Jesus tañi Ilelkawün: tukulpangekey ñi yamniengeal ta Ngünechen

TATI pu kristiano werküngekey ñi tukulpayal Kristo ñi lan, ka femngechi üytungekey ‘Jesus tañi Ilelkawün’ (1 Korintio 11:20). ¿Chumngelu müna falintufali tüfa? ¿Chumül am ka chumngechi am müley ñi femngeal?

Feychi pun, pu judioche ñi Paskua 33 tripantu taiñ mülen antü mu, Jesukristo elkünuy ñi femngeal tüfachi trawün. Ti Paskua kawiñmangekefuy kiñe rupa ti tripantu mu, 14 konchi antü Nisan judio küyen mu. Feychi Nisan küyen ellakonkefuy ñamkülechi küyen mu, dew rupalu ti wünen semana marzo küyen mu. Femngechi tati pu judioche rakikefuy 13 antü ñi pual ti Paskua, ellakonchi antü wüla.

Jesus kawiñmay tañi pu apostol engün ti Paskua, dew amutulu Juda Iskariote, fey wüla elkünuy ñi tukulpangeal Jesus tañi Ilelkawün. Tüfachi ilelkawün welukoni ti Paskua judio mu, feymu llemay müley ñi tukulpangeal kiñe rupa tripantu mu.

Matew pingechi Evangelio mew nütramyey chem ñi rupan: ‘Jesus nüy tañi kuwü mew ta kofke. Fey rupan mañumtufilu ta Ngünechen, wikefi ti kofke. Fey ka eluyefi tañi pu disipulo, feypilen mew: “Imün tüfa ta iñche tañi kuerpu”. Feymew müten ka nüy kiñe kopa tañi kuwü mew. Fey rupan mañumtufilu ta Ngünechen, fey eluyefi ta kidu engün, feypilen mew: “Kom eymün putumün ta tüfachi kopa mew. Fey tüfa iñche tañi mollfüñ ka müten, fey tüfa mew rüf dungu mew mupiay tati we eldungu. Fey tañi mollfüñ wütrulngealu ñi fürenengeael ta che femngechi ta Ngünechen ñi wiñoduamatuafiel ta che tañi kulpan mew”’ (Matew 26:26-28).

Kiñeke che trokikey tüfa: Jesus kofkekünufi tañi kuerpu ka pulkukünufi tañi mollfüñ. Welu wül-lu tüfachi kofke, Jesus petu mongelefuy wülmekelu. ¿Feypiafuiñ may Jesus ñi pu apostol ifingün tañi kuerpu ka putufingün tañi mollfüñ? ¡Femlay llemay! Femfule tüfa ilotuafuy reke ta che ka kiñepülekünungeafuy Ngünechen ñi ley dungu (Génesis 9:3, 4; Levítico 17:10). Luka 22:20 mu, Jesus feypi: “Tüfachi kopa ti we eldungu tati, legtripaley iñche ñi mollfüñ mew, tüfa ta wütrulael eymün tamün fürenengeael”. ¿Rüfngepey may tati kopa ‘ti we eldungukünungetun’? Tüfachi eldungu, kiñe chemkün reke trürlay tüfa.

Fey llemay, ti kofke ka ti pulku kiñe adentun müten tati. Ti kofke adentuley Kristo ñi kulpangenochi kuerpu. Jesus püney kiñe kofke sofralu Paskua ñi ilelkawün mu, tüfa fayümngelay lefawra mu no rume (Éxodo 12:8). Kiñeke mu, Biblia adentukünukefi ti kulpan ka welulkan ti lefawra mew. Femngechi ti kofke pengeli Jesus ñi chalintukun tañi kulpangenochi kuerpu (Matew 16:11, 12; 1 Korintio 5:6, 7; 1 Pedro 2:22; 1 Juan 2:1, 2).

Ti kurü pulku adentuley Jesus ñi mollfüñ, tüfa pengeli ñi falin ti we eldungu. Jesus feypi ñi wütrulal ñi mollfüñ fey ‘tukulpañmawelayafiñ kidu engün ñi kulpan’. Tüfa mu, kiñeke che lif mongen-ngetuy Jewba ñi adkiñ mew, ka koneltukeyngün Ngünechen ñi we eldungu mu (Ebrew 9:14; 10:16, 17). Tüfachi eldungu eluñmafi 144.000 manelfalchi kristiano ñi amual wenu mapu mu. Üye mu longko ülmen ka saserdotengeal ñi kümelkayafiel kom pu che (Génesis 22:18; Jeremías 31:31-33; 1 Pedro 2:9; Apokalipsi 5:9, 10; 14:1-3).

Ti pulku ka ti kofke pünengelu ñi tukulpangeam Jesus ñi lan, ¿iney engün am iyafuy ka putuafuy? Chumngechi ngüneduampeiñ, kom koneltulelu ti we eldungu mu müley ñi femal tüfa, feychi che maneluwkülelu ñi amual wenu mapu mu. Feymu Ngünechen ñi newen kellukeeyew ñi kimtukual engün ñi dullingen ta longko ülmen-ngeal wenu mapu mu (Romanu 8:16). Tüfachi pu che Jesus engün koneltuley ti eldungu Ngünenien mu (Luka 22:29).

Feymu, ¿chumkeyngün tati pu che ñi afnoachi mongen nieal kiñe küme mülewe Mapu mu? Jesus chumngechi tañi werkün, amukeyngün Jesus tañi Ilelkawün mu, ka koneltukenolu rume ti kofke ka pulku mew, pengelkeyngün yamün ñi trawüluwal mu. Tati pu Dungukelu Iney Ngen Jewba tukulpakeyngün Jesus tañi Ilelkawün kiñe rupa tripantu mu, dew ellakonchi antü llitulu 14 konchi Nisan küyen mu. Kom Mapu mu pichin che müten maneluwküleyngün ñi amual wenu mapu, welu kom pu kristiano müna falintukefingün tüfachi tukulpan. Tüfachi trawün eluñmakeeyew engün ñi ngüneduamal tunte ñi piwkeyenieetew Jewba ka Jesukristo (Juan 3:16).