Jesús trecai huente co mu

Jesús niefui nehuen ñi tremoltucheal, huiñomongeltuafiel ta che ca ngünenieafiel cürüf ca mahun. Quiñe rupa, Jesús llellipumequelu huincul mu, tañi pu discipulo farcu mu miyauquefuingün Galilea lafquen mu. Fei triparumei fütra cürüftucu mahun. Jesús adquintunagi ñi rupamequen, fei trecalen amui huente co mu ñi trafyemeafiel tañi pu discipulo. Ti cürüf chaftueyu engün, feimu nehuentu nengümmequefuingün tati remo ñi amulnieafiel ti farcu. Fei rume llicaingün pefilu ñi trecalen quiñe che huente co mu. Huelu Jesús feipi: “Iñche tati. Ngelai tamün llicayal”.

Pedro feipi: “Ñidol, eimingelmi, ‘cüpange’ feipien”. Fei, “¡cüpange fau!” pi Jesús. Feimu, petu cürüftucu mahunlu, Pedro trecai huente co mu ñi trafyemeafiel ta Jesús. Huelu, lelihulrumei ti fütra cürüf, feimu llicai ca epe ñamconfui co meu. Fei huirari: “¡Ñidol, montulen!”. Jesús nüfi ñi cuhu ta Pedro ca feipifi: “Müna pichi feyentuleimi, ¿chumngelu epu rume raquiduamcüleimi?”.

Jesús ca Pedro püratuingu farcu mu, fei tüngnagi ti cürüf. ¿Chum duamingün cai pu apostol farcu mu mülelu? Feipifingün: “Rüfcünu llemai, eimi Chau Dios ñi Fotüm ngeimi”.

Inaduamaiñ ca rupa Jesús ñi ngünefiel ti cürüf ca ti lafquen. Quiñentrür miyaulu Jesús ca tañi pu apostol farcu meu, Jesús umaunagi. Fei triparumei quiñe fütra cürüftucu mahun, fei ti co apolmequefui ti farcu. Feimu pu apostol nehuentu feipifingün ta Jesús: “¡Ñidol, layaiñ! ¡Quellumuiñ!”. Jesús huitrapürai ca nehuentu feipifi ti lafquen: “¡Fentecünunge! ¡Tüngnagnge!”. Feimeu müten, tüngnagtui ti lafquen ca ti cürüf. Jesús feipifi pu apostol: “¿Petu maneluuquelaimün Chau Dios mu?”. Fei pu apostol afmatulehuen feipingün: “¡Ti cürüf ca ti lafquen allcütuqueyu!”. Fei quimürpuingün tüfachi falin dungu: Jesús mu maneluucüleliyiñ com piuque mu, llicalayaiñ chem mu no rume.