Jisọs Ikana Ogwu Mesaya

Jọn ikilook ebi ene ibe: ‘Ogwu omimin igak emi okinu.’ Me mgbọ Jisọs orebe mkpọ obet lek akọp acha ita, inanan̄a me Galili inu me okwaan̄ Jodan ere Jọn okitap ebi ene me mun̄. Jisọs iweek ibe Jọn itap ọmọ me mun̄, ire, Jọn otutumu inyi ọmọ ibe: ‘Ikare emi matap owu me mun̄, kè ore owu motap emi me mun̄.’ Jisọs ofọfọọk Jọn ibe: ‘Jioba iweek ibe owu otap emi me mun̄.’ Eya orọ, ema ejeje inin̄ emen okwaan̄ Jodan, Jọn onenitap Jisọs me emen mun̄.

Mgbọ Jisọs onan̄abe isibi me emen mun̄ ya, ibebeek uriaak. Mgbọ yaage, emen inyọn̄ ochichili, ekwukwu Awaji onanan̄a me inyọn̄ iwulu kubọk ekerekwukwu inisọọk me ibot kè Jisọs. Jioba otutumu me emen inyọn̄ ibe: “Ogwugwu ore gwun̄ n̄a enerieen̄, ogwu mmabe. Emi mbele ejit enenen me lek kan̄.”

Mgbọ ekwukwu Jioba onube me lek Jisọs, ikakana Karais mè iyaka ire ogwu Mesaya. Mgbọ keyi, mobene ikwaan̄ Jioba oriabe ọmọ ibe inirọ me inyọn̄ ijọn̄.

Mgbọ yaage ikaan̄be ntap-me-mun̄ isan̄a, Jisọs ojeje isi emen èwê mè ikup me ere ya akọp usen ini. Mgbọ ikabe, ijeje isi imun̄ Jọn. Ike Jisọs okije igbet ọmọ lek, Jọn otutumu ibe: ‘Ìkpọ Gwun̄ Arọọn̄ Awaji ogwu òkiben nrọ-nlọ ebi linyọn̄ isan̄a.’ Sa me itutumu usem yi, Jọn ikirọ inyi ebi ene eriọọn̄ ibe ke Jisọs ore ogwu Mesaya. Ire oriọọn̄ inu orọrọ Jisọs mgbọ ikupbe me emen èwê ni? Kè eji ekween̄-nu.