Jisọs Ije me Inyọn̄ Isi Mun̄

Ikare igwagwa orukan̄ mè ijojomo ebi ikwakwaan̄ gaalek ke Jisọs orọ, itọ ikọ inyi efet mè ibot si. Mgbọ Jisọs oriaakbe uriaak me inyọn̄ ogoon̄ isan̄a, imumun̄ ike efet okiwut me okwaan̄ Galili. Ebi otuchieen̄ kan̄ kpekọt ikọp uji kiban̄ bak lek efet ya okisisaak ema. Jisọs onanan̄a me inyọn̄ ogoon̄ isibi mè ibene ikije me inyọn̄ isi mun̄ isi lek uji kiban̄. Mgbọ ebi otuchieen̄ cha emun̄be ene okije me inyọn̄ isi mun̄, ukpook otetet ema. Ire, Jisọs otutumu inyi ema ibe: ‘Ire emi o, ikatet ukpook.’

Pita otutumu ibe: ‘Okaan̄-ene, ire ire owu me atikọ, be mè nje nnu me lek kwun̄.’ Jisọs ofọfọọk Pita ibe: ‘Je na me lek n̄a.’ Ike mgbọ egwijo ya okiwut, Pita onanan̄a isibi me emen uji ya mè ibene ikije me inyọn̄ isi mun̄ isi lek Jisọs. Ike ikije igbet, Pita okpọkpọ egwijo ya mè ibene ikifieek owot. Mgbọ yaage, ibebene ikigen. Pita otataan̄ ukpo ibe: ‘Okaan̄-ene, nyan̄a emi!’ Jisọs otetet ubọk kan̄ mè ido ibe: ‘Ojeje ibene ikikaan̄ cheche? Eke orọ okajeen̄ ichechieek?’

Jisọs mè Pita eninin̄ emen uji ya, mgbọ yaage, egwijo ya ofefieek. Ire omokọt ikeek ubọk inu okupbe me lek ebi otuchieen̄ cha ni? Ema etutumu ibe: ‘Owu ìre Gwun̄ Awaji me atikọ.’

Ikare mgbọ ge gaalek ke Jisọs otọ ikọ inyi unye efet. Mgbọ Jisọs mè ebi otuchieen̄ kan̄ ekikọp isi usaba okwaan̄, unye efet obebene ikiwut mè itap mun̄ ijot emen uji kiban̄. Ebi otuchieen̄ cha etitimi Jisọs mije, ikilalaak me emen uji ya. Ema etataan̄ ukpo ibe: ‘Ogwu ijejeen̄, eji menikwaan̄, tap ubọk nyi eji!’ Jisọs onanan̄a ikeke mè igana inyi unye efet ya ibe: “Kayaka ìwut!” Mgbọ yaage, efet ya owọwọ, isi mun̄ olọlọkọ. Jisọs ododo ebi otuchieen̄ kan̄ ibe: ‘Ire enyi kpekaan̄ si ichechieek me lek n̄a?’ Ema ekekido lek kiban̄ ibe: “Ìre kpasi ene ire eyi, ogwu efet mè ekoon̄ si okirọ ida kan̄?” Ebi otuchieen̄ cha mikween̄ ibe ire ema etoon̄ otutuuk ejit kiban̄ me lek Jisọs, ke ema kpebetet ukpook me lek inu geege.