Mkpulu Okup Kubọk Uti Ile

Me eririeen̄ ge, Nebukadineja omumun̄ ilaak ukpook ge. Iraria ibe esa otutuuk ebi iriọọn̄-inu enu me isi kan̄, mè enebum ibot ilaak ya enyi ọmọ. Ire, kpunu ene geege okọkọt ibum ibot ilaak kan̄. Me ota kan̄, inenigọọk Danien ikpa usem.

Nebukadineja itumu inyi Danien ibe: ‘Me emen ilaak n̄a, mmun̄ uti ile ge ojọjọn̄ọ ichep me inyọn̄. Ebilene ekikup me otutuuk ere geelek me linyọn̄ imun̄ uti ya. Inwan̄ uti ya îjaan̄ uja, mfut ojojot otutuuk inyọn̄ kan̄. Ebi kè anam oron ekekilet lek me irak kan̄, ebi kè ofut òwulu me inyọn̄ ekekinama uwu me lek otu agọọk kan̄. Ogwu osat ge oneninan̄a me emen inyọn̄ isibi inu. Inenitaan̄ ukpo ikitumu ibe, Fieek uti ya to, mè sọp otu agọọk kan̄ cha san̄a. Ire, sa okwukwut melek ekwe bọp ebon kan̄ mè ugwun̄-ijọn̄ kan̄ kam, mè tele inyi ibia me ijọn̄ me etete mbubet otu oron. Enwene ejit kan̄. Esan̄a ejit ebilene esan̄a me emen kan̄, mè esa ejit anam oron etap ọmọ me emen, inyi ikaan̄ ejit anam isa iluk acha jaaba inyi ebi ìkup me ugwem esa me ikeyi eriọọn̄ ibe ke îre Awaji Ogwu Òbebene Ichit okitọ ikọ me ama ubọọn̄ ebilene geelek. Ogwu òneme ọmọ ke îbene ito me ibot mkpulu ama ubọọn̄ geelek.’

Jioba onenijeen̄ Danien inu ilaak ya osibibe. Mgbọ Danien ogobobe ilaak ya itet, itetet ukpook mè itumu ibe: ‘Jei ogwu ubọọn̄, mebe ke ilaak yi ìborọn̄ itet ebi ochicha kwun̄, kè ònwọn, ire, ilaak yi iborọ iso me lek kwun̄. Uti ile ya echobe ito me ijọn̄ ire owu. Owu mochep mkpulu kwun̄, mè itaka mbubet kubọk ebi kè anam oron. Ire, bak me lek ogwu osat ya otumube ibe ke mejuuk ebon uti ya melek ugwun̄-ijọn̄ kan̄ itele, ìsibi ibe ke mêyaka ama ubọọn̄ kwun̄ inyi owu.’

Acha ge iraraka, Nebukadineja okekije me inyọn̄ otoon̄ uwu ubọọn̄ kan̄ ikikpọ ike Babilọn ojaan̄be ire, mè itumu ibe: ‘Kpọ ikpele ama yi emi nnamabe. Emi me lek n̄a nsa ikpele unye n̄a inama!’ Ike ikitumu ikọ ya me otu, ida ge onanan̄a me emen inyọn̄ ikitaan̄ ibe: ‘Nebukadineja! Mîbọkọ unye mkpulu kwun̄ isan̄a owu me ubọk.’

Mgbọ yaage, Nebukadineja ikayaka inọ lek, ibebene ikirọ kubọk anam oron. Ererieen̄ ọmọ isibi me uwu ubọọn̄ kan̄, ibebene ikiluk me emen oron, me etete ebi kè anam oron. Inwọọn̄ lek kè Nebukadineja otitibi ijọn̄ọ kubọk akukọ igo, abọm kan̄ otibi ijọn̄ọ kubọk abọm unọn.

Acha jaaba iraraka, Nebukadineja okpọkpọk inọ lek, Jioba orọrọ ọmọ ogwu ubọọn̄ Babilọn. Nebukadineja otutumu ibe: ‘Ǹkinyi Jioba Ogwu Ubọọn̄ emen inyọn̄ itọn̄. Mgbọ keyi ke nriọọn̄ ibe ke Jioba ore ogwu okikpulu. Ikisiki ebi ikigumu lek, mè ikisa ama ubọọn̄ inyi ene geelek òneme ọmọ ibe ikpulu.’