31 AGOSTO–6 SEPTIEMBRE, 2026
ÜLCANTUN 89 Allcütufilmi ta Chau Dios, cümelcangeaimi
Ngüneduamaiñ chumngechi taiñ allcütuqueel
“Cüme allcütumün iñche tañi feipin” (LUC. 8:18).
¿CHEM QUIMAIÑ?
Chemu mülei taiñ cüme allcütuleal trahun mu ca chumngechi femafuiñ.
1, 2. 1) ¿Chumngechi quimeltuqueiñmu Chau Jehová? (Salmo 23:1, 2, 5). 2) ¿Chem inaduamaiñ tüfachi chillcatun mu?
CHAU JEHOVÁ eluniequeiñmu fentren cümeque quimeltun Biblia mu mülelu. David reque, feipiafuiñ: “Jehová iñche tañi Camañfe. Chem no rume faltalayan” (papeltunge Salmo 23:1, 2, 5).
2 Chau Jehová adcünui fillque trahun taiñ quimeltuaeteu. Quiñeque trahun mu allcütuafuiñ quiñeque dungu taiñ deu quimniefiel. Huelu cüme foliluucüleliyiñ tati rüf dungu mu, cafei duamnieiñ taiñ huiño allcütual Jehová ñi huercün dungu (2 Ped. 1:12). Eimi cai, allcütufiel mu quiñeque dungu tami deu quimniefiel, ¿cüdautuqueimi tami allcütuleal? Femngechi rupafuliyiñ, rume quelluaiñmu tüfachi chillcatun. Inaduamaiñ: ¿inei mu cüpai taiñ quimeltungeel trahun mu? ¿Chemu duamnieiñ taiñ cüme allcütual? Pu hueupife, ¿chumngechi quelluafeiñmu taiñ cüme allcütuleal? Ca, ¿chumafuiñ iñchiñ taiñ cüme loncontucual ti quimeltun trahun mu?
CHAU JEHOVÁ DUNGUMEQUEIÑMU REQUE
3. 1) Chau Jehová, ¿chumngechi dunguqueiñmu reque? 2) Jehová ñi pu che, ¿chumngechi quimeltuquei?
3 Biblia mu Chau Jehová dunguqueiñmu reque (2 Tim. 3:16, 17). Jesús quimniefui tüfa. Feimu adümuucülefui Chau Dios tañi Dungu tañi quimeltucheal. Fente ñi cüme femün, pu che feipiquefui: “Tüfachi huentru inei no rume quimeltulaeyu. ¿Chumngelu fente cüme quimniefi Chau Ngünechen ñi huirintucuel?” (Juan 7:15). Pu che cüme piuquengelu ayüquefui ñi allcütuafiel Jesús ñi chumngechi quimeltuel Chau Dios ñi Dungu. Cafei pu hunenque cristiano entuquefuingün tañi quimeltun Chau Dios tañi Dungu mu, fei tati pu che cüme adümqueingün Chau Jehová ñi ayüqueel, femngechi femquefui Pablo ca Apolos (Hech. 17:2, 3; 18:24, 28). Cafei iñchiñ, pu testigo, Biblia mu entuqueiñ com taiñ publicacion: fillque hueupin, JW Broadcasting® ca video. Fentren che hue amulu taiñ trahun mu afmatulehuequei com taiñ quimeltun ñi entungeel Biblia mu. Trahun mu, pu quimeltuquelu entuqueingün com tañi quimeltun Biblia mu, papeltuqueingün ñi feipin, doyelchi mai quimfalcünuqueingün chumngechi ñi inangeal tañi ngülam (Luc. 24:32).
4. Cuifi mu, ¿chem pilefui ti palabra allcütun?
4 Cuifi mu, huirintucungelu Biblia, ti palabra allcütun raquiduamelquefui pu che “ñi inayal tañi feipingeel”. Trahun mu, Chau Jehová dungumequeiñmu reque Biblia meu, fei doi cüme adümürpuqueiñ tañi ayüqueel. Femngechi, müte cüdautulaiñ taiñ inanieafiel. Chau Jehová rume ayüucülequei taiñ cüme allcütun mu ca taiñ inaniefiel tañi ngülam (Prov. 27:11).
¿CHEMU DUAMNIEIÑ TAIÑ CÜME ALLCÜTUAL?
5. Piuqueyefiliyiñ Chau Jehová, ¿chumaiñ? (Juan 4:23, 24; 1 Juan 5:3).
5 Piuqueyeniefiyiñ Chau Jehová, feimu allcütuqueiñ trahun mu (Mat. 22:37). Doi quimürpufiliyiñ ta Chau Jehová, doi piuqueyeafiyiñ. Feimu doi ayüqueiñ taiñ allcütuafiel, inaniequefiyiñ tañi feipin ca poyequefiyiñ chumngechi ñi ayüqueel (papeltunge Juan 4:23, 24; 1 Juan 5:3).
