Jesús dulli tañi pu apostol

Jesús doi quiñe tripantu yeniei ñi amuldungumequen, fei mülefui ñi cüme dullial inei engün loncolealu ti trahunche mu. Petu ñi dullinofiel engün, llellipufi ta Chau Jehová tañi quelluaeteu. Quisulen amui huincul mu ñi ngillatual com quiñe pun. Deu hunlu, trahulfi quiñeque tañi pu inanieteu fei dullifi 12 huentru ñi quiñentrür cüdahual, tüfa engün 12 apostol pingequei. ¿Quimimi cai inei pingeingün? Tüfa tañi üi engün: Pedro, Andrés, Santiago, Juan, Felipe, Bartolomé, Tomás, Mateo, Alfeo ñi fotüm Santiago pingelu, Tadeo, Simón ca Judas Iscariote.

Quiñentrür miyauquefuingün Jesús engün. Ñochiquechi Jesús quimeltufi chumngechi amuldungucheal, fei hula huercüfi quisu engün tañi femal. Cafei, Chau Jehová elufi nehuen engün ñi huemünentuafiel huesaque püllü ca tremoltuafiel tati pu che.

Jesús hueniyefi ti 12 apostol, maneluhui fei engün mu. Pu fariseo falin-ngenochi huentru troquifingün, quimchengenolu. Huelu Jesús femngechi troquilafi engün, cüme pepicafi tañi femal tañi elfal cüdau. Pu apostol compañfingün ta Jesús rupalu falin-ngechi dungu. Compañfingün petu ñi lanon, cafei pefingün huiñomongetulu. Jesús ca epe com tañi pu apostol Galilea mu tuhuingün. Quiñeque engün nieingün domo.

Pu apostol huelulcauquefuingün. Quiñeque mu huesa entuquefuingün tañi feipin ca huesa tripaquefui tañi femün, müte cüme raquiduamlafuingün tañi chumal. Yafcauquefuingün tañi doicülelu troquiuquen. Huelu cüme piuquengeingün, rume piuqueyeniefingün ta Chau Jehová. Huiñotulu Jesús huenu mu, fei engün amulniefingün ti cristiano trahunche.