IDODO USINI ENE EDOBE

Keke ore inyan̄a-ibot iba echi Pọọlu okpabe mkpọ ofolek me ikpa Ebi Galesia 4:24?

Eyi ikpabe mkpọ ofolek mgbaan̄je Ebereyam okaan̄be melek Sera mè Ega isan̄a, ogwu otuchieen̄ Pọọlu otutumu ibe: “Ǹsasa mfufuk yi ito kubọk urọk. Ebibaan̄ iba chi ekeke inyi inyan̄a-ibot iba.” (Gal 4:​22-24) Me mgbọ oraraka, eji egobo itet ibe ke inyan̄a-ibot iba chi ire ayaya inyan̄a-ibot mè inyan̄a-ibot Ikan kè Mosis. Ire, ike eji eyaka iwọlọ ere yi ikpọ igbaalek, eji minimun̄ ibe ke igbe ibe eji erọ unwene me lek ngobo-ntet kiji ofolek ere Baibul yi. Mokọt ire ibe ke Pọọlu ikikpa mkpọ ofolek inyan̄a-ibot Awaji orọbe melek Ebereyam, ikare ayaya inyan̄a-ibot. Kpọ-nu usini inu orọrọ Pọọlu otumube usem yi.a

Pọọlu isa Ega itọt me lek ogoon̄ Saina. (Gal 4:25) Ega ikeke ichit chieen̄ inyan̄a-ibot Ikan kè Mosis eyi enyibe me inyọn̄ ogoon̄ Saina me 1513 B.C.E. (Isis 19:​5, 6) Bak me lek ekasoge, kpunu ogwu Ju geege obokọt isun̄ ikan ya isan̄a. Eya orọ, ikan ya ikikeek ema ibe ke ema ire usun̄ inyi ijo inu, ke ema miweek si ogwu Mesaya ogwu Awaji obosa inyan̄a ema. Inyan̄a-ibot yi ira itap ubọk irọ si inyi ebi Ijeren ekọt eriọọn̄ ogwu Mesaya ya mgbọ inube, mije, ọmọ gaalek ore ogwu ebilene okọkọt isun̄ ikan ya isan̄a me oniin̄ ososo. Mgbọ ogwu Mesaya ya osabe ugwem kan̄ ososo igwa ngwugwa, irọ inyi ifet ibe ebilene ebi ekasoge ekaan̄ unyan̄a enan̄a me lek ijo inu mè mkpa. (Gal 3:​19, 24, 25) Eyi Jisọs orọbe nkeek Awaji isan̄a, Ikan kè Mosis ikayaka ikup ufiak.​—Rom 10:4.

Pọọlu ikpa esese okukup me lek Ega mè Sera, “ogwu enenwaan̄ ikarege usun̄, ogwu omaman gwun̄ “inan̄a me lek use” ge. (Gal 4:23) Use ya ire inyan̄a-ibot Awaji orọbe melek Ebereyam. (Gal 3:29; 4:​28, 30) Mitumu mkpọ ofolek inyan̄a-ibot yi me ikpa Ibebene 22:18 eyi obe: Ire inan̄a “me lek bọn owot iman kwun̄ ke otutuuk ido geelek me linyọn̄ ebekaan̄ ugbana, mije owu ogban̄be ida n̄a.”

Inyan̄a-ibot yi Awaji orọbe melek Ebereyam irọ ibe eriọọn̄ egbaalek mkpọ ofolek use Jioba ochieekbe me Iden. (Ibeb 3:15) Ikpa iwele ibe ke gwun̄ ebenbe me nriran ya ibonan̄a me owot iman kè Ebereyam. Pọọlu ikpa iwele ibe ke “gwun̄” ya ikeke ichit chieen̄ Jisọs mè ebi 144,000 ekenbe aran̄ ibegọọk ọmọ igbaan̄ ikpulu me Ama Ubọọn̄ kan̄. (Gal 3:​16, 29; Ichi 14:​1-3) Nrọ-nso use yi Awaji ochieekbe Ebereyam mosa owuwa ugbana ijet ebi ichechieek me lek Jisọs mè isiki ibot inyi ọmọ.

Keke ke Pọọlu okisa “urọk” yi ijeen̄ ni? Ikijeen̄ ibe ke ire ebi Ju ikup inye ikisiki ibot inyi Ikan kè Mosis, ke ema mebia me usun̄ kubọk Ega. Ire, ire ema ibọkọ okpan okpan gwun̄ kè Ebereyam, orere, Jisọs itap, ema kpebere ebi usun̄ ike Sera ikarege. Ema kpeyaka ikup me irak usun̄ ijo inu mè mkpa. (Jọn 8:​32-34) Ire ema kpebọkọ Jisọs itap, isibi ibe ke ema kpegobo itet ibot ibot inu orọrọ Jioba osan̄abe inyan̄a-ibot Ikan kè Mosis isibi, orere, ema kperiọọn̄ ibe ke ikan ya ikup kubọk ogwu obokijeen̄ ema inu mege ire mgbọ Karais monube.

Owuwa ebi Galesia ebi Pọọlu ogebe inu yi inyi kpere ebi Ju, ema si kpewuuk lek ikup me irak Ikan kè Mosis. Usini ebi Ju ikup me ntitiin̄ ya ekiweek ibe ebi ekarege ebi Ju ekesiki ibot enyi Ikan kè Mosis, ikerere ikan ofolek ifefieek afi. Pọọlu ikpa ibe ke kpunu oruru me lek ema ikakana “usun̄” inyi Ikan ya eyi irebe ibe ke ema mira ikakaan̄ “utelelek” mije ema ebọkọbe Karais itap.​—Gal 5:​1, 10-14.