6. Chau Jehová, ¿chem quimeltuqueiñmu trahun mu?
6 Piuqueyeniefiyiñ pu che, feimu allcütuqueiñ trahun mu (Mat. 22:39). Chau Jehová quimeltuqueiñmu taiñ quelluafiel pu peñi, pu lamngen ca tati pu testigongenolu. Quiñe quellu fei tati folleto Piuqueyenquechi quimeltucheaiñ. Tüfa quimeltuqueiñmu chumngechi taiñ piuqueyecheal amuldungun mu. Eimi, ¿cüdautuqueimi tami cüme entual nütramcan? Cüdautulmi tami femal, loncontucuaimi ñi chumquen pu peñi ca pu lamngen coneltulu ti troquiñ “Cüme quimeltuchefengeaiñ”.
7. ¿Chemu duamnieiñ taiñ allcütuafiel Chau Jehová?
7 Ayünieiñ taiñ ayüucüleal, feimu allcütuqueiñ trahun mu. Cuifi mu, Chau Jehová feipifi tañi pu poyequeteu ñi inayafiel tañi feipin müten, fei ñi rüf ayüucüleal ca rumel mongeleal (Deut. 32:44-47). Cüme allcütuliyiñ trahun mu, doi nehuentuleaiñ acule hula ti hue mapu (Rom. 8:25). Epe puucülei Chau Dios ñi ngünenietual ti mapu. Feimu, taiñ montual taiñ mongen, duamnieiñ inanieal Chau Jehová tañi feipin ca cüdauconcüleal tañi troquiñche mu (Mat. 24:42-44; Apoc. 1:3).
CHUMNGECHI QUELLUAFUIMI TAMI PU ALLCÜTUAETEU
8. Pu peñi, ¿chemu mülei ñi doi cüme quimeltucheal?
8 Pu peñi quimeltuquelu trahun mu mülei ñi adümuhual tañi doi cüme quimeltucheal. Doyelchi mai mülei ñi femal pu hueupituquelu fin de semana mu. Cüme pepicale engün tañi hueupin Biblia mu, rume quelluafuingün tati pu che ñi doi quimürpuafiel ti rüf dungu ca quelluafuingün pu peñi ca pu lamngen ñi inanieal Biblia ñi ngülam. Pu quimeltuchequelu loncontucupe ñi falin-ngen chem tañi feipial trahun mu. Inaduamaiñ quiñeque ngülam taiñ doi cüme quimeltuchefengeal. Fei, elfalcünungeliyiñ quiñe hueupin cam nütramcan trahunche mu, com iñchiñ cüme ngüneduamaiñ chumngechi inayafuiñ tüfaquechi ngülam (2 Tim. 4:2; Tito 1:9).
9. ¿Chemu cüme adcünuaimi tami chem quimeltual?
9 Cüme adcünuaimi chem tami quimeltual. Com iñchiñ ayünieiñ ñi adümfalngeal chem taiñ feipimequen. Huelu cüme adcünunoliyiñ chem taiñ feipial, pu allcütulelu cañpüle amuafui ñi raquiduam. Fei, ¿chumafuiñ taiñ femngechi rupanoal? Cüla dungu: 1) conle tami hueupin, feipiaimi chem falinque dungu tami quimeltual. 2) Hune quimfalcünuaimi quiñe falin dungu müten. Deu tami quimeltufiel, feipiaimi cangelu falin dungu tami quimeltual. Ca femngechi femaimi caquelu falinque dungu inalelu. Duamfalngele, pichi pausacünuafuimi petu tami feipinon cangelu falin dungu. 3) Tami fentecünual tami hueupin, ca huiño feipiaimi tati falinque dungu tami quimeltuel.
10. ¿Chemu piuquentucuafimi chem tami quimeltual?
10 Piuquentucuafimi chem tami quimeltual. Tami piuque mu tucufilmi ti quimeltun, rume ayünieaimi tami nütramcayal feichi dungu mu. Femngechi tati pu che ngüneduamai tami ayühunquechi quimeltuquen (Prov. 2:4, 5; Hech. 4:20). Elcünulmi tiempo tami raquiduamal chem tami quimeltual, peaimi quiñeque dungu tami doi ayüfiel, fei piuquentucuafimi. Estados Unidos mu mülei quiñe peñi doi 70 tripantu nielu, huelu petu loncontucuniei quiñe hueupin tañi allcütuel rume huechengelu. Fei feipi: “Petu loncontucuniefiñ ti peñi taiñ ngülamtueteu cüme raquiduamal Biblia ñi feipin mu. Cüme quimeltui chumngechi taiñ femal. Quimfali ñi piuqueyeniefiel tañi feipin. Feichi hueupin rume falin-ngerpui iñche mu, rume quellueneu ñi chumngechi papeltual Biblia ca ñi doi cüme hueniyerpuafiel Chau Jehová”.
