¡Matuquechi cümelcautuaiñ!
¿YAFCAUCÜLEIMI CHI tami hueni eimu? ¿Chem huesa dungu femeimu tami hueni? ¿Afi tamu hueniyehun? Alüñmalayaimi tami nütramcameafiel tami hueni, femngechi tamu cümelcautual. Femülmi, quelluafimi ti trahunche ñi quiñeucüleal.a
Trürümafuiñ yafcahun ta trafolechi foro mu. Trafole tami foro, amuami doctor mu tami cüme tremotual. Femnolmi, doi cutranafui, doyelafui ca cüme tremotulayai.
Ca femngechi, yafcaucülelmi tami hueni eimu, matu cümelcautuaimu. Femnolmi, doi amuleafui tamu yafcahun, doi lladcütuniehuafuimu, fei fentepuhuafui tamu hueniyehun. Feimu Jesús feipi: “Matu cümelcautunge” (Mat. 5:25). Fei rüf piuque mu cüme dunguafimi tami hueni tamu cümelcautual. Tüfa cüdaungeafui, ¿chemu? Inaduamafiyiñ.
Quiñeque mu, huesa duamelafeimu nütramcayal feichi dungu mu tamu yafcahun, feimu chumquelaimi rume tami cüme elcünutual ti dungu.b Inaduamnge ñi rupan Evodia ca Síntique cuifi mu. Tüfachi 2 domo serfiquefui Jehová, huelu yafcahuingu. Rume alüñmai ñi yafcahun engu. Ti apostol Pablo quimürpui, ca mapu mülefulu rume Roma mu. Feimu ngülamtufi ñi cümelcautual engu (Filip. 4:2). Mülefui ñi ñom piuquengeal engu, cüme nütramcahual ca perdonahual, fei ñi huiño hueniyeutual engu.
Cafei, quiñeque mu, feipiafumi “iñche huelulcaulan, eimi mai ta huelulcahuimi” piafuimi chi. Huelu feichi raquiduam cümelai. Quintuquelaiñ inei tañi culpan, doi falin-ngei taiñ hueniyehun. Ca huiño trürümafuiñ tüfa ta quiñe doctor tremoltufilu trafolechi foro, com ramtucaquelafi chem ñi rupan. Doi mai, cüme cüdauquei ñi tremoltuafiel ti foro. Ca femngechi, nütramcaliyiñ taiñ hueni iñchiñ, quintulayaiñ inei tañi culpan. Doi mai falintuafiyiñ taiñ hueniyehun, cüme raquiduamaiñ chem taiñ femafel taiñ cüme hueniyeutual.
Biblia feipi: “Elcünulayaimün tañi rupayal ti antü tamün illculen” (Efes. 4:26). Yafcaucülelmi quiñe peñi cam lamngen eimu, fachantü nütramcameafuimi tamu cümelcautual. Femngechi, quelluntucuaimi ñi amuleal taiñ quiñeucülen ti trahunche mu (Efes. 4:1-3).
a Pichi yafcaucülele 2 che, mülei tañi quisu nütramcahual, fei ñi perdonahual engu (Mat. 5:23, 24). Doi fütra yafcaucülele engu, feipiafuingu pu loncolelu tañi quelluaeteu (Mat. 18:17). Huelu, petu ñi nütramcanoafiel pu loncolelu, ti che mülei ñi inayal ñi feipin Mateo 18:15,16.
b Quiñeque mu, huesa duamelafeiñmu taiñ hueni, huelu rulpacünuafuiñ müten tañi huesa femün. Duamfalngelayafui taiñ nütramcahual ñi amuleal taiñ cüme hueniyehun (Prov. 26:20).