Jesús tremoltuchei ürcütun antü mu

Pu fariseo üdefingün ta Jesús, ayüniefuingün ñi presuntucuafiel. Feipiquefuingün: “Jesús tremoltuquiyauquei pu che ürcütun antü mu, ngelai tañi femal, yamquelafi taiñ saquin antü”. Inaduamaiñ ñi femün Jesús pefilu quiñe trauma huentru ngillatuquelu plata ürcütun antü mu. Jesús feipifi tañi pu inanieteu: “Ngüneduamaimün, Chau Dios tañi nehuen quelluafi tüfachi huentru”. Fei tofcütui mapu meu ñi deumayal fotra, tuculelfi tati huentru tañi nge mu ca feipifi: “Cullumtumenge Siloam meu, cheu ñi ngülümngequen co”. Ti huentru com tañi mongen mu traumalefui, huelu femlu tañi feipingeel, pelotui.

Pu che afmatulehuei ca feipi: “Tüfachi huentru pediquefui plata, ¿felei no am?”. “Fei no tati” feipiquefui caquelu. Huelu ti huentru feipi: “Iñche tati”. Fei ramtungei: “¿Chumngechi pelotuimi?”. Feimu feipi chem tañi rupan ca yengei cheu ñi mülen pu fariseo.

Ti huentru feipifi pu fariseo: “Jesús tuculeneu fotra tañi nge mu ca feipieneu ‘cullumtumenge’. Femün, fei pelotun”. Quiñeque fariseo feipingün: “Jesús tremoltufi ürcütun antü mu, feimu Chau Dios mu cüpalai tañi nehuen”. Caquelu feipingün: “Huelu nienofule Chau Dios ñi nehuen, ¿chumngechi tremoltuafui pu che?”.

Pu fariseo mütrümfingün ti huentru ñi pu chau, fei ñi ramtuafiel chumngechi ñi pelotun. Pu fariseo deu feipicünuingün: “Inei rume feyentule Jesús mu, huemünentungeai ngillatuhue ruca mu”. Feimu, ti huentru ñi chau ca ñi ñuque llicaniefi pu fariseo ca feipifingün: “Quimlayu, quisu huiñoldungupe”. Fei engün doi ramtucafingün ti huentru, fei huiñoldungui: “¿Ca chem piafun cai? ¿Chumngelu fente ramtuen?”. Pu fariseo illcuingün, lladcüingün, feimu huemünentufingün.

Fei hula, Jesús pemefi ti huentru ca ramtufi: “¿Feyentuqueimi ti Mesías mu?”. Ti huentru feipi: “Quimlan ñi ineingen. Quimfuli, feyentuafun”. Jesús feipieyu: “Iñche tati”. Jesús müna cümelcafi feiti trauma huentru, ¿felei no am? Tremoltufi ca quellufi ñi nieal maneluhun.