Yafüluhuaiñ taiñ doi cüme quimeltuchefengeal

1. ¿Chem mülei taiñ cüme adümafiel? Ca, ¿chumngelu? (2 Timoteo 4:2; ca inaduamnge ti adentun).

JESÚS feipifi tañi pu inanieteu com quimeltuafimün ta che chem tañi huercüfiel, fei tañi inayaeteu (Mat. 28:19, 20). Feimu com iñchiñ mülei taiñ cüme quimeltuchefengeal. Chau Jehová ngüneduamquei chem che ayüniei ñi llohual ti rüf dungu. Ca tati pu cümeque püllü quelluntucuqueiñmu (Hech. 13:48; Juan 6:44; Apoc. 14:6). Huelu iñchiñ mülei taiñ quimal chumngechi cüme quimeltucheal. Raquiduamaiñ ñi femün ti apostol Pablo ca Bernabé. Fei conpulu engu pu judio ñi ngillatuhue ruca meu, “fente cüme nütramcalu engu, fentren judio ca Grecia che feyentuingün” (Hech. 14:1). Felei llemai, Pablo ca Bernabé cüme adümürpuingu chumngechi ñi cüme quimeltuchefengeal (papeltunge 2 Timoteo 4:2). Feimu com iñchiñ inayentuquefiyiñ, yafüluuqueiñ taiñ doi cüme quimeltucheal.

2. Quiñeque cüme quimeltuchefengelayan piqueingün, ¿chumngelu?

² Quiñeque feipiqueingün: “Cüme quimeltuchelayan, müte amulan escuela mu” cam “nielan adümuhun”. Feimu raquiduamafuingün ñi cüme pepilnofiel quimeltucheal. Biblia pengeli quiñeque huentru ca femngechi raquiduamingün (Éx. 4:10; Jer. 1:6). Ca trürümuule caquelu mu, quiñeque ngañhuadcüleafui nienon mu chillcatuquelu Biblia, fei cüme tripalai ñi amuldungun piqueingün. Cüdaungei peal ta che ayünielu ñi allcütual tati cümeque dungu. Feingelu rume, quisulelaiñ. Chau Jehová ca pu cümeque püllü quelluqueiñmu taiñ peal pu che cüme piuquengelu. Huelu, iñchiñ mülei taiñ cüme quimeltuafiel engün. Tüfachi chillcatun mu, ngüneduamaiñ 3 ngülam taiñ doi cüme quimeltuchefengeal.

DUAMTUAFIYIÑ PU CHE

3. ¿Chumngelu fentren che ayüquefui ñi allcütuafiel ta Jesús?

³ Biblia feipi Jesús ‘quimnieñmafi pu che ñi piuque’ (Juan 2:25). Tüfa feipilei Jesús ñi quimniefiel chem ñi raquiduamquen ca ñi chum duamcülen pu che. Feimu quimeltuquefui chem ñi duamnieel engün, femngechi puuquefui tañi piuque mu. Pu loncolechi religioso huesa duamelquefui pu che, fei Jesús ngüneduami ñi duamnieel engün ñi yafültucungeal (Mat. 9:36; 23:4). Feimu, hul-lu quiñe falin hueupin, Jesús quimeltufi ta che chumngechi cüme yenieal tañi mongen. Feimu fentren che ayüquefui ñi allcütuafiel.

4. ¿Chumngechi pengelafuiñ taiñ duamtuniefiel pu che? (Ca inaduamnge ti adentun).

⁴ Yafüluhuaiñ taiñ quimal chem raquiduamquei ta che, femngechi pengelelafiyiñ taiñ duamtufiel engün. Huecüfü ngüneniefi ti mapu, feimu com che rupaquei huesaque dungu mu. Loncontucufiliyiñ tüfa, doi eluucüleaiñ taiñ quelluafiel. Taiñ femal, cümeafui raquiduamal chem dungu rupaquei pu che tañi lof mu, chem allcütuqueingün noticia mu. Fentren chau raquiduamcülequeingün tañi pu pichiqueche ñi huesa rupayafel escuela mu ca fentren che nielaingün cüdau. Feimu raquiduamaiñ chum duamcülequei tati pu che nienolu ti maneluhun mülelu Biblia mu (Is. 65:13, 14; 2 Tim. 3:1).

