Ntọbọ Ebum Inyi Jioba Mkpọ Oboso Akọp Acha Jaaba me Cuba

Nkeek mgbọ ugwem ofetbe iluluk me gwun̄ ama ya. Eji eluk iriaak lek usini ebi uwu kiji. Eji mikaan̄ inorie mè ikpoko okiso eji isasa iluk ugwem.

Mgbọ nkupbe mkpọ obet lek acha go, nga n̄a mè nte n̄a ebebene ikikween̄ mkpọ melek gwun̄ ute enerieen̄ ge ekigwen Walton Jones. Gwun̄ ute ya ire ogwu okisa me uyok uyok ejit ikilook ata etip. Ikije mkpọ obet lek akọp mbubak mgbọ ukot ukot inire ama kiji. Mgbọ geelek inube, owuwa ebi uwu kiji mikititiin̄ me uwu nte nte kiji, mè esa owuwa mbubak mgbọ ekegban̄ ikọ ikisa Baibul inyi ema. Nte n̄a mè nga n̄a melek ngwan̄ nte n̄a enerieen̄ ekigwen Pedro mè ngwan̄ nte n̄a enenwaan̄ ekigwen Ela mima inu ema ekikween̄, ema ekakaan̄ ntap-me-mun̄ me ikafiin̄ge mgbọ mè ikana Ebi Ata-Ikọ Jioba. Isik sọntiik Ela mosobe efit acha ge, ire, ikukup inye ikigbọ oniin̄ ojot mgbọ me Cuba.

Me mgbọ ya, ebi mkpulu me Cuba mitele ibe Ebi Ata-Ikọ Jioba ekelook ata etip mè ekesi nkween̄mkpọ ntitiin̄ kiban̄. Ebi ikup me Cuba miriọọn̄ ebi Ata-Ikọ Jioba ijaan̄ bak me lek ekilook ata etip Ama Ubọọn̄ inan̄a me uwu ire uwu. Eji mikikaan̄ owuwa ikpa eji ekinyi ema si. Eji mikije ije enenen! Nkima ikekeek mkpọ ofolek ikwaan̄ nsibe inyi Jioba me mgbọ nkupbe ijija, orere, “mgbọ òtatat.” Ire, ike mgbọ ojebe, “mgbọ ikatatge” onunu.​—2 Tim 4:2.

MGBỌ UFIALEK OBENEBE ME CUBA

Me mgbọ nkupbe mkpọ obet lek acha go, nte n̄a mè ngwan̄ nte n̄a ekọkọp uran̄ isi chinichini sekut me ofifi achọ. Ire mkpọ nsan ibe ke mgbọ ema ekọpbe uran̄ ya, ema ebeben orukan̄ inan̄a me lek okpa mun̄ ema enwọbe. Me mgbọ ema ekabe, ijeek ngwan̄ nte n̄a inwanwaan̄ isan̄a, ire, ikakwu. Ire nte n̄a, ogwu okup akọp acha ita mè iba gaalek okwu.

Eyi nte n̄a okwube iraka, nga n̄a obebe mè eji esi egọọk ogwu ngwan̄ enerieen̄ eluk me ama Lombillo. Eya isibi ibe ke eji metele ebi uwu nte kiji, kubọk nte nte n̄a mè nga nte n̄a, ebi eji emabe enenen. Ire, eji ekukup inye ikitọbọ ebum inyi Jioba kubọk ototun̄ ukan̄.

Me akọp usen iba mè gweregwen me Onyan̄ Jeeta me acha 1957, nkakaan̄ ntap-me-mun̄ me udọn̄ mun̄ erọkọbe iriaak lek ama Lombillo. Nkup akọp acha me mgbọ ya. Nkariọọn̄ ibe ke inu monwene inyi Ebi Ata-Ikọ Jioba ikup me Cuba sọnja mgbọ. Me acha 1959, enwenwene mkpulu eyi owuwuuk lek ikup, ofifi mkpulu okekikpulu, orere, mkpulu ebi communist.

