25-31 MAYO, 2026
ÜLCANTUN 135 Jehová feipieimu: “Quimchengeaimi hueche”
Quim ngüneduamülmi, fei cüme femaimi
“Tati quim ngüneduamfilu quiñe dungu cüme tripayai” (PROV. 16:20).
¿CHEM QUIMAIÑ?
Cüme raquiduamliyiñ, quelluqueiñmu taiñ cüme chaftuafiel cüdaungechi dungu.
1, 2. Quim ngüneduamliyiñ, ¿chumngechi quelluafeiñmu?
QUIÑEQUE mu, respetangenolu troquihuafuiñ chi. Ca quiñeque mu, huesa raquiduamafui pu che iñchiñ mu ca huesa duamelafeiñmu. Ca quiñeque mu, rupaqueiñ cüdaungechi dungu mu, fei llicalcaqueiñmu. Femngechi dungu mu rupaliyiñ, cüdautuafuiñ taiñ cüme femal. ¿Chem quelluafeiñmu? Biblia quelluqueiñmu taiñ quim ngüneduamal chem taiñ chumal.
2 Quim raquiduamliyiñ, re huenche ngüneduamlayafiyiñ müten ti dungu, doi mai quimaiñ chumngelu ñi rupaquen quiñeque dungu ca chemu quiñeque che femngechi femquei. Femliyiñ, cüme dulliaiñ taiñ chumal. Quim raquiduamliyiñ, quelluafeiñmu taiñ chem pial ca chumül taiñ ñücüfcüleal. Ca femngechi lladcüfemlayaiñ, perdonacheaiñ ca cüme llohuaiñ ngülamtungeliyiñ (Sal. 4:4; Prov. 10:19). Quim raquiduamün mu, taiñ feipin ca taiñ femquen mu ayühulquefiyiñ Jehová. Ca cümelcaqueiñmu iñchiñ ca caquelu pu che. Ca lladcürumeliyiñ, ngünehuaiñ taiñ huesa entunoal taiñ feipin. Peaiñ 3 nütram Biblia mu, fei pengelaiñmu quim ngüneduamliyiñ, ñom piuquengeaiñ, tüngcüleaiñ ca maneluhuaiñ Jehová mu (Prov. 19:20).
ÑOM PIUQUENGEAIÑ
3. ¿Inei fel ta Naamán?
3 Taiñ cüme yenial taiñ mongen, mülei taiñ ñom piuquengeal (1 Ped. 5:5). Quim raquiduamliyiñ, ¿chumngechi quelluafeiñmu taiñ ñom piuquengeal? Peafiyiñ ñi rupan ta Naamán. Naamán loncolefui pu Siria hueichafe mu. Siria püllelefui Israel mu. Naamán falin huentrungefui, huelu niefui quiñe huesa cutran, lepra pingelu (2 Rey. 5:1).
4. ¿Chumngechi pengeli Naamán tañi quim raquiduamün?
4 Quiñe pichi domo Israel tuhun-ngelu cüdahuelquefui Naamán tañi domo, fei feipifi ti domo Israel mu mülei quiñe profeta, tremoltuafui tami füta pifi (2 Rey. 5:2, 3). Naamán raquiduamafui chi: “Quiñe pichi domo müten tati, caiñeyequefiyiñ pu Israel che. ¿Quellupeafeneu mai tañi feipin?” piafui. Huelu Naamán cüme raquiduami, famentulafi tañi feipieteu ti pichi domo, doi mai ñom piuque mu llohui com tañi feipieteu. Feimu feipifi Siria ñi lonco ülmen ñi amual Israel mu tañi tremolngetual (2 Rey. 5:4, 5).
5. ¿Chem dungu rupai Naamán puulu Israel mapu mu?
5 Naamán puhui Israel mapu mu, amui tati rey Jehoram mu. ¿Rume ayüucülepelafui ca ayüniepelafui tañi tremotual? Huelu Jehoram raquiduami Naamán tañi huercüngen re tañi quehuayaeteu müten. Ti profeta Eliseo quimlu, feipifi tati rey ñi huercülelaeteu Naamán (2 Rey. 5:6-9). Huelu tati dungu tripalai chumngechi tañi raquiduamcülefel ta Naamán. Naamán puulu Eliseo tañi ruca mu, Eliseo tripalai rume tañi llohuaeteu. Doi mai, Eliseo huercüi quiñe huentru ñi feipiafiel ñi chumal tañi tremotual (2 Rey. 5:10).