5. ¿Chemu Jesús trürlai pu loncolechi religioso mu? (Mateo 11:28-30).

⁵ Pu loncolechi religioso doicülelu caquelu che mu troquiuquefuingün ca illamcaquefuingün pu che (Mat. 23:13; Juan 7:49). Huelu Jesús turpu trürlai fei engün mu. Doi mai, Jesús cümelcachequefui ca yamchequefui ca ñom piuquengefui, feimu doi cüme quimeltuchefengei (papeltunge Mateo 11:28-30). Feimu pu che quimniefui ñi rume piuqueyenieteu Jesús ca ñi falintuqueteu. Amuldungun mu iñchiñ, inayentuafiyiñ mai ta Jesús.

6. Huesa dungueliyiñmu pu che amuldungun mu, ¿chem quelluaiñmu taiñ cümelcayafiel engün?

⁶ Quiñeque che ayüquelai ñi allcütual Chau Dios ñi dungu ca chaftuquefingün. ¿Chem femafuiñ? Jesús feipieiñmu: “Cümelcanieafimün tamün pu üdequeteu. Cüme dunguyenieafimün tamün pu malisiaqueteu ca ngillatuñmanieafimün tamün pu lucatuqueteu” (Luc. 6:27, 28). Huesa dungueliyiñmu quiñeque che, ramtuhuafuiñ: “¿Huesaque dungu mu rupapelai chi?”. Raquiduamliyiñ tüfa, quelluaiñmu taiñ cümelcayafiel tati pu che. Quiñeque che caiñetuquefi tati cümeque dungu. Huelu, quiñeque mu puulu iñchiñ pu che tañi ruca mu, huesa dunguafeiñmu re tañi huesa duamcülen tañi pu che ñi duam mu cam caquelu dungu mu. Chem rume rupale, inayaiñ tüfachi ngülam: “Rumel ayüfalngepe tamün dungun, chadiñmalepe reque. Femngechi quimaimün chumngechi huiñoldunguafiel caque quiñeque che” (Col. 4:6). Duamtufiliyiñ ta che, quimaiñ chem huesa dungu mu tañi rupamequen caque quiñeque, fei doi cüme entuaiñ quimeltun taiñ feipiafiel.

BIBLIA MU ENTUAIÑ TAIÑ QUIMELTUN

7. Jesús, ¿cheu entuquefui ñi quimeltun? (Juan 7:14-16).

⁷ Jesús ñi antü mu, quiñeque quimeltuchefe entuquefui tañi feipin caquelu adümuhun che ñi raquiduam mu. Huelu Jesús quimeltuquefui Chau Dios ñi huirintucuel. Tañi feipin adümfalngefui, fei tati pu che cüme loncontucuquefui. Biblia feipi “pu che afmatulehuei” chumngechi ñi quimeltuchequen Jesús, “Chau Dios mu cüpalu cai tañi quimeltun. Huelu femngechi femquelai pu quimeltuquelu Moisés ñi ley dungu” (Mar. 1:22). Fei engün entuquefui ñi quimeltun caquelu quimeltufe ñi quimün meu müten. Jesús fentreñma mülerquefui huenu mu tañi Chau engu, feimu fentren quimün niefui. Huelu, feipiquelafui tüfa ñi afmatulafiel tañi pu allcütuqueteu, huesa duamelquelafui rume fente tañi quimchengen. Jesús quimeltuquelafui quisu tañi raquiduam, doi mai quimeltuchequefui Chau Dios ñi feipin (papeltunge Juan 7:14-16). Fei llemai, Jesús rume cüme quimeltueiñmu chumngechi quimeltucheal.

8. Pedro, ¿chumngechi inayentufi ta Jesús?

⁸ Pu discipulo inayentufingün Jesús ñi femün, Chau Dios tañi huirintucuel mu entuquefuingün ñi quimeltun. Inaduamaiñ Pedro ñi femün. Pedro müte nielafui pepicahun, huelu quimeltuquefui Chau Dios ñi huirintucuel. Ti Pentecostés 33 tripantu mu, Pedro quimeltufi ta che chumngechi ñi femtripan fentren dungu Jesús mu. Tañi quimeltun puhui fentren che tañi piuque mu (Hech. 2:14-37). ¿Chem rupai? “Tuchi cüme lloulu Pedro ñi feipin, fautizahuingün. Feichi antü 3.000 che quiñehuingün Jesús tañi pu inanieteu engün” (Hech. 2:41).

