Jesús presuntucungei

Jesús ca tañi pu discipulo rupaingün Cedrón rulu mapu meu, fei ñi puhual Olivo huincul mu. Alüpuni, apolefui cüyen mülefui. Puulu engün Getsemaní lelfün mu Jesús feipifi: “Esperaniemuan tüfa mu ca umautulayaimün”. Fei pichi püntütripai fei engün mu ca lucutunagi. Rumeñma hueñancülefui, fei llellipufi ta Chau Jehová: “Femngepe eimi tami ayünieel”. Feimeu Chau Jehová huercüleleyu quiñe cüme püllü ñi nehuentucuaeteu. Huiñotulu Jesús cheu ñi mülen 3 tañi pu apostol, pefi ñi umaucülen engün. “¡Trepemün!” pifi, “ngelai tamün umautual feula, hultucungean tañi pu caiñe mu”.

Petu dungumequelu Jesús, acui Judas ca fentren che yenielu fütraque cuchillo ca fütraque retrü. Judas amuquefui feichi lelfün mu Jesús ca pu apostol engün. Feimu cüme quimniefui cheu ñi peafiel Jesús. Judas feipifi pu soltau: “Iñche pengeleluhuaiñ ñi ineingen Jesús”. Feimu amufemi cheu ñi mülen Jesús ca feipifi: “Mari mari, quimeltufe”, fei truyufi. Jesús feipi: “Judas, ¿femngechi hultucuafen tañi pu caiñe mu?”.

Jesús püllecontufi ca ramtufi engün: “¿Inei am ta quintupefimün?”. “Jesús, tati Nazaret che” pingün. “Iñche tati” pi Jesús. Pu huentru huiño trecautuingün, fei traningün. Jesús ca quiñe rupa ramtufi engün: “¿Inei am ta quintupefimün?”. Fei ca huiño feipingün: “Jesús, tati Nazaret che”. Jesús feipi: “‘Iñche tati’ feipihuiyiñ, quintuyahulmuli ta iñche, elcünufimün tüfachi pu huentru ñi amutual”.

Ngüneduamlu Pedro chem ñi rupamequen, entui quiñe fütra cuchillo ca catrünentuñmafi ñi pilun ta Malco pingechi huentru cüdahuelquefilu ti hunen lonco sacerdote. Huelu Jesús fampuhuli ñi cuhu tañi pilun mu, fei tremoltufi. Jesús feipifi ta Pedro: “Guardacünunge tami espada. Pu quehuaquelu fütraque cuchillo mu, ca femngechi langümngeai”. Pu soltau presuntucufingün ta Jesús, fei trariñmafingün ñi cuhu. Pu apostol leftripaingün. Huelu Jesús yengei ñi ramtucadunguaeteu ti loncolechi sacerdote Anás. Fei hula, Jesús yengei cheu ñi mülen ti hunen lonco sacerdote Caifás. ¿Chem chumingün cai pu apostol? Peafiyiñ.