Ti hueichafe ca ti pichi malen

Mülerquefui quiñe pichi malen, Israel tuhun-ngelu. Huelu alü camapulefui tañi familia ca tañi ruca mu. Pu Siria che yefeyu ñi esclavangeal Naamán tañi ruca mu. Tüfa loncolefui pu hueichafe mu, tañi ruca mu inei no rume poyelafi ta Chau Jehová. Huelu ti pichi domo amulefui ñi poyequefiel.

Naamán huesa cutran niefui. Ti pichi domo cüpa quellueyu, fei feipifi Naamán tañi domo: “Eliseo tremoltuafui tami füta, ¡Chau Jehová tañi huerquen tati! Israel mapu mu mülei, fei tremoltuafui llemai tami füta”.

Ti domo feipifi ta Naamán chem ñi feipieteu ti pichi malen. Naamán chem rume femafui ñi tremotual, feimu amui Israel mapu mu, pemefi ta Eliseo. Naamán ayüfui ñi cüme lloungeal tañi ülmen chengen mu. Huelu Eliseo trafyemelafi, doi mai, huercüfi tañi cüdaufe ñi feipiafiel ta Naamán: “Amuaimi Jordán leufü mu ca 7 rupa ñamconaimi co mu tami tremotual”.

Naamán pilai ñi femal, doi mai lladcülen feipi: “‘Eliseo feipiafi tañi Dios ñi femal afmatun dungu tañi tremoltuaeteu’ pin. Huelu ‘amuaimi Jordán leufü mu’ pingen. Siria taiñ mapu mu doi cümeque leufü mülei tañi müñetumeal”. Fente ñi lladcülen, Naamán amufemtui.

Huelu Naamán ñi pu cüdaufe ramtueyu engün: “¿‘Chumafun rume tañi tremotual’ piquelaimi ama? Tami feipieteu Eliseo müte cüdaungelai tami femal, ¿femnoafulu am ta eimi?”. Naamán cümelu troquifi. Feimu amui Jordán leufü mu ca 7 rupa ñamconi co mu. Femlu müten, tremotui, rume ayüucületui. Feimu mañumtumefi ta Eliseo, feipifi: “Feula queta quimtucun ñi rüf Dios ngen ta Jehová”. Huiñotulu tañi ruca mu, ¿chum duamürquei ti pichi domo? ¿Chem pimi cai?