Jisọs Inyi Obop Obop Ene Inorie

Sabum Ijọk Iraraka eyi acha 32 C.E., mgbọ ebi otuchieen̄ Jisọs enan̄abe me ikwaan̄ isisi ilook ata etip ika, Jisọs melek kiban̄ ekọkọp uji mun̄ isi ire Betisaida ere ebesiki efuuk mije lek owọbe ema. Ire, mgbọ ema erebe ijọn̄, Jisọs omumun̄ ibe ke obop obop ebi ene migọọk ema isi ere ya. Jisọs ibọkọ ema itap inan̄a me ata ejit ikerere ibe ke inu iweekbe ire ikukup melek ebi otuchieen̄ kan̄ gaalek. Igwa ebi orukan̄ geelek mè ijeen̄ ema mkpọ si. Me otuuk usen ya, Jisọs ijejeen̄ ema mkpọ ofolek Ama Ubọọn̄ Awaji. Mgbọ egwe ofitbe, ebi otuchieen̄ enunu initumu inyi ọmọ ibe: ‘Uraafiọọn̄ ira ikitaka ebi ife chi. Be mè ema efo inyi ekọt esi eweek inorie erie.’

Jisọs otutumu ibe: ‘Ikagbe ibe ema efo. Enyi me lek kinyi, inyi ema inorie ibe erie.’ Ebi otuchieen̄ kan̄ edodo ọmọ ibe: ‘Ire oweek ibe eji esi elep fituru enyi ema etaka ni?’ Filip, ene ge me lek ebi otuchieen̄ cha otutumu ibe: ‘Eji kpebekọt ilep fituru oboso otutuuk ife chi ikerere ibe ke eji mikaan̄ owuwa ikpoko.’

Jisọs ododo ibe: ‘Inorie okukup iwawa ire?’ Anduru ofọfọọk ibe: ‘Owut fituru go melek asabọn ufuk irin̄ iba omaan̄, ire, ikposo mkpọ geege.’ Jisọs otutumu ibe: ‘Sa fituru mè irin̄ cha na.’ Itutumu inyi ife cha ibe ekweek irek me inyọn̄ mbubet me urum me urum. Inenimọnọ fituru mè irin̄ cha, mè ibene isi ikpọ inyọn̄ mè ibeek uriaak. Ineninyi ebi otuchieen̄ kan̄ inorie cha ibe eche enyi ebi ife cha. Ebirieen̄ ebi ikup me ere ya miso obop go, otutuuk kiban̄ melek ebibaan̄ mè nsabọn si mirie mkpọ ijot owot. Me mgburudun̄, ebi otuchieen̄ eteteen̄ inorie echi osisik itap me emen akọp mè okwun iba ufuna inu geege ikajijit. Inu ya orọrọ ikup uyeke uyeke, ire ikare ikeyi ni?

Ebi ene mibele ejit enenen me lek inu Jisọs orọbe ire lek ekiweek irọrọ ọmọ ogwu ubọọn̄ kiban̄. Ire, mije Jisọs oriọọn̄be ibe ke mgbọ Jioba oborọ ọmọ ubọọn̄ ikakem, ibebe mè ife cha efo mè itumu inyi ebi otuchieen̄ kan̄ ibe ekọp esaba okwaan̄ Galili. Ema eninin̄ uji ikikọp ije, Jisọs ojeje inene inyọn̄ ogoon̄ ọmọ gaalek. Bak lek keke ni? Bak lek iweekbe igọgọọk Nte kan̄ itumu ikọ me uriaak. Ubọk geelek ibe ke Jisọs ikikaan̄ owuwa mkpọ ikirọ, ikisasan̄a mgbọ isibi ibeek uriaak mgbọ geelek.