Afchi rupa Jesús ñi femün ti Pascua

Fill tripantu mu, 14 antü nisan cüyen mu, tati pu judio che fiestaquefuingün ti Pascua. Feichi fiesta mu nütramcaquefuingün chumngechi Chau Jehová lifrenentueteu Egipto mu ca ñi yeeteu tati feipicünuelchi mapu. Ti 33 tripantu mu, Jesús ca ñi pu apostol pepicafingün ti Pascua, quiñe ruca Jerusalén mu. Epe deulu ñi imequen engün, Jesús feipi: “Quiñe ta eimün hultucuaeneu tañi pu caiñe mu”. Pu apostol afmatulehueingün, fei ramtufingün: “¿Inei am?”. Jesús feipi: “Fei tati huentru iñche ñi eluafiel tüfachi cofque”. Feimu müten elufi ta Judas Iscariote quiñe triran cofque. Fei Judas huitrapürai ca amufemtui.

Fei hula, Jesús llellipui, hudamfi quiñe cofque, fei eluyefi pu apostol ca feipi: “Iyaimün tüfachi cofque, adentulei tañi cuerpo hultucungealu eimün tamün duam mu”. Fei hula, ca huiño llellipui, fei eluyefi quiñe copa pulcu tañi pu apostol. Ca feipi: “Pütocomün tüfachi pulcu, adentulei tañi mollfüñ, femngechi perdonangeai pu che tañi culpan, ca feipicünuhuaiñ: iñchiñ quiñentrür ngünenieaiñ huenu mu. Femqueaimün ta tüfa, femngechi acordamuan”. Feimu com pu che inaniequefilu Jesús femquei tüfa fill tripantu. Trahun Jesús tañi Lan ñi Acordangeal pingei.

Deu icünulu engün, pu apostol trafdunguhuingün, “iñche ta doicülen eimi mu” piquefuingün. Huelu Jesús feipieyu engün: “Doi hunencülelmün, doi inan-ngelu troquihuaimün”.

Jesús ca feipi: “Hueniyehuiyiñ, feimu feipihuiyiñ com tañi feipieteu tañi Chau. Pichiñma mu huiñotuan cheu ñi mülen tañi Chau huenu mu. Huelu eimün, fau mülenagaimün. Pu che ngüneduamai tamün piuqueyeuquen, femngechi quimaingün tamün inaniemufiel ta iñche. Hueluquentu piuqueyehuaimün chumngechi iñche piuqueyehuiyiñ”.

Ñi fentecünual, Jesús llellipufi ta Chau Jehová ñi cuidayafiel com tañi pu discipulo, ñi cüme feleal engün ca quiñeucülen mu cüdahual. Cafei, llellipui ñi cüme acordangeal Chau Jehová ñi üi. Fei hula, Jesús ca tañi pu apostol püramyefingün Chau Jehová ülcantun mu, fei amutuingün. Pichiñma mu presuntucungei ta Jesús.