Ester montulfi tañi pu che

Ti üllcha domo Ester judio tuhun-ngefui. Tañi pu cuifique che Jerusalén mu mülefuingün, huelu Nabucodonosor entufi engün. Feimu, Ester mülepai Susa huaria mu, Persia mapu mu mülelu. Tremümeyu tañi primo Mardoqueo cüdahuelquefilu ti lonco ülmen Asuero Persia mu.

Asuero ayüniefui ñi dullial ca quiñe domo ñi reinangeal. Feimu tañi pu cüdaufe yeleleyu engün pu doi cüme adngechi domo mülelu feichi mapu mu. Fei engün mu, Ester dullingei. Mardoqueo feipifi ta Ester: “Inei no rume feipilayafimi tami judio tuhun-ngen”.

Hamán rume mallma huentrungefui, loncolefui com pu principe mu. Hamán ayüniefui com pu che ñi pochongnagal tañi adquiñ mu. Huelu Mardoqueo femquelafui. Feimu Hamán ayüfui ñi langümafiel. Fei, quimürpulu tañi judio tuhun-ngen Mardoqueo, raquiduami chumngechi ñi langümngeal com pu judio. Hamán feipifi tati lonco ülmen: “Pu judio yamquelafingün ñi feipin ti lonco ülmen. Com mülei ñi langümngeal”. Asuero feipi: “Eimi quimnieimi chem tami femal”. Feimu Hamán feipi: “Entuan quiñe ley feipilelu: conle 13 conchi adar cüyen mu, pu che mülei ñi langümafiel com pu judio”. Fei Asuero feipi: “Femnge müten”. Huelu Chau Jehová com adquintuniei chem ñi femmequen.

Ester quimlafui ñi mülen tüfachi ley. Feimu Mardoqueo huercüleleyu chem ñi feipin ti ley ca feipieyu: “Mülei tami feipiafiel ti lonco ülmen”. Ester feipi: “Inei no rume mangelngenolu, pemefile ti rey, langümngeafui. Rupauyei 30 antü tañi mangelngenon iñche. Huelu amuan. Fampuhulelngeli ti retrü, mongetripayan. Huelu, femngenoli, langümngean”.

Ester pemefi ti lonco ülmen. Fei pengelu müten, ti lonco ülmen fampuhuli ñi retrü. Fülconpulu Ester, ti lonco ülmen ramtueyu: “¿Chem duamnieimi, Ester?”. Ester feipi: “Mangelpapeyu eimi ca Hamán taiñ quiñentrür iyal fentren cümeque iyael”. Trahuluulu engün, Ester ca huiño mangelfi ñi huiño quiñentrür iyal ca antü. Fei huiño trahuluulu engün, ti lonco ülmen ca ramtufi ta Ester: “¿Chem duamnieimi?”. Ester feipi: “Mülei quiñe che ayünielu taiñ langümaeteu iñche ca tañi pu che. Fürenemuiñ, quellumuiñ”. Asuero ramtui: “¿Inei cüpa langümeimu?”. Ester feipi: “Tüfachi huesa huentru, Hamán”. Feimeu müten, Asuero feipi ñi langümngeal ta Hamán.

Huelu ti ley ñi elcünuel Hamán pepi catrütungelai, ti lonco ülmen no rume pepi femlayafui. Feimu, Asuero loncocünufi ta Mardoqueo com pu principe mu ca feipifi ñi elcünual cangelu ley feipilu pu judio ñi incañpehual quehuatungele. Puulu 13 antü conchi adar cüyen mu, pu judio hueufingün tañi pu caiñe. Feimu fill tripantu, pu judio fiestañmaquei feichi antü.