6. 1) ¿Chemu chi Naamán ayülafi tañi feipieteu tati huerquen? 2) Naamán tañi pu cüdaufe, ¿chumngechi pengeli tañi quim raquiduamün engün? Fei, ¿chem rupai? (2 Reyes 5:13, 14).
6 Ellaca mu, Naamán cüme lloulai tañi feipieteu tati huerquen, feimu lladcünquechi amutui (2 Rey. 5:11, 12). ¿Chemu am? Quisu loncolefulu am pu Siria hueichafe mu, raquiduamcülefui chi tañi doi cüme lloungeal. Ca Eliseo tañi feipieteu mu tañi femal, Naamán illamcañmangelu tañi mapu troquihui chi. Chem raquiduamcülefule rume, Naamán eluucülefui tañi amutual müten tremolngenofule rume. Naamán tañi pu cüdaufe ngüneduamingün Eliseo tañi tremoltuafeteu, feimu feipifingün tañi cüme raquiduamal. Naamán famentufi tañi huesa raquiduam, fei inafi Eliseo tañi feipieteu ñom piuque mu, femngechi tremotui (papeltunge 2 Reyes 5:13, 14).
7. ¿Chem quimeltueiñmu ñi femün ta Naamán? (Proverbios 22:4; ca inaduamnge ti adentun).
7 ¿Chem quimeltueiñmu tüfachi nütram? Huenche ngüneduamfiliyiñ quiñe dungu, huelulcayafuiñ. Feimu rume falin-ngei taiñ cüme raquiduamal petu taiñ femnon chem dungu rume. Ca eluucüleaiñ taiñ cüme raquiduamal taiñ chumal chum duamcülefuliyiñ rume. Quim raquiduamliyiñ, quelluaiñmu taiñ ñom piuquengeal. Femliyiñ, com quimlu troquiulayaiñ. Doi mai duamnieiñ caquelu taiñ quelluaeteu, doi mai Jehová. Naamán quimnofilu rume ta Jehová, ñom piuque mu allcütufi tati pichi domo, allcütufi tañi pu cüdaufe ca femngechi allcütufi Eliseo, Jehová tañi huercüeteu. Naamán famentucünui tañi huesa raquiduam, femngechi cüme femi ca tremotui. Ca femngechi iñchiñ petu taiñ chumnon rume ca taiñ feipinon rume, pichi fentecünuaiñ ca raquiduamaiñ. Raquiduamnge tüfa: quiñeque mu ngülamtungeafuiñ Biblia mu, huelu müte ayülayafuiñ. Fei ramtuhuafuiñ: “¿Chumngechi lloudunguan? ¿Pengelan tañi ñom piuquengen cam tañi mallmangen?”. Ca femngechi dungu raquiduamaiñ cüme entendenofiliyiñ ñi feipin Jehová tañi troquiñche (papeltunge Proverbios 22:4).
Naamán reque femaiñ. Ñom piuque mu allcütuaiñ ngülamtungeliyiñ, nütramcangeliyiñ quiñe dungu cam llouliyiñ huercün dungu Chau Dios tañi troquiñche mu. (Inaduamnge parrafo 7).
ILLCUFEMLAYAIÑ, DOI MAI TÜNGCÜLEAIÑ
8. ¿Chem dungu mu doi cüdautuafuiñ taiñ tüngcüleal?
8 Com iñchiñ rupaqueiñ cüdaungechi dungu mu, fei lladcülcaqueiñmu. Huelu quim raquiduamliyiñ, quelluaiñmu taiñ tüngcüleal. Quiñeque mu cüdaungei llemai. Huesalcangeliyiñ ca huesa duamelngeliyiñ, doi cüdaungeafui taiñ tüngcüleal (Efes. 4:26). Peaiñ David ca Abigaíl chumngechi pengelingu ñi cüme raquiduamün rupan mu cüdaungechi dungu.
