Ejira Ijeen̄ Ebi Ene Ikan Awaji

Ira iso akọp acha jaaba karake usini ebi Ijeren ekabe inu me Jeruselem. Ire, usini me lek kiban̄ eluluk ibia me esese esese ama me ido Pesia. Ejira ogwu ngwugwa okijeen̄ ebi ene ikan kè Jioba ire ene ge me lek ife cha. Ejira iweek iriọọn̄ ibe ke ebi ikup me Jeruselem kpekiluk igọọk ikan kè Jioba, eya orọ, iweek isisi itap ubọk inyi ema. Atejakisis ogwu ubọọn̄ Pesia otutumu inyi Ejira ibe: ‘Awaji irọ ibe okaan̄ iriọọn̄-inu inyi ojeen̄ ebi ene ikan kan̄. Sa ebi ife geelek iweweek igọgọọk owu sa gbaalek fo Jeruselem.’ Ejira ojeje isi lek otutuuk ebi ikiweek ikaka inu me Jeruselem. Ema ebebeek Jioba ibe ibem ema me oniin̄ ike ema ekije ujọn̄ọ ije kiban̄. Mgbọ ema ebeekbe uriaak isan̄a, ema ebebene ije kiban̄.

Onyan̄ ini iraraka me lek, ema erere Jeruselem. Ebi ugane me ere ya enenitumu inyi Ejira ibe: ‘Ebi Ijeren kpesiki ibot inyi Jioba, ema mido ebibaan̄ ebi ikitọbọ ebum inyi ataak awaji.’ Keke ke Ejira oborọ? Me isi ebi ene, Ejira onenitọbọ ekpe mè ibene ikibeek ibe: ‘Jioba, owu orọ owuwa inu inyi eji, ire, eji mirọ ijo inu ikeme owu.’ Ebi ife cha egwugwu ikom, ire, ema ekpọkpọk ibene ikirọ inu ikatatge. Ejira ogogobo ebi ugane mè ebi oyerebet ibe etap ubọk enyi ema egwu ekom enu me lek Jioba. Mije ibe ke ema kpechieek igwugwu ikom initọbọ ebum inyi Jioba, ekekirieen̄ ema isibi me onyan̄ ita ogọgọọk.

Akọp mè acha iba oneniraka, me okike mgbọ yi, ekpọkpọk inama mgban ikana ama Jeruselem. Ejira onenititiin̄ ebi ene me oyet ile, ichili ikpa ikan mè ibene ikifuk ikan Awaji inyi ema. Mgbọ Ejira ochilibe ikpa ikan ya, otutuuk ene enanan̄a ikeke. Ejira onenitọn̄ Jioba, otutuuk ene ebebene ubọk kiban̄ ifo inyọn̄ isasa ijeen̄ ibe ke ema michieek me lek inu itumube. Ema erọriọọn̄ ubọk ikigban̄ ike Ejira okifuk mè ikikpa ikan ya iwele. Ema enenichieek ibe ke ema mida lek ibọkọ me lek Jioba, mè ibene ikito ito. Me ofit iwele kan̄, Ejira ofufuk ikan Jioba igbaalek inyi ema. Ema eneniweek iriọọn̄ ibe ke mgbọ eberie ijọk Uwu Nlak more sọnja mgbọ. Mgbọ yaage, ema ebebene ikineen̄ lek inyi ijọk ya.

Me otuuk usen jaaba erọbe ijọk ya, ema minwọọn̄ unwọọn̄ mè itọn̄ Jioba me lek owuwa inorie ema erọkọbe. Kperara irọ mbet lek ijọk Uwu Nlak okup ikeya karake usen kè Josuwa. Mgbọ ijọk ya otabe, ema etititiin̄ mè ibeek uriaak ibe: ‘Jioba, owu onyan̄a eji inan̄a me usun̄, inyi eji inorie me emen èwê, mè inyi eji ujuja ido yi. Ire, inan̄a me mgbọ ire mgbọ, eji mikpaka ibot inyi owu. Owu oraria ebi nriran ibe etaba eji ubọk me utọn̄, ire, eji kpegban̄. Ire, okpọkpọk ikaan̄ ime. Owu orọ use kwun̄ ochieekbe Ebereyam iso. Mgbọ keyi, eji ekichieek owu use ibe ke eji mesiki ibot inyi owu.’ Ema enenige use kiban itap me ikpa. Ebi ugane, ebi Libai, mè ebi ngwugwa enenisa iman̄ òriọọn̄ kiban̄ igon me lek.