9. Biblia mu entuqueiñ taiñ quimeltun, ¿chumngelu?

⁹ Ñi feipin Biblia müten quelluafui ta che ñi cüme elcünutual tañi mongen (Heb. 4:12). Feimu Biblia mu entuqueiñ taiñ quimeltun. Ayünieiñ pu che ñi quimal “Chau Ngünechen ñi dungu”, iñchiñ taiñ raquiduam no (2 Tim. 4:2). Proverbios 2:6 feipi: “Jehová am hulquelu quimün; tañi hun meu cüpai adümuhun ca quim ngüneduamün”. Papeltulelfiel mu iñchiñ Biblia tati pu che, Chau Jehová mai dungumequefi reque (Mal. 2:7). Pengelquefiyiñ ta che ñi doicülen Chau Jehová tañi ngülam, chem che no rume trürlayafui fente cüme ngülam. Chau Dios adcünui ñi huirintucungeal ti Biblia, fei quimeltuqueiñmu chumafuiñ taiñ ayühulafiel taiñ Huenu Chau ca taiñ rüf ayüucüleal (2 Tim. 3:16, 17).

10. ¿Chumngechi quelluafuiñ ti che ñi quimürpual Biblia ñi feipilen?

¹⁰ Petu pepicauliyiñ chem taiñ quimeltual, raquiduamaiñ chem texto doi cümeafui ñi papeltungeal, femngechi pu che ñi quimürpual Biblia ñi feipilen. Pengelqueiñ fillque video ca adentun ñi doi cüme adümfalngeal ti quimeltun, huelu doi quelluquefiyiñ ta che ñi loncontucual Biblia ñi feipin. Petu taiñ quimeltufiel ti che, papeltuaiñ quiñeque texto doi cüme pengelquelu ti falin quimeltun. Fei hula, quelluafiyiñ quisu ñi raquiduamal chem tañi quimeltueteu feichi texto. Ca femngechi quelluafimi ñi quimtucual chem quimeltun mülelu Biblia mu pengelngequei fillque adentun ca video mu. Ngelai taiñ rume dungual ca duamfalngelai papeltual fillque texto. Doi cümeafui eluafiel tiempo ti che ñi cüme adümürpual chem pilei Biblia. Petu cüme adümnofile, ca huiño papeltuaiñ. Cüme inaliyiñ com tüfachi dungu, ti che inaduamai ti lifru, fillque video ca adentun, huelu rüf quimtucuai ñi estudiamequen ti Biblia (1 Cor. 2:13).

11, 12. 1) Quimeltucheliyiñ, ¿chumngechi pengelafuiñ paciencia? (Hechos 17:1-4; ca inaduamnge ti adentun). 2) ¿Chem duamnieingün ñi quimal quiñeque che Biblia mu? Ca, ¿chumngechi quelluafuiñ?

¹¹ Ti estudiamequelu cüdautuafui ñi adümürpual cam müte feyentulayafui quiñeque dungu. Fei, nieaiñ ta paciencia, inayaiñ ñi feipin Pablo, “ñom piuque mu” quimeltucheaiñ. Iñchiñ adümfemafuiñ quiñe dungu, huelu caquelu che doi duamnieafui tiempo ñi raquiduamafiel, fei ñi adümürpuafiel hula. Femngechi rupai pu Tesalónica che. Pablo fentren rupa mülefui ñi quelluafiel engün tañi loncontucual ñi chem pilen Chau Dios ñi huirintucuel (papeltunge Hechos 17:1-4).

¹² ¿Ca chem femafuiñ taiñ pengelelafiel paciencia? Eluafiyiñ tiempo ñi huiñoldungual ti ramtun, fei müte dungulayaiñ. Cüme allcütuafiyiñ, fei taiñ adümürpual chem ñi raquiduamquen ti che. Fei hula, ngüneduamaiñ quiñeque texto, fei taiñ quelluafiel ñi loncontucual Chau Dios ñi raquiduam. Quiñeque che turpu pequelafingün quiñe Biblia, feimu quimlaingün chem ñi feipin. Fei cümeafui yelelafiel quiñe Biblia ca pengelafuiñ ti folleto Kimaiñ chem dungu müley Ngünechen tañi Küme Dungu mew. Fei mu ngüneduamafuiñ fentren cümeque dungu ñi quimürpuafiel Biblia meu. Cafei quintuafuiñ ti ramtun 15 feichi folleto mu ñi papeltuafiel quiñeque texto, femngechi pengelafiyiñ chumngechi quelluafeiñmu Biblia taiñ ayüucüleal. Quimelfiliyiñ chumngechi ñi quelluaeteu Biblia ñi dungu, doi ayüafuingün ñi quimeltungeal.