9. Nabal, ¿chumngechi troquifi David?
9 Raquiduamnge tüfachi dungu mu. David ca tañi pu huentru miyaufuingün ti huellin mapu mu Parán pingelu. Ellcauquiyauquefuingün Saúl tañi duam mu (1 Sam. 25:1). Feichi mapu mu, David ca tañi pu hueichafe cuñiutucuquefuingün tañi pu cüdaufe ca tañi pu ufisa quiñe ricu huentru Nabal pingelu (1 Sam. 25:15, 16). Rupachi antü mu, David huercüi quiñeque tañi pu huentru Nabal mu. Fei feipifalfi tañi cüme feleal ca yamquechi feipifi tañi eluaeteu iyael (1 Sam. 25:6-8). Huelu Nabal pichi mañumlai rume com tañi femün David ca tañi pu hueichafe, fei illamca dungufi ca huesa dungufi (1 Sam. 25:10, 11).
10. Abigaíl ca David, ¿chumngechi pengelingu tañi quim raquiduamün engu? (1 Samuel 25:32, 33; ca inaduamnge ti adentun).
10 ¿Chum duamafuimi David reque rupafulmi? David reque, ¿rume lladcüpelayafuimi? David fente tañi lladcütuniefiel Nabal, ayüfui tañi langümafiel (1 Sam. 25:13, 21, 22). David amulelu rüpü mu tañi langümafiel Nabal, quiñe domo tripapai. Abigaíl ürque, Nabal tañi domo, quiñe quim domo. ¿Chumngechi pengeli tañi quim raquiduamngen? David lladcülefulu rume, Abigaíl inaduami tañi cüme huentrungen. Feimu chumi rume tañi tüngduamelafiel. Elufi fentren regalo ca ñom piuque mu ngülamtufi (1 Sam. 25:18, 23-31). Ca femngechi David pengeli tañi quim raquiduamün. Allcütufi ta Abigaíl, ca inaduami Abigaíl ñi feipimequen Jehová tañi raquiduam. Fei David tüngnagi ca langümlafi ta Nabal (papeltunge 1 Samuel 25:32, 33).
David ca Abigaíl pengelingu cüme raquiduam mülen mu cüdaungechi dungu. Femngechi fentren che montui ñi langümngenoal. (Inaduamnge parrafo 10).
11. Quim raquiduamliyiñ, ¿chumngechi quelluafeiñmu lladcülen mu iñchiñ? (Proverbios 19:11).
11 ¿Chem quimeltueiñmu tüfachi nütram? Quim raquiduamliyiñ, quelluaiñmu taiñ tüngcüleal huesa femfuliyiñ rume. Ca raquiduamqueiñ fente taiñ huesa tripayal ngüneunoliyiñ taiñ lladcülen mu (papeltunge Proverbios 19:11). Abigaíl feipifilu David ñi chum duamelafiel Jehová tañi femün mu, fei tüngnagtui. Ca femngechi quiñe che cam quiñe dungu lladcülcaeliyiñmu, lladcünquechi lloudungufemlayafiyiñ (Sant. 1:19). Llellipuafiyiñ Jehová ca elcünuaiñ tiempo taiñ quimal chem raquiduamquei Jehová feichi dungu mu. Fei quelluaiñmu taiñ tüngcüleal.
12. ¿Chumngechi quelluafeiñmu caquelu taiñ quim raquiduamal ca tüngcüleal?
12 Jehová adniefi Abigaíl ñi quelluafiel David tañi cüme adümafiel ti dungu. Ca adnieafui taiñ pu peñi ca lamngen taiñ quelluaeteu iñchiñ fachantü. Feimu rupalmi quiñe cüdaungechi dungu tami illculcaeteu, quintuaimi quiñe quim cristiano tami quelluaeteu ñi ngüneduamafiel ti dungu Jehová reque (Prov. 12:15; 20:18). Ca quiñe tami hueni femngechi rupale, ¿inayentuafuimi Abigaíl? ¿Quelluafuimi tami hueni ñi raquiduamal Jehová reque? Jehová quelluaimu llemai tami cüme raquiduamelafiel tami hueni.
LLICALELIYIÑ, MANELUHUAIÑ JEHOVÁ MU
13. ¿Chem quelluafeiñmu llicaliyiñ?
13 Quiñeque mu, chaftuquefiyiñ quiñeque dungu taiñ llicalcaqueteu. Huelu raquiduamliyiñ Jehová ñi doi alüpüralen chem dungu meu rume, feita quelluaiñmu taiñ maneluhual fei meu (Sal. 27:1). Raquiduamfuliyiñ rume taiñ pepi chaftunoal ti dungu, huelu Jehová quelluafeiñmu. Femngechi rupai Jonás. Fei piuqueyefilu rume Jehová, llicai huercüngelu ñi femal quiñe cüdaungechi dungu.
