Ijejeen̄ kè Jisọs me Inyọn̄ Ogoon̄

Mgbọ Jisọs ogobobe akọp mè ebi otuchieen̄ iba kan̄ isan̄a, ijeje isi ere ogbogbo ene etitiin̄be. Ife cha enan̄a me Galili, Judia, Taya, Sidọn, Siria, mè agan̄ usaba okwaan̄ Jodan. Ema esasa ebi ikifiak chieen̄ orukan̄ geelek mè usini ebi ijo ekwukwu okisisaak igbaalek inu, Jisọs ogwagwa otutuuk kiban̄. Jisọs onenikweek irek me inyọn̄ ogoon̄ ya mè ibene ikitumu usem inyi ema. Ikpa isibi mkpọ eji eberọ ire eji iweek irere ebi unene Awaji. Eji meriọọn̄ ibe ke eji miweek Jioba mè ikween̄ imama ọmọ. Ire, eji kpebekọt ima Awaji ire eji kpema ebi ofifi ife. Eji kpelọlọ ikekijeen̄ ebi ene ata ejit mè ikekirọ inu otatat inyi otutuuk ene, ikerere ebi ichacha eji.

Jisọs itumu ibe: ‘Ikare ebi unene kwun̄ gaalek ke oboma. Ikup ufiak si ibe oma ebi ichacha owu mè okosa otutuuk ejit kwun̄ otele onyi ebi ene. Ire ene ikinaan̄ ejit inyi owu, me okafiatge mgbọ, je si lek ene ya mè be ọmọ kpukpa. Kirọ mkpọ me lek ebi ene ubọk oweekbe ibe ekerọ me lek kwun̄.’

Jisọs inyi ebi ene ata nteme ofolek inu nkaan̄. Itumu ibe: ‘Irere ogwu unene Jioba ikup ufiak enenen igak ikakaan̄ owuwa ikpoko. Ebi inọ mekọt ichiin̄ ikpoko kwun̄, ire, kpunu ene geege obokọt ichiin̄ ata mgbaan̄je okaan̄be melek Jioba mè iyaka ire, irọ ibe okayaka ire unene kan̄. Kakisisaak lek ofolek inu oborie, obonwọ, mè iyaka ire obotap. Kpọ-nu ebi kè ofut. Awaji ikimun̄ ijaan̄ ibe ke ema mikikaan̄ inorie eberie. Okpokọt itap egwe ge isọkọ me lek usen ugwem kwun̄ ire okisisaak lek. Kawuuk ibe ke Jioba iriọọn̄ inu oweekbe echi okukup ufiak.’

Ebi ikigban̄ Jisọs kperarak imun̄ ene geege otutumu ikọ kubọk Jisọs. Ebi ibot uwu uriaak kiban̄ kpewuuk lek ijeen̄ ema inu chi. Keke orọ Jisọs orebe ogwu ijejeen̄ omimin ichit? Bak lek, otutuuk inu ijeen̄be inan̄a me ubọk Jioba.