Jisọs Ituku Uwu Mbuban Itana

Me emen onyan̄ ini me mkpọ obet lek acha 30 C.E., Jisọs osisi Jeruselem. Owuwa ebi ene minu me ama ya inigọọk irọ Ijọk Iraraka. Ge me lek inu erọbe me lek ijọk ya ire igwagwa ngwugwa anam me uwu mbuban. Usini ene esa anam kiban̄ ikaan̄ me ubọk inu, ire, ebi ofifi ife elep eyi kiban̄ me Jeruselem.

Mgbọ Jisọs onin̄be uwu mbuban, imumun̄ ebi ene ekinyam anam me ere ya. Ema ekinyam ewe me uwu ekitọbọ ebum inyi Jioba! Keke ke Jisọs orọ ni? ‘Isa olik irọ inyọnọ mè iyaka ire njijan̄ mè isa ilap arọọn̄ mè eriembuuk isibi me emen uwu mbuban ya. Iyiyala si ikpoko ebi ìkinwene ikpoko, mè ibene otutuuk ikasi kiban̄ itọp ikana ichit. Itutumu inyi ebi ìkinyam ekerekwukwu ibe, ìgwat lek ìkpulu otutuuk unọn kinyi chi ìsibi me ere yi! Ikayaka ìsa uwu Nte n̄a ìrọ oyet ewe!’

Inu yi Jisọs orọbe ike ebi ikup me uwu mbuban ya chieen̄. Ebi udun̄ kan̄ ekekeek nriran ebenbe ofolek ogwu Mesaya eyi obe: ‘Ulọk nkaan̄be me lek uwu Jioba ìkiyok emi me ejit kubọk ukan̄.’

Me acha 33 C.E., Jisọs okpọkpọk ituku uwu mbuban itana òso mgbọ iba. Ikachieek ibe ene geege isa uwu ogwu Ute irọ inu ikajeen̄ge ulibi.