14. ¿Chemu Jonás llicai tañi femal tañi elfal cüdau?
14 Jehová elfalcünufi Jonás ñi feipimeafiel pu Nínive che Jehová tañi apümcayaeteu, rume cüdaungefui llemai (Jon. 1:1, 2). ¿Chum duamafuimi feipingelmi ñi femal feichi dungu? Cüdaungefui, quiñe cüyen peno mülefui ñi trecalen amual ñi puhual Nínive mu. Jonás mülefui ñi ngüfetuafiel pu Asiria che, fei engün quimngefuingün tañi quehuafengen. Ca tati huaria quimngequefui tañi langümngequefel che (Nah. 3:1, 7). Jonás femlai tañi feipingeel, tañi llican mu lefmahui (Jon. 1:3).
15. Jonás, ¿chumngelu doi maneluhui Jehová mu? (Jonás 2:6-9).
15 Jonás pürai quiñe barco mu tañi lefmahual. Fei ütrüftucungelu lafquen meu, Jehová montulmaeyu ñi mongen afmatun dungu meu (Jon. 1:15, 17). Femngechi Jonás quimtucui ñi llicanoafiel pu Nínive che. Jehová am fentren nehuen nielu, cuñiutucuafeyu chem dungu meu rume (papeltunge Jonás 2:6-9). Jehová ca huiño huercüeyu Nínive mu, fei Jonás amui tañi huechunentual ñi cüdau, fei rume cüme tripai llemai (Jon. 3:5).
16. ¿Chem quelluafeiñmu llicaleliyiñ? (Proverbios 29:25; ca inaduamnge ti adentun).
16 ¿Chem quimeltueiñmu tüfachi nütram? Eluulayaiñ taiñ llicayafiel pu che ca chem no rume taiñ catrütuaeteu ñi poyeafiel Jehová (papeltunge Proverbios 29:25). Jonás ngüneduami tañi fente raquiduamnoafel chem tañi rupayal, doi mai Jehová tañi quelluaeteu. Ca femngechi iñchiñ ngüneduamliyiñ chumngechi Jehová quellueiñmu cuifi, famentuafuiñ taiñ llicalen. Ca raquiduamafuiñ Jehová ñi quellufiel taiñ pu peñi, pu lamngen rupan mu cüdaungechi dungu mu (Heb. 13:6).a Eluhuaiñ taiñ quim raquiduamal ca rüf maneluhual Jehová mu, ca quelluafiyiñ caquelu ñi ca femngechi femal.
Jonás quim maneluhurpui Jehová mu, femngechi huechunentui chem tañi huercüeteu Jehová. (Inaduamnge parrafo 16).
INAYENTUAFIYIÑ JEHOVÁ ÑI RAQUIDUAM
17. ¿Chem quelluaiñmu inayal Jehová tañi raquiduam?
17 Chumngechi taiñ pefiel, feiti cüme raquiduamün quelluaiñmu ñi cüme tripayal taiñ dungu cüdaungefule rume. ¿Chem quelluaiñmu taiñ doi cüme raquiduamal? Jehová doi cüme quelluaiñmu llemai. Feimu elueiñmu tati Biblia ca tañi nehuen (Neh. 9:20; Sal. 32:8). Biblia mu eluqueiñmu cümeque ngülam taiñ cüme dullial ca taiñ cüme ngünenieal taiñ piuque (Sal. 119:97-101). Feimu cüme raquiduamaiñ chem taiñ papeltuqueel Biblia mu ca llellipuafiyiñ Jehová taiñ eluaeteu ñi nehuen. Com tüfa quelluaiñmu taiñ inayal Jehová tañi raquiduam ca taiñ femal Jehová ñi ayüqueel (Prov. 21:11).
18. ¿Chem eluucüleimi tami femal?
18 Llellipunieafiyiñ Jehová taiñ eluaeteu doi quimün (Sal. 14:2). Femngechi femliyiñ, cüme dulliaiñ (Prov. 21:16). Eluucüleaiñ taiñ cüme raquiduamal chem dungu rume rupaliyiñ, femngechi ayühulafiyiñ Jehová.
ÜLCANTUN 42 Tati poyequefilu Jehová, ñi llellipun
a Peafuimi ñi rupan quiñe peñi Guéorgui Pórchulian pingelu. Conaimi JW Library® cam jw.org mu, ca quintunge ti troquiñ “Biografías de testigos de Jehová”.