Ebi ayaya mkpulu yi miweek ibe owuwa ene enin̄ akọn̄. Eyi irọ inyi ugwem iyọt inyi ebi eyi Jioba mije, ema kpekimọnọ agan̄ me lek rumurumun̄ mkpulu mè inu ofolek akọn̄ me ido geelek. Eji kpeyaka ikọt ikilook ata etip mè ikikaan̄ nkween̄mkpọ mè chinichini mgbọ geelek ike eji ewuukbe lek ikirọ. Ebi mkpulu etatap uyaka me lek ikwaan̄ ebi Ata-Ikọ Jioba, etatap si efit efit bọn ute me mkpọn. Usini kiban̄ ire ebi esulube mè ijit inyinyi inorie. Usini mgbọ, inorie ekinyi ema ikikakaan̄ eje me lek, inu eyi Baibul obe mè eji ekarie.

Me ekakpọge chieen̄ me lek rumurumun̄ chi, eji ekukup inye ikigbaan̄ ititiin̄ ikitọbọ ebum inyi Jioba. (Iburu 10:25) Eji mikikaan̄ chinichini me uko mè ofifi ofifi ere si. Nkeek mgbọ ge gwun̄ ute ge otelebe ibe eji esa ere ikikpukpo arọọn̄ kan̄ erọ chinichini. Eji kpekọt ituku ere ya itana mè iyaka ire isan̄a arọọn̄ cha sabum chinichini ya obenebe. Ikerere ikeya, eji mirọ chinichini ya melek ebi kè arọọn̄ cha mè ebi ene ebi ikup kubọk arọọn̄!​—Maika 2:12.

Eji michubọk inwọọn̄ unye ikwaan̄ ebi bọn ute erọbe isasa itap ubọk inyi eji ekaan̄ inorie emen ekwukwu me mgbọ cha. Kubọk inu ijeen̄, ekitumu orirọ chinichini itap me emen cassette mè eche ekana otutuuk ido ya. Usini mgbọ, bọn ute irieen̄ iba gaalek ke ekiria ibe eneen̄, enyi mè erọ rekọd otutuuk usem ebenyi me orirọ ya. Bak me lek bọn ute chi ekirọ rekọd usem cha me ere okup nlelet, eji ekinọ ida unọn okitaan̄ mè esese esese okput si. Ire ere chinichini ya ikakaan̄ ukan̄ electric, gwun̄ ute enerieen̄ ge mokiyak ukot bicycle enwaan̄be okwukwut me lek inyi ikimin ukan̄ electric eweekbe. Sa me ikeya, eji mekọt ikaan̄ ukan̄ isa ifit cassette ya mè inọ usem ebenyi me orirọ ya. Ikerere ibe ke eji kpekaan̄ ata irek mè otutuuk ikpa echi ebi bọn Nte kiji me ofifi ofifi ido ekisa irọ mkpọ, eji kpenan inorie emen ekwukwu. Eji michubọk inwọọn̄ igbagbaan̄ ikitọbọ ebum inyi Jioba.​—Neyem 8:10.

NWA N̄A MELEK N̄A MIKANA EBI IKIGBỌ ONIIN̄ OJOT MGBỌ MÈ UGA MÈ UTE SI

Mgbọ nrebe akọp mè acha jeeta, mbebene ikigbọ oniin̄ ojot mgbọ me ama Florida. Me mkpọ obet lek acha ge, erọrọ emi ogwu okigbọ oniin̄ osibi esese me uga ama Camagüey, ere ibot ama ge me Cuba. Ere ya ke mmun̄ gwun̄ ute enenwaan̄ ge ojajaan̄ uja onan̄a me Santiago de Cuba ekigwen Emilia. Eji ebebene ikikpọ mè ire eji mekọt ibat lek kiji, me ikasoge acha ge, eji ebabat.

