Ebirieen̄ Ini Isisiki Ibot Inyi Jioba

Mgbọ Nebukadineja okpulube ebi ugane Juda isi Babilọn, inenito ogwu enerieen̄ ge ekigwen Asipenaji ogwu ibot ebi ibot ikwaan̄ kan̄ ge ibe ikikpọ chieen̄ me lek kiban̄. Nebukadineja otutumu inyi Asipenaji ibe igobo ebi lek onyebe ichit mè ebi irọriọọn̄ inu ichit me lek nsabọn irieen̄ cha mè esa acha ita ekpukpo ema. Kpokpo yi motap ubọk ineen̄ ema inyi ekọt ekaan̄ irek okukup ufiak me Babilọn. Nsabọn ebirieen̄ chi mekween̄ ubọk ekifuk, ikige, mè ikitumu ida usem ebi Babilọn ekigwen Akkadian. Miweek si ibe ema ekerie inorie yaage ogwu ubọọn̄ mè ebi ikup me uwu ubọọn̄ ekirie. Ene ini me lek nsabọn irieen̄ cha ire Danien, Ananiya, Misayen, mè Ajariya. Asipenaji oneninyi ema ayaya erieen̄ ebi Babilọn orere, Belitisaja, Sedarak, Mesak, mè Abedinego. Ire inu yi ema ekikween̄ morọ ibe ema ekayaka ikitọbọ ebum inyi Jioba ni?

Nsabọn irieen̄ chi mitumu ifieek isisiki ibot inyi Jioba. Ema miriọọn̄ ibe ke ikagbe ibe ema erie inorie ogwu ubọọn̄, mije, ikan Jioba ibe ke usini inorie chi ire inorie ikatanage. Eya orọ, ema etutumu inyi Asipenaji ibe: ‘Soso karọ ibe eji erie inorie ogwu ubọọn̄.’ Asipenaji otutumu inyi ema ibe: ‘Ire enyi kperie mè ogwu ubọọn̄ inimun̄ ibe ke enyi ekup kubọk ebi orukan̄ okifiak, ọmọ mokpan̄ emi!’

Danien okekeek inu ge ema ebekọt irọ. Itutumu inyi ogwu okikpọ ema chieen̄ me lek ibe: ‘Soso, kinyi eji inwan̄ mè mudim gaalek akọp usen. Mè kpọ-nu mè ire eji kpejaan̄ lek igak nsabọn irieen̄ ebi ikirie inorie ogwu ubọọn̄.’ Ogwu okikpọ ema chieen̄ me lek ochechieek irọrọ ikeya.

Mgbọ akọp usen orakabe, Danien melek ebi unene ita kan̄ ejajaan̄ lek igak nsabọn irieen̄ kechilọ. Jioba ibele ejit ibe ke ema misiki ibot inyi ọmọ. Ineninyi Danien iriọọn̄-inu isasa ikiriọọn̄ mè ikibum ibot ilaak inyi ene.

Me mgbọ kpokpo kiban̄ otabe, Asipenaji onenisa nsabọn irieen̄ cha ijet Nebukadineja. Ogwu ubọọn̄ onenigọọk ema ikpa usem mè imun̄ ibe ke Danien, Ananiya, Misayen, mè Ajariya mikaan̄ iriọọn̄-inu mè ikup me ugwọk chieen̄ igak otutuuk ebirieen̄ kechilọ. Inenigobo ema ene ini ibe ekesi ikwaan̄ me uwu ubọọn̄ kan̄. Ogwu ubọọn̄ okekibọkọ nteme ofolek inu echi okukup ufiak me otu kiban̄. Jioba irọ ibe ema ekaan̄ iriọọn-inu egak otutuuk ebi nriroon̄ mè ebi ǹcha geelek ìkup me ama ya.

Ikerere ibe ke ema ekup me ofifi ido, Danien, Ananiya, Misayen, mè Ajariya kpewuuk ibe ke ema ire ebi usun̄ Jioba. Ire owu si mokikeek mkpọ ofolek Jioba mgbọ geelek, ikerere ibe ke ebi nte kwun̄ mè nga kwun̄ kpekup melek kwun̄ ni?