Daniel ca pu trapial

Quiñe hue lonco ülmen mületui Babilonia mu, Darío el Medo pingequefui. Darío ngüneduami ñi doi adümuucülen Daniel caquelu huentru mu. Feimu hunencünufi caquelu ülmenque huentru mu. Tüfachi pu huentru ütrirfingün ta Daniel, feimu lle cüpa langümfingün. Fill antü, Daniel llellipuquefui ta Chau Jehová 3 rupa mu, feimu feipifingün ta Darío: “Saquin lonco ülmen, cümeafui mülefule quiñe ley eimi müten tami llellipungeal. Inei rume inanofile feiti ley, ütrüftucungepe ti rüngan cheu ñi mülen pu trapial”. Darío cümelu troquifi ti ley, fei firmacünufi.

Daniel, quimlu ñi mülen tati ley, amutui tañi ruca mu. Fei, inafül quiñe nülalechi ventana mu, lucutunagi ca llellipufi ta Chau Jehová. Fei petu llellipumequelu, conpurumeingün pu huesaque huentru. Fei lefcülen feipimefingün ta Darío: “Daniel inalafi tami ley. Fill antü llellipuquefi tañi Dios 3 rupa mu”. Darío cüme che troquiquefui ta Daniel, ayülafui ñi langümngeal. Com antü raquiduami chumngechi ñi montulafiel, huelu pepi cambialayafui ti ley quisu ñi firmacünuel. Feimu feipi: “Müna huesha, chumafun cai, ütrüftucungepe cheu ñi mülen pu trapial”.

Fente ñi raquiduamtucuniefiel ta Daniel, Darío pepi umautulafui feichi pun. Ca antü, lefcülen pemefi ta Daniel ca nehuentu mütrümfi: “¡Daniel! ¿Montulpeimu mai tami Fütra Chau?”.

Darío allcüi ñi dungueteu Daniel, feipieyu: “Chau Jehová cerracünuñmafi ñi hun pu trapial, fei chumlaeneu rume”. ¡Müna ayüucületui Darío! Feimu feipi: “Entungetupe Daniel”. Quiñe allfeñ no rume nielai Daniel. Fei hula Darío feipi: “Ütrüftucungepe feichi pu huentru dalluntucufilu ta Daniel”. Ütrüftucungelu engün müten, pu trapial lümülümücünueyu engün.

Darío feipi: “Com pu che yamniepe Daniel tañi Dios, fei montuleyu pu trapial mu”.

¿Eimi cai? ¿Fill antü llellipuquefimi Chau Jehová, Daniel reque?