tañi domo. Rume ayühuelqueneu.

MÜLEPUYU TA BETEL JAPÓN MU CA PRECURSOR ESPECIALNGERPUYU

Quiñeque tripantu rupalu, Miwako tañi chau ca tañi ñuque rume cutraningu. Pu peñi Betel mu rume quellueyumu. Fei huercüngeyu tayu cüdahual Betel Japón mu, femngechi tayu doi pülleleal tañi chedcui ca tañi llalla mu. Huiñamtuhuiyu 1999 tripantu mu.

Cüme llohueyumu pu Betel che Japón mu. Fei matu müten huimpuyu. Doi cüme cristianongerpun inayentufiel mu pu peñi ca pu lamngen Japón mu. Llouchefengeingün, misauqueingün tañi nieel ca rume cüdaufengeingün. Pu Japón che quisutu duamuuquelaingün cüdau mu, doyelchi mai ñi hueluquentu quelluhual. Tañi femün engün quellueneu ñi ñom piuque mu cüdahual. Ca quimtucun chumngechi quelluntucuquefiñ ta Chau Jehová tañi cüdau mu, pichin-ngeafui rume.

Ca pais mu tremlu am iñche. Quiñeque mu cangentufiñ chumngechi ñi cüdauquen pu peñi üye mu. Feimu mülefui ñi ñom piuquengeal ca quim ngüneniehual. Rupachi antü mu, cüme elcünutun ñi raquiduam, fei quimtucun quiñe falin dungu: chem dulliafui rume pu peñi, huelu Chau Jehová cümelcayaiñmu eluuliyiñ taiñ adnieaeteu ñi troquiñche. Chau Jehová ñi duam mu müten cüme tripaquei ti dungu.

Chumngechi pepicaeneu Chau Jehová Betel mu, trüri chumngechi pepicafi ta Moisés. Quisu falin quimeltun llohui Egipto mu. Huelu 40 tripantu cuidaniequefui ufisa. Femngechi Chau Dios quimeltueyu ñi ñom chengeal. Ca femngechi iñche falinque quimeltun llohun universidad mu. Huelu mallma piuquengetun ca quisutu maneluuquefun. Fei Betel mu quimürpun ñi ñom chengeal ca ñi maneluhual Chau Jehová mu. Chau Jehová ñochi duam mu quimeltueneu fentren tripantu mu, chumngechi ñi femfiel ta Moisés.

Cuidafiyu tañi chedcui ca tañi llalla 24 tripantu, fei laingu. Petu mongelelu engu, re doctor mu miyauquefuiñ, rume mütrümquefuiñ taiñ familia ca pu doctor ca fill raquiduamcülefuiñ. Tañi llalla rume cutranürpui, ngellu trecaquefui. Feimu rume cüdautuquefui ñi amuldungual ca amual trahun mu. Pichilehuelu ñi layal, silla de ruedas mu miyauquefui. Femngelu rume, fentecünuquelai ñi poyeniefiel Jehová. Rume ayüquefui nütramcacheal Chau Dios mu. Ñi femün cüme quimeltueneu ñi ayühunquechi serfinieafiel Jehová chem rupale rume.

Fütra calerumetui tayu mongen 2024 tripantu mu. Yeniefuyu doi 30 tripantu Betel mu, huelu huercüngeyu Okinawa mu tayu precursor especialngeal. Fei mu cüdauquei fentren militar, feimu amuldungulelquefiyu tañi pu familia engün. Tayu quimürpuel Betel mu, rume quellueyumu tayu hue elfal cüdau mu. Rume yafüluuqueyu ñi ngünamcanoal tiempo, femngechi tayu doyümafiel ti amuldungun cüdau. Chau Jehová ñi duam mu quimeltulelquefiyu Biblia quiñeque pu che, familia reque troquiniefiyu. Quimürpuyu ñi fente falin-ngen piuqueyecheal. Fill antü mañumniefiyu Chau Jehová tayu elueteuchi cüdau mu.

ELUUCÜLEN TAÑI PEPICANIEAETEU CHAU JEHOVÁ

Tañi familia petu conlai Jehová ñi troquiñche mu. Huelu chaftulaeneu engün. Ngüneduamün ñi femtripan Jesús ñi feipin. Quisu feipicünui inei rume elcünufile tañi pu che tañi inayaeteu, doi 100 rupa ta llohuai, quiñe fütra familia nierpuai (Marcos 10:29, 30). Fentren peñi ca lamngen huall mapu püle poyequeneu, familia reque troquiqueneu. Raquilayafun tañi fentren-ngen engün.

Petu nien ti lifru tañi elueteu Wilson. Pefiel mu ti lifru acordalelqueneu chumngechi cutranpiuqueyeneu Chau Jehová ca elueneu ñi quimafiel (1 Crón. 28:9). Eluucülen tañi pepicanieaeteu Chau Jehová, femngechi ñi doi cüme cüdahuelafiel ca ñi quelluafiel caquelu che ñi quimal ti rüf dungu.