QUELLUAFIYIÑ TA CHE ÑI QUIMAFIEL CHAU JEHOVÁ

13. Petu quimeltucheliyiñ, ¿inei ayünieiñ ñi cüme quimniengeal?

¹³ Ayünieiñ quelluafiel pu che ñi quimafiel ta Chau Jehová ca ñi hueniyeafiel (Sant. 4:8). Feimu quimeltufiliyiñ ta che, femquelaiñ taiñ afmatufalngeal, doi mai Chau Jehová ñi cüme quimniengeal.

14. ¿Chumaiñ taiñ quelluafiel pu estudiaquelu ñi ayühulafiel ta Chau Jehová?

¹⁴ Quimeltucheliyiñ, quelluafiyiñ ta che ñi piuqueyeafiel ta Chau Jehová, fei ñi ayühulafiel (Prov. 27:11). Re feipiquelaiñ chem ñi cümen ca chem ñi cümenon, fei ñi testigongerpual. Doi mai, ayünieiñ ñi norümtual tañi mongen engün, fei ñi ayühulafiel ta Chau Jehová. Huelu quiñeque cüdautuafuingün norümtual tañi femquen. Taiñ quelluafiel, ramtuafuiñ: “¿Chumngelu Chau Jehová üdeniefi tüfachi dungu tami femquen? Quimnielu rume tami ayüquefiel, ¿chumngelu Chau Jehová ayüniei tami fentecünuafiel? Ñi feipin Chau Jehová, ¿chumngechi pengeleimu tami piuqueyenieteu?”. Quellufiliyiñ pu che ñi raquiduamyenieafiel ta Chau Jehová, quimtucuaingün fente cüme Chau ñi niefiel engün. Femngechi piuqueyerpuafuingün ta Chau Jehová, ca tañi piuque mu ayünieaingün ñi ayühulafiel.

AMULEPE TAIÑ DOI CÜME QUIMELTUCHEAL

15. ¿Chumafuimi tami doi cüme quimeltucheal?

¹⁵ Llellipuafimi ta Chau Jehová tami quelluaeteu doi cüme quimeltuchefengerpual (1 Juan 5:14). Fei hula, yafüluhuaimi tami femal. Cüme allcütuaimi trahun mu, fei tami inayal fillque ngülam. Femngechi, Chau Jehová quelluaimu. Cafei, feipiafuimi quiñe quim peñi cam lamngen tami compañaeteu quimeltumeafiel Biblia quiñeque che, fei ramtuafuimi tami ngülamtuaeteu. Raquiduamnge tunte puuquei ñi quimün tati pu che tami quimeltufiel, ramtuhuafuimi: “¿Chem feipiafui chi tañi estudiante ngüneduamle tüfachi dungu?”. Petu tami quimeltufiel, quelluafimi ñi falintuafiel chumngechi tañi cümelcayafeteu ti quimeltun ca fentren cümeque dungu ñi feipicünuel Chau Jehová. Femülmi com tüfa, quelluntucuafimi tami estudiante ñi doi ayüucüleal ca ñi hueniyerpuafiel ta Chau Jehová (Sal. 1:1-3).

16. ¿Chumngelu yafüluuqueiñ taiñ doi cüme quimeltucheal?

¹⁶ Rume ayühulqueiñmu quimeltucheal Chau Jehová mu. Ca, huengetule ta mapu, doi fentren che duamnieai ñi quimeltungeal. Feimu, quimeltucheliyiñ, duamtucheaiñ, Biblia mu entuaiñ taiñ quimeltun ca quelluafiyiñ ta che ñi quimafiel ta Chau Jehová. Cüme femliyiñ com tüfa, cüme quimeltuchefengerpuaiñ.