Mifiat Jeruselem

Ebi Juda ekpọkpọk ikitele Jioba mè ikitọbọ ebum inyi ataak awaji. Me owuwa acha, Jioba ikpọkpọk ikisa itatap ubọk inyi ema. Iria owuwa ebi nriran ibe etaba ema ubọk me utọn̄, ire, ema kpegban̄. Kpan̄asi ikeya, ema ekisa ebi nriran cha irọ mkpọ ochak. Ike owa ke Jioba osa itap uyaka me lek ataak ntọbọ-ebum kiban̄ ni?

Nebukadineja ogwu ubọọn̄ Babilọn itim igak esese esese ido. Me adasi mgbọ itimbe igak Jeruselem, isa Jioyakim ogwu ubọọn̄, ebi ugane ama, ebi akọn̄, mè ebi ikiriọọn̄ ubọk isi ikwaan̄ ijaan̄ isi Babilọn. Ikpulu si otutuuk inu unye otu ewe okup me uwu mbuban Jioba. Nebukadineja onenirọ Jedikaya ogwu ubọọn̄ Juda.

Me adasi mgbọ, Jedikaya isiki ibot inyi Nebukadineja. Ire, ebi nriran ataak mè ebi ido ikukup iriak eteteme ọmọ ibe ikpaka ibot inyi Nebukadineja. Jerimaya otataba ọmọ ubọk me utọn̄ ibe: ‘Ire okpaka ibot, mekpan̄ ebi ene, akan̄, mè orukan̄ mokup me Juda.’

Acha jeeta iraraka me lek mkpulu kan̄, Jedikaya otutumu ifieek ikpakpaka ibot inyi Nebukadineja. Itutumu inyi ebi akọn̄ Ijipiti ibe etap ubọk enyi ọmọ. Nebukadineja oneniria ebi akọn̄ kan̄ ibe esi etim egak Jeruselem, ema ewawaak ikana ama ya. Jerimaya otutumu inyi Jedikaya ibe: ‘Jioba itumu ibe ke ire osa lek kwun̄ inyi ebi Babilọn, owu mè ebi ama kwun̄ mekaan̄ unyan̄a. Ire, ire okachieek, mesa ukan̄ iwọp Jeruselem igwook me ijọn̄ mè isa owu ije kubọk ogwu usun̄ akọn̄.’ Jedikaya otutumu ibe: ‘Mkpabasa lek n̄a inyi!’

Acha ge mè okpọkọ iraraka me lek, ebi akọn̄ Babilọn ebubum inin̄ mgban ama Jeruselem mè itap ukan̄ me ama ya. Ema miwọp uwu mbuban igwook me ijọn̄, ikpan̄ owuwa ene, mè isa obop obop ebi ene isi Babilọn kubọk ebi usun̄ akọn̄.

Jedikaya olilibi inan̄a me Jeruselem, ire, ebi Babilọn elilibi igọọk ọmọ. Ema etet ọmọ me ere okup iriak lek Jeriko mè isa ọmọ ijet Nebukadineja. Ogwu ubọọn̄ Babilọn irọ ibe Jedikaya ikpọ ike ekikpan̄ ebi bọn. Nebukadineja onenirọkọ chieen̄ Jedikaya mè itap ọmọ me mkpọn, ere ikweekbe mege ikwube. Ire, Jioba ichieek ebi Juda use ibe: ‘Akọp acha jaaba isiraka, masa enyi ika inu me Jeruselem ama kinyi.’

Keke oborọ ebi ijija ebi etetbe ifo Babilọn? Ire ema mekup inye ikigbe utoon̄-ejit inyi Jioba ni?