Yọk Itọ Jisọs Ikpọ

Eyi Jisọs okaan̄be ntap-me-mun̄ isan̄a, ekwukwu mbuban onenisa ọmọ isi emen èwê. Ikarie inorie geege me otuuk akọp usen ini, uraafiọọn̄ otataka ọmọ enenen. Yọk onunu initọ Jisọs ikpọ mè itumu inyi ọmọ ibe: ‘Ire owu ore Gwun̄ Awaji me atikọ, tumu ikọ nyi ewuuk chi, mè ikana inorie inyi owu.’ Ire, Jisọs osasa inu okup me ere ge me emen Ikpa Mbuban ifọọk ibe: ‘Ìkare inorie gaalek okinyi ene ugwem. Ire igbagban̄ utọn̄ me lek ikọ geelek ònan̄a me otu Awaji isibi.’

Yọk okpọkpọk itọ Jisọs ikpọ mè itumu inyi ọmọ ibe: ‘Ire owu ore Gwun̄ Awaji me atikọ, nan̄a me ere yi wulu keke me ijọn̄, mije, ege me Ikpa Mbuban ibe ke Awaji monyi ebi osat kan̄ ikan ofolek kwun̄, ke ema mêben owu ikaan̄ me ubọk kiban̄.’ Ire, Jisọs ofọfọọk ọmọ ibe: ‘Ege si me Ikpa Mbuban ibe okatọ Jioba Awaji kwun̄ ìkpọ.’

Setan onenijeen̄ Jisọs otutuuk mkpulu okup me linyọn̄ mè umin kan̄ mè itumu inyi Jisọs ibe: ‘Emi mâyaka otutuuk inu ubọọn̄ eyi ama ubọọn̄ chi, mè unye isasa ikikpulu ema otutuuk inyi owu ire otọbọ ebum inyi emi mgbọ ge gaalek.’ Ire, Jisọs ofọfọọk Yọk ibe: ‘Je nan̄a, Setan! Mije, ege me Ikpa Mbuban ibe, tọbọ ebum nyi Jioba Awaji kwun̄ gaalek.’

Yọk onenije inan̄a, ebi osat enunu me lek kè Jisọs inisi ikwaan̄ inyi ọmọ. Bene me mgbọ ya fo isi, Jisọs okekilook ata etip Ama Ubọọn̄. Eya ore ikwaan̄ Jioba oriabe ọmọ ibe inirọ me inyọn̄ ijọn̄ yi. Ebi ene mima inu Jisọs ojeen̄be ema, ema si migọọk ọmọ isi ere geelek isibe.