Esese Njin Ebi Ene Ekisa Itet Irin̄ me Mgbọ Baibul

Usini ebi udun̄ kè Jisọs ire ebi ikisi mbọm irin̄. (Mak 1:​16-20) Ema ekisa njin itet irin̄ me okwaan̄ Galili.

Ekisa eri mè iyaka ire olik ilọk njin mè erọ inyi ikaan̄ esese chieen̄. Ire ogwu mbọm irin̄ ikiweek itetet asabọn irin̄, mosa njin okakaan̄ sọntiik chieen̄ isi mbọm. Ire, ire ikiweek itetet irin̄ omimin, mosa njin eyi chieen̄ ominbe isi mbọm. Njin echi asabon ikikaan oporolu mè iyaka ire asabọn ewuuk echi okirọ ibe igen ifo ijọn̄ inyi ikọt itet irin̄. Ire, ekitataba njin echi omimiin̄ isa itet irin̄. Njin chi ikikaan̄ mkpọ ololobo me agan̄ ebon echi okirọ ibe egen efo ijọn̄ mè ekpirikpo mè iyaka ire mkpọ echi okirọ ibe ekewolo me agan̄ inyọn̄.

Njin irin̄ ikinye ewe enenen. Ewuuk echi okup me irak mun̄ mè ulobo irin̄ oninin̄ emen njin mokọt igwak njin. (Luk 5:6) Baibul itumu ibe ke Jemis mè Jọn ‘ekinama njin kiban̄’​—mokọt ire ibe ke ema ekisa alaga mè eri irọ eyi. (Mat 4:21) Mokọt ire ibe ke ebi mbọm irin̄ ekinen̄e njin kiban̄ isun̄ mgbọ geelek ema ekabe mbọm. Luk ikpa si ibe ke ebi mbọm irin̄ mikigwọk njin kiban̄ inyi esan̄a ibat mè okpa geelek okup me lek. (Luk 5:2) Ema esigwọk njin cha isan̄a, meneniwele ibe ichat​—mokọt ire bak me lek kpeweek ibe ifiat ke ekirọ ikeya.​—Ijik 47:10.

Jisọs igwen ebi ikibọm mbọm irin̄ ibe enekana “ebi ìkibọm mbọm itet-ene.”