Esita Inyan̄a Ebi Eyi Kan̄

Esita ire ogwu enenwaan̄ Ju okiluk me Pesia me ama Susa. Ebi uwu kiban̄ emaan̄ me lek ebi Nebukadineja okpulube kubọk ebi usun̄ inan̄a me Jeruselem me owuwa acha oraraka. Gwun̄ ngwan̄ ogwu ute Mọdikai okpọ ọmọ chieen̄ me lek, Mọdikai ire ogwu usun̄ Ayaserọs ogwu ubọọn̄ okikpulu Pesia.

Mgbọ Ayaserọs okiweek aya nwa, misa ebibaan̄ ijajaan̄ ichit me ido ya ijet ọmọ ibe igobo ene ge me lek kiban̄. Esita ire ene ge me lek ebibaan̄ cha. Ire Esita ke Ayaserọs ogobo ibe ire nwa kan̄. Mọdikai otutumu inyi Esita ibe ikatumu ibe ke ọmọ ire ogwu Ju.

Aman, ogwu enerieen̄ ge okigumu lek ore ogwu ibot otutuuk ebi ikikpulu. Ikiweek ibe otutuuk ene eketọbọ ibot enyi ọmọ. Ire, Mọdikai ikakichieek itọtọbọ ibot inyi ọmọ, eya orọ Aman onaan̄be ejit mè ikiweek ikpakpan̄ Mọdikai. Mgbọ Aman oweekbe iriọọn̄ ibe ke Mọdikai ire ogwu Ju, inenitọt ikpakpan̄ otutuuk ebi Ju ikup me ido ya. Itutumu inyi ogwu ubọọn̄ ibe: ‘Ebi Ju ire ebi mkpikpak, igbe ibe okpan̄ ema.’ Ayaserọs ofọfọọk ibe: ‘Rọ ema inu geelek oneneme owu.’ Ineninyi Aman unye ibe itap ikan. Aman otatap ikan ibe ekpan̄ otutuuk ebi Ju me òso akọp mè usen ita me emen akọp mè onyan̄ iba ekigwen Adari. Ire, Jioba ikpọkpọ ikikpọ inu okibọkọ irek.

Esita ikariọọn̄ inu geege ofolek ikan ya. Eya orọ Mọdikai oraria ikan ya ijet ọmọ mè itumu inyi ọmọ ibe: ‘Je si gọọk ogwu ubọọn̄ kpa usem.’ Esita otutumu ibe: ‘Ebekpakpan̄ ogwu geelek osisi lek ogwu ubọọn̄ me mgbọ ikagwenge ene ya. Eyi n̄a, îra iso akọp usen ita, kpegwen emi ibe emi ǹnu me isi ogwu ubọọn̄! Ire, emi masi. Ire inyana okuba kan̄ ida emi, maluk. Ire ikanyana, mâkwu.’

Esita onenije isi oyet egep ogwu ubọọn̄. Me mgbọ ogwu ubọọn̄ omun̄be ọmọ, inyanyana okuba kan̄ ida ọmọ. Esita ojeje isi lek ogwu ubọọn̄, ogwu ubọọn̄ ododo ọmọ ibe: ‘Keke ke mbarọ inyi owu?’ Esita ofọfọọk ibe: ‘Mweek ibe owu melek Aman egbaan̄ enu ijọk ntobe inyi enyi me chereyi.’ Me ijọk ya, Esita okpọkpọk igwen ema ibe ekpọk enu ofifi ijọk iboto. Me ijọk eyi òso mgbọ iba, ogwu ubọọn̄ okpọkpọk ido ọmọ ibe: ‘Ire keke ke mbarọ inyi owu?’ Esita ofọfọọk ibe: ‘Ikaan̄ ene ge okiweek ikpakpan̄ emi mè ebi melek n̄a. Soso nyan̄a eji.’ Ogwu ubọọn̄ ododo ọmọ ibe: ‘Ire ekene okiweek ikpakpan̄ owu?’ Ifọfọọk ibe: ‘Ire ogwu mkpikpak yi Aman.’ Ayaserọs onanaan̄ ejit enenen ire lek itumube ibe mè ekpan̄ Aman mgbọ yaage.

Ire, kpunu ene geege obokọt inwene ikan kè Aman, ikerere ogwu ubọọn̄ si ikpokọt inwene. Ogwu ubọọn̄ onenirọ ibe Mọdikai ikana ogwu ibot ebi ikikpulu mè inyi ọmọ unye ibe irọ ayaya ikan. Mọdikai onenirọ ayaya ikan eyi onyinyi ebi Ju irek isasa ibem lek kiban̄ ire ebi ene erọ ikeme ema. Me akọp mè usen ita me onyan̄ Adari, ebi Ju etitim igak ebi ochicha kiban̄. Bene me mgbọ ya nyi isi, ema ekekirie ijọk ntim-ngak yi acha geelek.