Jisọs Ijomo Lajọrọs

Jisọs ikaan̄ ebi unene ita ikiluk me Betani. Ema ire Lajọrọs mè ebi ngwan̄ kan̄ ebibaan̄ Meri mè Mata. Usen ge, ike Jisọs okupbe me usaba agan̄ Jodan, Meri mè Mata eraria etip okup ugwat ugwat ijet Jisọs ibe: ‘Lek Lajọrọs ikanye. Soso gwat lek na!’ Ire, Jisọs ikasi mgbọ yaage. Ikup iso egwe iba sabum itumube inyi ebi udun̄ kan̄ ibe: ‘Kè eji eneje esi Betani. Lajọrọs ikilalaak, mbasitimi ọmọ me ilaak.’ Ebi otuchieen̄ kan̄ enenitumu inyi ọmọ ibe: ‘Ire ikilaak, eya motap ubọk inyi ọmọ ibe ikaan̄ lek kan̄ me ubọk.’ Ema kpegobo itet, eya orọ, Jisọs otutumu inyi ema ibe: ‘Lajọrọs ikwu.’

Mgbọ Jisọs ojebe isi ire Betani, iweweek iriọọn̄ ibe ke mifuun̄ Lajọrọs karake egwe ini oraraka. Owuwa ebi ene minu inikat Meri mè Mata ejit. Mgbọ Mata onọbe ibe ke Jisọs okinu, igwagwat lek isi ikweek ọmọ me oniin̄ mè itumu inyi ọmọ ibe: “Okaan̄-ene, mebe owu mokup, ngwan̄ n̄a kpomokwu.” Jisọs otutumu inyi ọmọ ibe: ‘Ngwan̄ kwun̄ mokpọk iluk ugwem. Ire ochieek me lek inu yi ni Mata?’ Mata ofọfọọk ọmọ ibe: ‘Iin̄, nriọọn̄ ibe ke ngwan̄ n̄a mojomo me mkpa me mgburudun̄ usen.’ Jisọs otutumu inyi ọmọ ibe: “Emi nre ijojomo me mkpa, mè ire si ugwem.”

Mata onenisi lek Meri mè itumu inyi ọmọ ibe: ‘Jisọs inu o.’ Meri olilibi isi lek Jisọs me oniin̄, owuwa ebi ikup me ere ya egọgọọk ọmọ me udun̄. Mgbọ Meri omun̄be Jisọs, irọrọn̄ me ukot kan̄ mè ikito ito itumu ibe: ‘Okaan̄-ene, mebe ke owu omaan̄ me ere yi, ngwan̄ kiji kpomokwu!’ Ito ebi ene ekito isisik Jisọs lek enenen, ibebene ikito ito si. Mgbọ ebi ene emun̄be ike Jisọs okito ito, ema etutumu ibe: ‘Ene yi imun̄ Lajọrọs me chieen̄ me atikọ.’ Ire, usini ene ekikeek mkpọ orọrọ Jisọs ikakọtbe inyan̄a ogwu unene kan̄. Keke ke Jisọs oborọ ni?

Jisọs ojeje isi ere efuun̄be Lajọrọs, me nkororok ge eyi esabe ikpele ewuuk ichit otu. Inyinyi ida ibe: ‘Ikpukpọt ewuuk ya isan̄a me otu udọn̄ ya.’ Mata obebe: ‘Usen ini ire eya efuun̄be ọmọ. Nkwukwu kan̄ modun̄u olu enenen.’ Mgbọ ekpukpọtbe ewuuk ya isan̄a, Jisọs orariaak uriaak ibe: ‘Nte n̄a, ntọn̄ owu mije okinọ emi ida. Nriọọn̄ ibe ke okekinọ emi mgbọ geelek, ire, nkitumu ikọ chi isibi ufuna ife chi meriọọn̄ ibe ke owu oria emi inu me atikọ.’ Inenisa me ubene ida ibe: “Lajọrọs, sibi na!” Mkpọ ukechieen̄ orọrọ, Lajọrọs onanan̄a isibi me emen udọn̄-ufuun̄ ya melek ekwut esabe ikat ọmọ. Jisọs obebe: “Ìtọn̄ọ ekwut-ufuun̄ cha ìsan̄a me lek, inyi ije ifo.”

Owuwa ebi imumun̄ inu yi ekakaan̄ ichechieek me lek Jisọs. Ire, usini ebi ene esisi isi itumu inyi ebi Farisi. Bene me mgbọ ya fo isi, ebi Farisi ekekiweek ikpakpan̄ Jisọs mè Lajọrọs. Judas Isikariọt, ene ge me lek akọp mè ebi otuchieen̄ iba cha onwenween̄ lek isi lek ebi Farisi mè ido ema ibe: ‘Ikpoko inen ke enyi ebekpe emi ire nleke Jisọs itap enyi me ubọk?’ Ema echechieek ikpekpe ọmọ akọp ikpoko alata okuket ita, Judas obebene ikiweek irek ibosa Jisọs iyaka itap me ubọk ebi Farisi.