“Quimlafiñ ta Jesús” pi Pedro

Feichi pun Jesús icünulu tañi pu apostol engün, feipifi: “Com eimün quisucünumuan”. Huelu Pedro feipieyu: “Iñche femlayan. Com engün quisucünuelmu rume, ¡iñche quisucünulayayu!”. Jesús feipifi: “Rüf feipicünuayu, tüfachi pun petu ñi cacaranon quiñe alca, 3 rupa ‘quimlafiñ’ piaimi”.

Jesús yengei Caifás tañi ruca mu, huelu epe com pu apostol deu lefmahuingün. Epu müten inaniefi ta Jesús caquelu che engün. Quiñe tüfa feita Pedro. Fei puhui Caifás ñi ruca mu ca huecuntu anücünuhui inaltu cütral mu ñi eñumtual. Alofcülefui ti cütral, fei quiñe domo pefi ta Pedro ca feipi: “¡Quimnieyu! ¡Eimi miyauqueimi Jesús engu!”.

Pedro feipi: “¿Chem pimequeimi? Iñche quimlafiñ”. Fei puerta mu amui. Huelu ca domo ca peeyu, fei feipifi tati pu che: “Tüfachi huentru miyauquei Jesús engu”. Pedro huiño feipi: “¡Quimlafiñ ta Jesús!”. Quiñe huentru ca feipieyu: “¡Inaniequefimi llemai! Jesús reque, Galilea dungun nieimi”. Pedro feipicünui: “¡Iñche quimlafiñ feichi huentru!”.

Feimeu müten cacarai quiñe alca. Pedro perumefi ñi adquintueteu Jesús, fei acordai tañi chem pieteu. Feimu huecuntu tripai ca rume ngümai.

Feichi pun, Caifás tañi ruca mu trahuluhui ti Sanedrín. Tüfa quiñe troquiñ huentru nielu autoridad ñi juzgayal pu judio. Ayüniefuingün ñi langümafiel ta Jesús, feimu raquiduammequefuingün chemu tañi culpantucuafiel. Huelu pelaingün chem no rume. Fei Caifás ramtueyu: “¿Eimi am ta Chau Dios ñi Fotüm?”. Jesús feipi: “Felei. Iñche tati”. Caifás feipi: “¡Tüfei! ¡Caiñetudungufi ta Chau Dios! Duamfalngelai ca dungu ñi culpantucungeal”. Tati Sanedrín feipi: “¡Mülei ñi langümngeal!”. Fei litraftucungei, tofcütungei, tacuñmangei ñi ange ca hulelcangei, fei feipingei: “Chau Dios ñi huerquen-ngelmi, feipimuiñ, ¿inei hulelcaeimu?”.

Hunlu, yefingün ta Jesús cheu ñi trahuluuquen ti Sanedrín, fei ca huiño ramtufingün: “¿Eimi am Chau Dios ñi Fotüm?”. Jesús feipi: “Felei. Iñche tati, chumngechi tamün feipimequen”. Feimu feipintucufingün tañi caiñetudungufiel ta Chau Dios ca yengei Poncio Pilato ñi ruca mu, tüfa gobernadorcülefui Roma mu. Fei, ¿ca chem rupai? Peafiyiñ.