11. Tami hueupin mu, ¿chumngechi quelluafuimi tami pu allcütuqueteu? (1 Timoteo 4:13-16).
11 Raquiduamaimi chem duamniei pu che ñi allcütual ca cüme quimeltuaimi chumngechi ñi inangeal. Biblia mu entuaimi tami quimeltun, fei tami yafültucuafiel ca ngülamtuafiel pu allcütualu. Femngechi femi ti apostol Pablo, quimeltufi ta Timoteo chumngechi ñi hueniyenieafiel Chau Jehová petu ñi quellufiel Éfeso trahunche (papeltunge 1 Timoteo 4:13-16). Felei llemai, cüme raquiduamaimi chem quelluafui tami pu allcütuaeteu ca cüme quimfalcünuaimi chumngechi inayafuingün tami quimeltufiel.
12. ¿Chumngelu müna falin-ngei hueupial chumngechi tami nütramcaquen?
12 Nehuentu dungun meu adümcantufinge tami chem pial, femngechi hueupiaimi chumngechi tami nütramcaquen. Com huirintuculayaimi tami chem pial ca re papeltulayaimi tami hueupin, doi mai hueupiafuimi chumngechi tami nütramcaquen. Femngechi tati pu che doi cüme allcütuafui ca adümürpuafuingün. Tati folleto Eluwnge tami küme papeltual ka kimeltucheal feipi: “Chumngechi tami dunguquen, ca femngechi entuaimi tami hueupin, nütramcan cam amuldungun. Tami pu allcütuqueteu mülei ñi ngüneduamal tami duamtuquefiel engün ca tami feyentuquefiel ca falintuquefiel tami feipimequen”.a Feimu piuque mu entulmi tami hueupin, ayüfalngeai ca pu che inayafui tami feipin.
13. Pu hueupife, ¿chumngelu quintuafui ñi quellungeal? (Ca inaduamnge ti adentun).
13 Quelluafen feipiafuimi caquelu hueupife doi adümuucülelu. Pengelelafuimi tami hueupin, fei feipielmu tami doi cümecünutuafiel quiñeque dungu, inayafimi tami feipieteu. Cafei feipiafuimi: “¿Allcütuafen chumngechi tañi hueupial? Ca, feipien chem dungu doi cüme femafun”. Femngechi doi cüme quimeltuchefengeaimi (Prov. 1:5). Quiñeque mu ngüneduamquelaiñ rume chem dungu doi cüme femafuiñ. Feimu cümeafui taiñ feipiafiel cangelu che taiñ ngülamtuaeteu, femngechi ñi doi adümfalngeal taiñ hueupiquen ca doi cüme quelluafiel pu allcütulu. Ayünieiñ cüme hueupifengeal ca cüme quimeltuchefengeal, femngechi pu che loncontucuafui ca inayafui tati falinque dungu Biblia mu.b
Feipiafimi quiñe peñi doi adümuucülelu tami quelluaeteu doi cüme quimeltuchefengeal. (Inaduamnge parrafo 13).
¿CHEM QUELLUAIÑMU TAIÑ CÜME ALLCÜTUAL?
14. ¿Chemu inayentuafiyiñ ñi raquiduam tati huirintuculu ti Salmo 119? (Salmo 119:24, 111, 167).
14 Piuquentucuafiyiñ taiñ feipiqueteu Jehová, femngechi cüme allcütuleaiñ trahun mu. Famülque mu ‘mülei cüdaungechi dungu ca cuñihun-ngei ta mongen’, feimu doi duamnieiñ taiñ huiño allcütual Jehová tañi feipin (2 Tim. 3:1). Afeluucüleliyiñ taiñ deu allcütufiel fentren rupa quiñe quimeltun, inayentuafiyiñ ti huentru huirintuculu ti Salmo 119. Tüfachi huentru rume mañumcülefui Chau Jehová tañi huiño feipiqueteu ñi huercün dungu (papeltunge Salmo 119:24, 111, 167).
15. ¿Chem raquiduamaiñ taiñ falintunieafiel Chau Jehová ñi quimeltun?
