Jisọs Igwa Ene me Usen Mbuban

Ebi Farisi micha Jisọs. Mije keya, ekekiweek mkpọ ebesa itet ọmọ. Ema ebe mè ikagwa orukan̄ geege me usen mbuban. Me usen mbuban ge, Jisọs imun̄ ogwu enerieen̄ nchit chieen̄ ge okibeek mkpọ me lek oniin̄. Itutumu inyi ebi udun̄ kan̄ ibe: ‘Ikpọ-nu ubọk Awaji obosa unye kan̄ itap ubọk inyi ogwu enerieen̄ yi.’ Jisọs ogọgọkọ ataak igwook me ijọn̄ mè ifuku ataak ya melek ntitaak inyi ikup ibat ibat mè ikọbọ isa ichiọọk me chieen̄ ogwu enerieen̄ ya. Jisọs otutumu inyi ogwu enerieen̄ ya ibe: ‘Je si gwọk isi kwun̄ me emen udọn̄ mun̄ ekigwen Silowam.’ Ogwu enerieen̄ ya orọrọ ike Jisọs otumube, mè ibene ikimọọn̄ inu, mkpọ ikakọtbe irọ karake emanbe ogọt.

Eyi ike ebi ene chieen̄ enenen. Ema ekekibe: ‘Ire ikare ogwu enerieen̄ okikup me agba oniin̄ ikibeek inu ya ire ogwu sa ire ogwu obebet lek kan̄ ni?’ Ogwu enerieen̄ ya ofọfọọk ibe: ‘Emi ire nchit chieen̄ karake emanbe emi.’ Ife cha ekekido ọmọ ibe: ‘Ire chieen̄ kwun̄ ijeje ichili?’ Mgbọ itumube ubọk chieen̄ kan̄ osabe ichili, ema esasa ogọt isi lek ebi Farisi.

Ogwu enerieen̄ ya otutumu inyi ebi Farisi ibe: ‘Jisọs ichiọọk ataak ifukube melek ntitaak me chieen̄ n̄a mè ibe mè nsi ngwọk isi n̄a. Nsisi isi igwọk mè ibene ikimọọn̄ inu.’ Ebi Farisi etutumu ibe: ‘Ire Jisọs igwa ene me usen mbuban, isibi ibe ke unye kan̄ ikanan̄a me ubọk Awaji.’ Usini ene ekekibe: ‘Ire ikare Awaji onyi ọmọ unye, ikpokọt igwa orukan̄ geege.’

Ebi Farisi cha egwegwen nte mè nga ogwu enerieen̄ ya mè ido ema ibe: ‘Ike owa ke gwun̄ kinyi osa ibene imọọn̄ inu?’ Ukpook otetet nte mè nga ogwu enerieen̄ ya mije ebi Farisi miwuuk lek itumu ibe ke merieen̄ ogwu geelek ochechieek me lek Jisọs isibi me uwu ntitiin̄ kiban̄. Ọmọ orọ, ema etutumu ibe: ‘Eji kperiọọn̄, ido ọmọ inyi isa otu kan̄ ifọọk.’ Ebi Farisi ekekido ogwu enerieen̄ ya idodo igbaalek mege ogwu enerieen̄ ya otumube ibe: ‘Eke orọ enyi ekpọkpọk ikido emi idodo? Ntumu inyi enyi otutuuk inu nriọọn̄be.’ Ebi Farisi cha enanaan̄ ejit mè irieen̄ ogwu enerieen̄ ya isibi.

Jisọs osisi iweek ogwu enerieen̄ ya mè ido ọmọ ibe: ‘Ire ochieek me lek ogwu Mesaya?’ Ogwu enerieen̄ ya ofọfọọk ibe: ‘Ire nriọọn̄ lek ene ya, machieek me lek kan̄.’ Jisọs obebe: ‘Emi nre ogwu Mesaya.’ Ire ikare ata mkpọ ke Jisọs orọ ni? Jisọs ikakpọkpọk igwa ene ya gaalek, ire, itap ubọk inyi ọmọ ikaan̄ ichechieek si.