Inu Egebe Me Agba Uwu

Ike mgbọ ojebe, Belisaja onenikana ogwu ubọọn̄ Babilọn. Me ikakwun̄ ge, inenigwen obop ene ge me lek ebi ikukup ufiak ichit me ido ya ibe enu ijọk ge. Ineninyi ebi usun̄ kan̄ ida ibe esa ekpen̄ alata araran̄ echi Nebukadineja okpulube me emen uwu mbuban kè Jioba enu. Belisaja mè ebi igwenbe enenisa ekpen̄ cha ikinwọ miin̄ mè ikitọn̄ awaji kiban̄. Mgbọ yaage, ubọk ge okakana isibi mè ibene ikige nke nke usem me agba uwu ere ekirie inorie ya.

Ukpook itet Belisaja enenen. Inenigwen ebi ikitet ǹcha mè ichieek ema use ibe: ‘Ene geelek okọkọt ibum ibot usem chi inyi emi, marọ ibe ene ya ikana òso ene ita okakaan̄ unye ichit me Babilọn.’ Ema misa igak, ire, kpekọt ibum ibot usem cha. Ogwu ubọọn̄ enenwaan̄ onunu mè itumu ibe: ‘Ikaan̄ ogwu enerieen̄ ge ekigwen Danien ogwu okiwuuk lek ibum ibot inu inyi Nebukadineja. Mokọt ibum ibot usem chi inyi owu.’

Danien onunu me isi ogwu ubọọn̄ Belisaja. Belisaja otutumu inyi ọmọ ibe: ‘Ire okọt ifuk mè ibum ibot usem chi inyi emi, matap owu akalari alata araran̄ me ebek mè irọ ibe okana òso ene ita okakaan̄ unye ichit me Babilọn.’ Danien otutumu inyi ọmọ ibe: ‘Nkaweek inyinyi kwun̄, ire, matumu inyi owu inu usem chi osibibe. Nte kwun̄ Nebukadineja ire ogwu ugumulek, ire, Jioba ogegele ọmọ isiki. Owu oriọọn̄ otutuuk inu orọrọ ọmọ, ire, owu okajeen̄ Jioba ulibi mije osabe ekpen̄ alata araran̄ onan̄a me uwu mbuban kan̄ ikinwọ miin̄. Eya orọ Awaji ogebe usem chi, orere: Mene, Mene, Teken, Pasin. Usem chi isibi ibe ke ebi Midia mè ebi Pesia metim igak Babilọn, owu si okpoyaka ire ogwu ubọọn̄.’

Ikup kubọk kpunu ene geege obokọt itim igak Babilọn. Okwaan̄ odọdọk ikukup ikana ama ya, miwak mgban ikana lek ama ya si. Ire, me ikakwun̄ yaage, ebi Midia mè ebi Pesia eninin̄ ama ya. Sarọs ogwu ubọọn̄ Pesia ida mun̄ okup me okwaan̄ okup ikana Babilọn ifo ofifi agan̄ inyi ebi akọn̄ kan̄ mekọt ije inin̄ otunchit ama ya. Mgbọ ema ejebe ire otunchit ama ya, ikup obook! Ebi akọn̄ eninin̄ ijot mè itim igak ama ya mè ikpan̄ ogwu ubọọn̄ Belisaja. Sarọs onenikana ogwu ubọọn̄ Babilọn.

Sabum acha ge otabe, Sarọs onenitumu ibe: ‘Jioba itumu inyi emi ibe mè mkpọk nnama uwu mbuban me Jeruselem. Ene geelek ogwu oweweek igọgọọk itap ubọk irọ ikwaan̄ yi mokọt igwu ikom ifo.’ Me atikọ, mgbọ akọp acha jaaba orakabe me lek mfufiat Jeruselem, owuwa ebi Ju migwu ikom ika inu ama ya ike Jioba ochieekbe me use.’ Sarọs inyi ida si ibe ekpulu ekpen̄ alata araran̄ mè alata okuket echi Nebukadineja okpulube me uwu mbuban esa egbaalek efo. Ire omun̄ ubọk Jioba osabe Sarọs itap ubọk inyi ebi eyi kan̄ ni?