Jerusalén ñi cura malal

Esdras ñi antü mu, mülefui quiñe Israel huentru, Nehemías pingefui. Cüdahuelquefui tati lonco ülmen Artajerjes, feimu mülefui Susa huaria, Persia mapu mu. Quiñe antü, Nehemías tañi peñi feipipaeyu: “Ti cura malal ca ti puerta ñi apümcafiel pu Babilonia hueichafe petu cüme elcünungetulai. Feimu rupayafuingün huesaque dungu mu pu Israel che”. Nehemías rume hueñancünagi. Feimu llellipufi ta Chau Dios ñi quelluaeteu tañi amual Jerusalén.

Quiñe rupa, ti lonco ülmen ngüneduami Nehemías ñi hueñancülen. Feipifi: “Cangentueyu, ¿chem rupamequeimi?”. Nehemías feipi: “Jerusalén, iñche tañi huaria, teifücalei, feimu llemai rume hueñancülen”. Ti lonco ülmen ramtueyu: “¿Chumngechi quelluafeyu?”. Feimeu müten Nehemías ñücüfcülen llellipufi ta Chau Jehová, fei huiñoldungufi ti lonco ülmen: “Füreneen, eluafen ñi amual Jerusalén tañi huiño deumangetual ti cura malal”. Artajerjes feipieyu: “Amunge müten, eluayu com tami duamnieel tami cüme puhual ta Jerusalén. Cafei gobernadorcünuayu Judá mu ca eluayu mamüll tami deumayal puerta”.

Nehemías puhui Jerusalén mu, fei pemefi ñi chumlen ti cura malal. Trahulfi pu sacerdote ca pu gobernadorcülelu ca feipifi: “Müna huesalcalei tüfa, mülei taiñ cüdahual”. Feimu ti pu che yafüluhuingün ca eluhuingün ñi deumangetual ti cura malal.

Huelu ca mülefui quiñeque caiñe ñi ayentueteu engün. Feipingün: “Rupale quiñe ngürü müten teifücayafui ti cura malal”. Huelu pu Israel che fentecünulaingün ti cüdau. Femngechi ti cura malal ñochiquechi doi alüpüralerpui.

Fentren caiñe fillque lof mu cüpalu acurumeingün Jerusalén mu ñi quehuayal. Quimtuculu tüfa pu Judá che, llicaingün. Feimu Nehemías feipifi: “Llicalayaimün, Chau Jehová mülei iñchiñ mu”. Ca elfalcünufi quiñeque huentru ñi cuñiutucuafiel pu cüdaufe. Femngechi pu caiñe chumlaingün rume.

Rupalu 52 antü müten, deumanentuingün ti cüdau. Nehemías cüpalfi pu Leví che Jerusalén mu, ñi fiestañmayal. Pepicacünui 2 troquiñ ülcantufe. Pu ülcantufe hualloñmafingün ti huaria huente cura malal mu. Esdras compañfi quiñe troquiñ ülcantufe, ca Nehemías compañfi cangelu troquiñ. Dungulfingün fillque instrumento ca ülcantulelfingün Chau Jehová, fei com trahuluhuingün Chau Jehová ñi ruca mu. Pu huentru, pu domo ca pu pichiqueche yelelfingün chalintucun Chau Jehová ca fiestañmaingün. Fente ñi ayüucülen engün camapu allcüngei ñi femmequen engün.