Jisọs Ijeen̄ Ebi Udun̄ Kan̄ Ubọk Ebekibeek Uriaak

Otutuuk inu geelek ebi Farisi ekirọ ire isasa ikaan̄ nnwọn-isi ebi ene. Ire ema irọ ata mkpọ, ire isasa itaba chieen̄ ebi ene inu me lek kiban̄. Ema ekibeek uriaak me ere otutuuk ene ebekimun̄ ema. Ebi Farisi miben esese esese ujọn̄ọ uriaak me ibot eyi ema ekpọkpọk ikifuk isibi me uwu ntitiin̄ kiban̄ mè agba oniin̄ inyi ebi ene ekenọ ema. Eya orọ, inu Jisọs otumube ike ebi ene chieen̄. Jisọs ibe: ‘Ikakibeek uriaak kubọk ebi Farisi. Ema ekikeek ibe ke ikekitumu owuwa usem me uriaak kiban̄ ikineme Awaji, ire, ikakineme ọmọ. Uriaak ikup inyi owu mè Jioba gaalek. Kakpọkpọk ikitumu chieen̄ usem yaage. Jioba iweek ibe okokpa ubọk mkpọ ochubọk ikup owu me lek onyi ọmọ.

‘Ikeyi ke enyi ebekiriaak uriaak: “Nte kiji ogwu òkup me emen inyọn̄, erieen̄ kwun̄ ikup me mbuban, mkpulu eyi kwun̄ inu, mè nkeek kwun̄ irọ me linyọn̄, ike îkupbe me emen inyọn̄.”’ Jisọs itumu inyi ema ibe ekebeek uriaak ibe ekaan̄ inorie eberie usen geelek, ebeek ibe Awaji itele ijo kiban̄ inyi ema, mè ebeek si ofifi ofifi inu ogbaan̄ me lek kiban̄.

Jisọs itumu si ibe: ‘Katele ikekibeek uriaak. Kup nye kido Nte kwun̄ Jioba ibe inyi owu ata inu. Uga mè ute geelek miweek inyinyi nsabọn kiban̄ ata inu. Ire gwun̄ kwun̄ ido owu fituru, ire omonyi ọmọ ewuuk ni? Ire ido owu irin̄, ire omonyi ọmọ ulu ni?’

Jisọs onenikpa inu yi iwele ibe: ‘Ire enyi iriọọn̄ ubọk ekinyi bọn kinyi ata inu, ire enyi kperiọọn̄ ibe ke Nte kinyi Jioba monyi enyi ekwukwu mbuban ni? Gaalek inu enyi eberọ ire idodo ọmọ.’ Ire okekigọọk nteme kè Jisọs ni? Kpasi inu ke okibeek mkpọ ofolek me uriaak?