Mbebene ikisi ikwaan̄ ojot mgbọ me ere ge me lek owuwa ere echi ebi mkpulu ekirom esikiri (sugar). Emi mè Emilia kpeyaka ikọt ikigbọ oniin̄ ojot mgbọ, ire, eji miweek ikekisa owuwa mgbọ kiji ikitap lek me lek owuwa inu emen ekwukwu. Nneen̄ ikekisi ikwaan̄ bene me ofuk mgbọ ita isi ire ofuk mgbọ akọp mè ge me ewelegwe me ere ekirom esikiri ya. Nkakima igwagwat lek inan̄a ikeke me ilaak, ire, nkisa irọrọ ikeya bak me lek ikwaan̄ n̄a ikinyi emi mgbọ ikọkọt ikilook ata etip mgbọ geelek mè isisi nkween̄mkpọ ntitiin̄ melek Emilia.

Me acha 1969, eji ekakaan̄ adasi gwun̄ kiji Gustavo. Me mgbọ ya, ebi bọn ute ikikpọ chieen̄ me lek ntitiin̄ me agan̄ ya etutumu ibe mè mbene ikwaan̄ ogwu sekut. Me mgbọ cha, ikifet imumun̄ ebi ikikpọ chieen̄ me lek sekut ikakaan̄ nsabọn me Cuba. Eji mikikaan̄ owuwa mkpọ eji ekirọ, ire, eji ekibebele ejit si. Emi mè Emilia mimun̄ ibe ke ire ugbana onan̄a me ubọk Jioba isisi ikwaan̄ inyi ebi bọn ute irieen̄ mè ibaan̄ me oniin̄ okup ikeyi. Ike mgbọ ojebe, eji ekakaan̄ nsabọn ita igbaalek si, ebirieen̄ iba, orere Obed mè Abner, mè enenwaan̄ ge, orere, Mahely.

Nsikikeek mkpọ ofolek acha eji ekupbe me ikwaan̄ sekut, ikibele emi ejit imumun̄ ubọk Jioba osabe igbana ebi eyi kan̄ me Cuba. Igbana si efuuk eji etapbe isasa itap ubọk inyi nsabọn kiji ema Jioba. Makpa-nu ubọk ugwem osabe ikup inyi emi mè Emilia mgbọ cha eji ekupbe me ikwaan̄ sekut.

IKWAAN̄ OGWU SEKUT ME MGBỌ ECHITBE IKWAAN̄ KIJI ME CUBA

Bak me lek echitbe ikwaan̄ kiji, isisi nkween̄mkpọ mè isisibi uko ikiyọt enenen me lek ebi bọn ute. Michit Uwu Ntitiin̄ mè irieen̄ bọn ute ebi inan̄a me ofifi ido ibe efo. Owuwa bọn ute irieen̄ ire ebi etetbe itap me mkpọn. Echichit ere otu agọọk ikwaan̄ kiji me Havana si.

Bak me lek echitbe ikwaan̄ kiji, eji ekisikpọ ntitiin̄ me ota nde gaalek. Eya orọ, eji ekisikpọ ntitiin̄ ge me ota nde iba. Eji ekimalek isa bicycle ikọp uran̄, eji kpekiben mkpọ iwa si, inyi chieen̄ ebi mkpulu mè iyaka ire ebi ofifi ife ikakup me lek kiji. Ekisun̄ inunu kiji me nlelet. Eji ekirọ ibe ebi ofifi ife ekeek ibe ke eji ekisi ikpọ ebi uwu kiji. Eya ifet irọrọ. Usini mgbọ, ikisik sọntiik eji mekiwuuk ibe ke eji enikpọ ntitiin̄ kubọk ogwu sekut, bak me lek ichubọk ikikup eji me lek kubọk eji enikpọ ebi ototun̄ ukan̄ kiji. (Mak 10:​29, 30) Ire, eji michubọk ikikup me ugbalachieen̄. Owuwa mgbọ, ebi police mikigọọk eji mè ikido eji idodo. Bọn ute ebi eji ekikup me uwu kiban̄ ekitap ugwem kiban̄ me ufe mije, ire eweek iriọọn̄ ebi eji erebe, mekọt itet ema.​—Rom 16:4.

