Esdras quimeltui Chau Dios ñi ley

Epe com pu Israel che huiñotuingün ta Jerusalén, huelu rupalu rume 70 tripantu, petu mülehuei quiñeque Persia mapu mu. Quiñe ta tüfa fei tati sacerdote Esdras quimeltuquelu Chau Jehová tañi ley. Esdras feipingei pu Jerusalén che ñi inahuenofiel Chau Jehová tañi ley, feimu ayüfui ñi quellumeal. Ti lonco ülmen Persia mu, Artajerjes pingelu, feipi: “Chau Dios elueimu quimün tami quimeltucheal. Amuaimi. Ca, inei rume ayüle, compañafeimu”. Esdras trahulfi com pu che ayünielu ñi huiñotual ta Jerusalén. Llellipufingün Chau Jehová tañi cuñiutucuaeteu, fei amuingün.

Rupalu 4 cüyen, puhuingün ta Jerusalén. Pu principe feipifingün ta Esdras: “Pu Israel che inalaingün Chau Jehová ñi feipin, fei tañi pu domo poyeniefingün coilaque dios”. ¿Chumi cai Esdras? Lucutunagi pu che ñi adquiñ meu, fei llellipui: “Chau Jehová, eimi fütra fürenemuiñ, huelu iñchiñ culpaiñ”. Pu che nor raquiduamtuingün, huelu duamniefuingün ñi quellungeal tañi cüme elcünutual tañi mongen. Feimu Esdras dullifi quiñeque loncolelu ca quiñeque juez ñi cüme inaduamafiel ti dungu. Fei, rupalu 3 cüyen, quechafingün com pu che pinolu ñi poyeafiel ta Chau Jehová.

Inalechi 12 tripantu mu, huiño deumangetui Jerusalén ñi cura malal. Esdras trahulfi tati pu che ñi papeltulelafiel Chau Dios tañi ley, pu che huitrapürai. Fei Esdras püramyefi Chau Jehová ca pu Israel che huitrapüramingün ñi cuhu, famngechi “felepe mai” pingün. Fei hula, Esdras papeltui ca quimeltui ñi chem pilen ti ley. Com pu che cüme allcütuingün, fei ngümaingün raquiduamlu tañi püntühun engün Chau Jehová mu. Ca antü mu, Esdras amulei ñi papeltulelfiel engün tati ley. Fei pu Israel che quimtucuingün ñi femngeafel ti Fiesta ñi Müleal Llamasa mu. Feimu, müchai müten pepicafingün ti fiesta.

Ti fiesta 7 antü puhui, fei pu Israel che rume ayühuingün. Mañumfingün ta Chau Jehová tati cüme cosecha. Lalu Josué fantepu meu ngehuequelafui fente cüme Fiesta ñi Müleal Llamasa mu. Aflu tati fiesta, trahuluhuingün ñi llellipual: “Chau Jehová, eimi lifrecünumuiñ taiñ esclavongefel mu. Huellin mapu mu elumuiñ iyael. Cafei elumuiñ tachi cüme mapu. Huelu iñchiñ fentren rupa püntütripaiñ tami cüme rüpü mu. Eimi huercüfimi fentren huentru taiñ feipiaeteu, huelu allcütulafiyiñ. Femlu rume, loncontucuniefimi tami feipicünufiel ta Abrahán, nielmuiñ ta paciencia. Feula, feipicünuhuiyiñ tüfa: inayaiñ tami feipin”. Fei huiricünufingün tañi feipicünuel, ca pu principe, pu Leví che ca pu sacerdote firmacünufingün quiñe timbre mu.