15 Rume falin-ngei taiñ mañumcüleal Chau Jehová taiñ eluniequeteu quimeltun. Tüfa raquiduamelqueiñmu ñi rupan pu Israel che. Chau Jehová elueyu mana ñi mongeluhual, rume cümentufingün, fei rume mañumcülefuingün (Éx. 16:15, 31). Huelu, fill antü ifilu ti mana, afeluhuingün ca falintuhuelafingün (Núm. 21:5). ¿Chem quimeltueiñmu tüfa? Quiñeque mu, afeluhuafuiñ taiñ huiño feipingequen quiñeque quimeltun taiñ deu quimniefiel. Huelu mülei taiñ falintunieafiel, com ti quimeltun Chau Jehová mu cüpai. Ti Troquiñ Adniechequelu cüme raquiduamquei chem taiñ quimeltungeal trahun mu. Com tüfachi quimeltun quelluqueiñmu taiñ cüme miyahual, fei taiñ nierpual rumel mongen (Prov. 3:13, 16-18; Juan 17:3).
16. ¿Chumquei quiñeque peñi ca lamngen ñi cüme allcütuleal trahun mu? (Ca inaduamnge ti huichulechi dungu “Quiñeque ngülamtun taiñ doi cüme allcütuleal”).
16 Inayaiñ cüpalechi ngülam taiñ doi cüme allcütuleal trahun mu. Quiñeque peñi ca lamngen yenieingün fentren tripantu tañi testigongen, ¿chumqueingün ñi cüme allcütuleal? Ashley, yenielu 30 tripantu, feipi: “Cüme pepicaquen chem ñi ngüneduamngeal trahun mu. Femnoli, cüdautuquen ñi huiñoldungual trahun mu, cañpüle amuquei ñi raquiduam”. József, 52 tripantu yeniei ñi testigongen, feipi: “Rume ayüquen ñi huiño allcütual quiñeque quimeltun trahun mu. Caquerumei pu hueupiquelu ca pu comentaquelu, feimu quimtucuquen hueque dungu. Müte cüme hueupinolu ti peñi, iñche doi ngüneduamquen chem tañi feipin. Tüfa Biblia mu cüpai, feimu Chau Jehová quimeltumequei”.
17. ¿Ca chem chumafuimi tami cüme allcütuleal trahun mu? (Ca inaduamnge ti adentun).
17 ¿Ca chem femafuiñ taiñ cüme allcütuleal trahun mu? 1) Petu tami amunon trahun mu, rume fentren iyael ilayaimi. Femngechi tami cüpa umaunoal. 2) Temprano puhuaimi tami quintual cheu tami anüal. 3) Ñücüfcünuafimi tami electronico chemcün ca ngüneniehuaimi tami penoafiel caquelu dungu tami electronico chemcün mu. 4) Petu ñi connon ti hueupin, raquiduamafuimi chem ñi nütramcayal ti hueupife. 5) Lelinieafimi tati hueupimequelu, huall püle adquintulayaimi. 6) Huirintucuafuimi cam dibujayafuimi tati doi falinque quimeltun. 7) Inaduamaimi fillque texto Biblia mu ca raquiduamaimi chumngechi nüucüleingün. 8) Ramtuunge: “Tañi quimürpuel trahun mu, ¿chumngechi quelluafun quiñe peñi, lamngen cam pu che amuldungun mu?”. 9) Petu tami amunon fütra trahun mu, ngüneduamafuimi ñi quimelngeal caque antü, fillque hueupin ñi üi ca ti texto ñi nieel. 10) Conle ti trahun, ñücüfcülen anücünuhuaimi, allcütuaimi ti musica ca peaimi ti video ñi pengelngeal, femngechi tami piuque pepicaucüleai tami quimelelaeteu Jehová.
Tami electronico chemcün catrütuquilpe tami cüme allcütual Jehová ñi feipin. (Inaduamnge parrafo 17).
AMULEPE TAIÑ ALLCÜTUQUEFIEL JEHOVÁ
18. ¿Chemu mülei taiñ cüme allcütuleal trahun mu?
18 Mülei taiñ cüme allcütuleal trahun mu, femngechi Jehová adnieaiñmu taiñ cüme miyahual ti “nor rüpü meu” (Sal. 23:3; 31:3). Duamnieiñ Jehová taiñ ngülamtuaeteu taiñ cüme femal, femngechi miyaulayaiñ quiñe barco reque tañi huall püle yequeteu ti cürüf. Feimu ngüneduamuhuaiñ chumngechi taiñ allcütuqueel ca inayafiyiñ ti quimeltun taiñ mongen mu (Luc. 8:18). Femngechi allcütufiliyiñ Jehová, nieaiñ ayühun ca cüpalechi antü mu rumel mongen nieaiñ (Sal. 119:2, 14).
ÜLCANTUN 87 ¡Yafüluupange!
a Huecünungetui ti huirintucun.
b Tami doi cüme hueupial, peafimi ngülam ti folleto Eluwnge tami küme papeltual ka kimeltucheal ca ti lifru Benefíciese de la Escuela del Ministerio Teocrático.