Me mgbọ ya, owuwa bọn ute irieen̄ mè ibaan̄ ebi kpekaan̄ owuwa ikpoko mikichili ubọk inyi eji mkpọ. Mkpuk ikiwa me usini ere, ire, bọn ute chi mesa mkpọ ekisa ichit lek (uwu mkpuk) ge gaalek ema ekaan̄be ijet eji inyi mkpuk ikataka eji, mè eji ekọt elaak ejaan̄ me eririeen̄. Usini kiban̄ miweek ibe eji egọọk ema ekup, ikerere ibe ke ema kpekaan̄ owuwa inorie. Bak me lek eji eriọọn̄be eyi, eji ekekiche usini me lek inorie eji esabe inu inyi ebi eji egọọkbe ikup.

Eji kpekikọt isa otutuuk nsabọn kiji igbaalek isi ikpọ ntitiin̄. Eya orọ, eji mesa gwun̄ ge gaalek isi, mè itele ebilọ me uwu inyi nga n̄a mè ngwan̄ n̄a enenwaan̄ ibe ekpọ chieen̄ me lek. Me atikọ, ikekisa sọntiik gwun̄ ikọp uran̄ ikibem eji. Usini mgbọ, ebi police mikikpọk akpa kiji, ire, eji mira ilet ikpa kiji me emen akpa ekwut anaan̄ gwun̄​—eyi ebi police kpekpọk.

Nchubọk inwọon̄ enenen otutuuk inu Emilia orọbe isasa ikpọ chieen̄ me lek nsabọn kiji mè ibieen̄ emi inye me ikwaan̄ ojot mgbọ kiji me acha chi. Nkọt isi ikwaan̄ me ere ekirom esikiri ike nkirọ ikwaan̄ sekut si. Ike owa ni? Usini mgbọ, nkisi ikwaan̄ igbaalek me usen ge mè iyaka ire usen iba me nde inyi nkasi ikwaan̄ me ota nde cha. Ike mgbọ ojebe, ikwaan̄ n̄a me ere ya onwenwene. Nkakana ogwu okikpọ chieen̄ me lek urum ebi melek n̄a ekisi ikwaan̄, eneneen̄ ibe nkensi ikwaan̄ nso usen jaaba me nde. Nkakọt ijit onineen̄ yi. Ire, ire nnyi ebi melek n̄a owuwa ikwaan̄ ebesi me ota nde, ema kpetumu inyi ene geege ibe ke nsi ikpọ ntitiin̄. Ebi ibot ikwaan̄ n̄a kperiọọn̄ mgbọ geege ibe ke nkakinu ikwaan̄ me ota nde cha!

NKUP INYE IKIKAAN̄ UNWỌỌN̄ ME MGBỌ MKPỌ ONWENEBE

Usen ge me 1994, bọn ute ebi ikikpọ chieen̄ me lek ikwaan̄ kiji me Cuba etutumu ibe mè otutuuk akọp ebi sekut jeeta etitiin̄ me chinichini osibi esese ge erọbe me Havana. Ire mkpọ unwọọn̄ inyi eji igbagbaan̄ ititiin̄ mè ikpọkpọk imun̄ ebi eji ekakọtge imun̄ me otutuuk acha chi oraraka! Me chinichini ya, edasi itumu mkpọ ofolek usini unwene erọbe me ntitiin̄ kiji. Eneninyi ulook ge okeke eji chieen̄. Ebi bọn ute cha etumu inyi eji ibe ke ema ekitọt isasa erieen̄ kiji inyi ebi mkpulu! Keke orọ ema ekiweek irọrọ ikeya ni?

