Danien Me Emen Udọn̄ Egbe Àtat

Ofifi ogwu ubọọn̄ okpukpulu Babilọn ire Dariọs ogwu Midia. Mije Dariọs omun̄be ibe ke Danien ire ogwu osisibi esese, inenito Danien kubọk ogwu ibot ebi ikukup ufiak ichit me ido ya. Ebirieen̄ chi enenikikaan̄ mba-ejit me lek Danien mè ikiweek ikpakpan̄ ọmọ. Ema miriọọn̄ ibe ke Danien ikekibeek uriaak inyi Jioba mgbọ ita usen geelek, eya orọ, ema etutumu inyi Dariọs ibe: ‘Ogwu ubọọn̄, tap ikan ibe otutuuk ene ekebeek uriaak enyi owu gaalek. Ene geelek ogwu ikasiki ibot inyi ikan yi, meben ene ya itọp itap me emen udọn̄ egbe àtat.’ Dariọs ima inu ema etumube, inenitap ikan ya me ikpa.

Mgbọ yaage Danien onọbe mkpọ ofolek aya ikan ya, isisi uwu kan̄. Itọtọbọ ekpe ikiriaak uriaak inyi Jioba me isi otu nruruk kan̄ eyi okukup obook. Ebi ikakaan̄ mba-ejit me lek kan̄ ebubum inin̄ uwu kan̄ mè imun̄ ọmọ okibeek uriaak. Ema elilibi isi lek Dariọs mè itumu inyi ọmọ ibe: ‘Danien ikasiki ibot inyi owu. Ikibeek uriaak inyi Awaji kan̄ mgbọ ita egwe geelek.’ Dariọs ima Danien, ikaweek si ibe ikwu. Me otutuuk usen ya, ikpọkpọk ikikeek mkpọ iborọ isasa inyan̄a Danien. Me ota kan̄, ineninyi ebi kan̄ ida ibe esi etọp Danien etap me emen udọn̄ egbe àtat mije, Dariọs me lek kan̄ ikpokọt inwene ikan ya itapbe me ikpa.

Me eririeen̄ ya, Dariọs ikaan̄ sasaak ofolek Danien enenen ire lek ikakọtbe ilaak. Me agan̄ egwe, Dariọs olilibi isi ere udọn̄ ya okupbe mè itaan̄ ukpo ido ibe: ‘Ire Awaji kwun̄ inyan̄a owu?’

Dariọs onọnọ ida ge. Ire ida Danien ke inọ! Danien ifọọk Dariọs ibe: ‘Ogwu osat Jioba ichit otu ebi kè egbe àtat. Ema kpesak emi unan geege me lek.’ Dariọs ibele ejit enenen! Inyinyi ida ibe etaba Danien esibi me emen udọn̄ egbe àtat ya. Danien ikasak unan geege me lek. Ogwu ubọọn̄ onyinyi ida ibe etọp ebirieen̄ cha itotoon̄ Danien uraamọn etap me emen udọn̄ ya. Mgbọ etọpbe ema itap me emen udọn̄ ya, ebi kè egbe àtat egwagwak ema itaka.

Dariọs onyinyi ebi kan̄ ida ibe: ‘Otutuuk ene ekalọlọ itetet ukpook me lek Awaji kè Danien. Ọmọ onyan̄a Danien isibi me otu ejeek ebi kè egbe àtat.’

Ire okekibeek uriaak inyi Jioba egwe geelek kubọk Danien ni?