Ema etumu ibe ke ema ekichichini melek ebi mkpulu mè ikisa irọrọ ibe mgbaan̄je ebi mkpulu melek Ebi Ata-Ikọ Jioba inwọn. Ebi mkpulu etutumu ibe enyi ema erieen̄ otutuuk ebi sekut. Eji echechieek ibe ema enyi ebi mkpulu otutuuk erieen̄ kiji. Bene me mgbọ ya, eji ebebene ikigọọk ebi mkpulu ikpa usem eyi osasan̄a ata oruru isibi.

Ike mgbọ ojebe, eji mikọt iyaka ibene ikilook ata etip mè ikisi nkween̄mkpọ ikerere ibe ke ebi mkpulu kperiọọn̄ eji kubọk uwu uriaak. Eji miyaka iweek iriọọn̄ ibe ke ebi mkpulu miriọọn̄ erieen̄ usini ebi sekut, ire, ema ekpọkpọk iweek ibe eji esa otu kiji etumu enyi ema si.

Me Onyan̄ Onaan̄ge me acha 1994, ebi mkpulu enyinyi eji unye ikpọkpọk ichili otu agọọk ikwaan̄ kiji. Eji mikọt isa uwu yaage echitbe akọp acha iba oraraka ibene ikwaan̄.

Me acha 1996, egwegwen emi mè Emilia ibe eji enesi ikwaan̄ me Bethel. Ike emi chieen̄ enenen, ntutumu inyi ebi bọn ute cha ibe ke nkaan̄ nsabọn iba ebi ikigọọk emi iluk. Ire, ebi bọn ute cha ewọwọlọ irek n̄a ikpọ mè itumu ibe ke ema miweek si ibe eji enesi ikwaan̄ me Bethel. Eji ebọbọkọ ogwen ya itap mè ibene ikitọt isasa ebi ototun̄ ukan̄ kiji isi Havana.

Me atikọ, nkanwọọn̄ ikwaan̄ n̄a me mgbọ mbenebe ikisi ikwaan̄ me Bethel. Nsa ogbogbo acha isi ikwaan̄ kubọk ogwu sekut mè ininwọọn̄ ikwaan̄ ya enenen. Nkakeek ibe ke ikwaan̄ nkisi me Bethel ikikaan̄ oruru inyi ebi bọn ute. Ire, ebi bọn ute ikisi ikwaan̄ me Bethel, mè ogakge, nwa n̄a Emilia, mitap ubọk inyi emi nkọt nnwene ubọk nkimun̄ mkpọ. Ike mgbọ okije, mbebene ikinwọọn̄ isisi ikwaan̄ me Bethel.

Emi mè Emilia kpeyaka ikaan̄ unye, ire, eji mima ikekeek mkpọ ofolek otutuuk bọn ute irieen̄ mè ibaan̄ ebi eji eriọọn̄be mè igọọk isi ikwaan̄ me acha chi oraraka. Eji michubọk ibele ejit imumun̄ nsabọn kiji mè bọn bọn kiji ekitọbọ ebum inyi Jioba. Eji ekaan̄ mbet lek unwọọn̄ yaage ogwu otuchieen̄ Jọn okaan̄be me mgbọ itumube ibe: “Inu òkibele emi ejit ichit ìre ikekinọ ibe ke nsabọn n̄a me emen ichechieek mêkiluk ugwem me emen atikọ eyi Awaji.”​—3 Jọn 4.

Mgbọ keyi eyi eji esibe ikwaan̄ me Bethel me mkpọ oboso akọp acha ita, emi mè Emilia ekirọ mkpọ eji ebekọt irọ me ikwaan̄ kiji, ikerere ibe ke eji mikirurumun̄ me lek orukan̄ mè acha ukan. Me oke acha chi eji ekitọbọ ebum inyi Jioba, eji mikaan̄ usini rumurumun̄, ire, eji minwọọn̄ itọtọbọ ebum inyi Awaji ogwu okibele ejit me mkpọ obet lek akọp acha jaaba me achọ Cuba!​—1 Tim 1:11; Itọn̄ 97:1.